Школатö шуöны мöд гортöн, а классöн веськöдлысьöс — мöд мамöн. И, тыдалö, оз весьшöрö. Öд велöдчигад лун джынсö коллялан буретш школаын да буретш мöд мамыдкöд.
Кöрткерöс районса Одыб школаын велöдчигöн миян вöлі куим "мам": первой классянь – Анастасия Никитична Подорова, шöр классъясын – Вера Ивановна Ларукова, а асшöр олöмö лэдзис Валентина Михайловна Ларукова нин. Со кутшöм "озырöсь" ми вöлім – Одыбса школа 1992 воын помалысьяс! И зэв ыджыд аттьö куимнан "мамнымлы", мый быдöн козьналіс миянлы сьöлöм шоныдсö, тöдöмлунсö, кужис аддзыны быдöнысь мыйкö аслыспöлöсöс, казяліс мукöдысь торъяланатор. Со и школа помалöмсянь 5, 10 да унджык во пасйигöн ми чукöстлам найöс гажöдчыштны öтув.
А кутшöм нö чукöртчы-лöм важсö казьтывтöг? Анастасия Никитична медводдзаысь вочааліс миянöс школа кильчö помын да велöдіс медвойдöр ёртасьны да овны öти ыджыд котырöн, а сэсся нин лыддьысьны-артасьны (сэки öд öнія челядьöс моз детсадйын шыпас-лыдпасъяснад эз тöдмöдны, ми вöлім сöстöм кабала листъяс кодьöсь – мый кöсъян, сійöс и гиж). Валентина Михайловна лоис миянлы "мамöн" öкмысöд классын да эз лэдзлыв шоныд борд увсьыс школа помалан лунöдз. И, дерт, миянлы пыр нимкодь аддзысьлыны Вера Ивановнакöд, кодлöн олöмас талун тшупöда пас – гöгрöс юбилей!
Миянлы Вера Ивановна вöлі стрöг велöдысьöн да ыджыдджык бур ёртöн. Сійö сетіс роч кывйысь да литератураысь тöдöмлун. Öнія ногöн кö шуны, вöдитчис уджас выльпыртöмъясöн (инновацияясöн). А сэки и збыльысь миянлы зэв шензьöдана вöлі урокъяс дырйи дасьтыны торъя кыз тетрадь-словаръяс да пасъявны сэтчö выль кывъяс да правилöяс. И ставсö – уна рöма ручка-фломастерöн. Чуймалім тшöтш, кор тöдöмлунъяснымöс Вера Ивановна видлаліс трафарет отсöгöн да дзик пыр висьтавліс, коді кöні сорсис. Овліс, бурджыка велöдчысьяс гырысьджык классъясын вензьылісны сьöкыдджык сёрникузяяс видлалігöн либö колана пас пукталігöн. Татшöм здукъясас Вера Ивановна корліс вензьысьöс дöска дорö да тшöктыліс подулавны видзöдлассö. И мортыс кö вöлі прав, сійö гöгöрволіс сорсьöмсö, а эз кö – казьтыштліс колана правилöяс.
Öти кывйöн, роч кыв да литература урокъяс дырйи ми весь эг олöй, сюркнялім став висьталöм-тöдмалöмторсö пель сайö. Да и прöст кадö эгö жö гажтöмтчöй. Мыйта викторина, рыт, гаж вöлі школаын! И ми класса мамнымкöд пырöдчим дзик быдлаö. Ордйысим, ворсім, важ кабала да кöрт чукöртім, вотчим, пöрысь пöль-пöчьяслы отсасим, вöрö-вадорö походöн ветлывлім... Коркö медводдзаясысьсö верст дас сайö, буракö, ветлім. Зыкö воим да, зонъяс нывъяслысь шапкаяссö мырддялісны да вель джуджыд пу йылö дзебисны. Но сэки и водзсасьыштім, тышкö волім и быдöн. Гортö локтігöн сёрмим да, пемыднас нин ковмис сиктса шойна дорті мунны. А миян классын öткымынöн ёна вöлі радейтöны повзьöдчанаторъяс висьтавлыны. Ок и дзöрыштім! Гöнечöн рöдтім шойна дорöдыс.
Казьтывлам и классын рыт, кор Вера Ивановналöн водзмöстчöмöн ныла-зонмаяслы ковмис медводдзаысь йöктыны гозйöн-гозйöн. Чужöмъясным пöсь öгыръяс кодьöсь вöліны, истöг тув кö чуткан – öзъяс. Эгö на öд гöгöрвоöй, мый тадзи йöктыны позьö дзик быдöнкöд, а оз сöмын сыкöд, коді медъёна воö сьöлöм вылад...
Вера Ивановна жö гöгöрвоöдіс миянлы, мый зонлы колö лоны збойöн, слабджыкöс дорйысьöн, а нывлы, мöдарö, меліджыкöн да вежавидзысьöн. Буракö, тайö висьталöм бöрас миян нывъяс пöвстысь кодсюрö орöдісны ранечсьыс волысъяссö – вöчисны портпельяс, кодъясöс позяс сетны нуны зонъяслы...
Унатор позьö казьтывны школаын коллялöм кадсьыд, öд тайö – шудöн-гажлунöн тырöм вояс, верстямман-сöвман да асшöр олöмö петны дасьтысян вояс. И зэв колана, медым тайö кадас орччöн вöліны гöгöрвоысь ыджыдджык ёртъяс, кодъяс чуйдасны-ышöдасны бурас, отсаласны сьöкыд здукö, индасны веськыд туй. Миян класса мамным – Вера Ивановна Ларукова – вöлі буретш татшöмöн. Ми висьталам сылы ставсьыс зэв ыджыд аттьö, чолöмалам олöмас тшупöда пасöн да сиам школаса директорлöн кывкутана да сьöкыд уджас вермöмъяс!
