Сыктывдін районса важся олысьяслöн кывъяс серти, Выльгортса культура керкаын хорыс котыртчис воссьöмсяньыс. Кызь вит во сайын сылы сетісны "народнöй" ним. Сьылöны сэні мыла гöлöса аньяс, кодъяс помтöг радейтöны сьыланкывсö. Ставыс 19 морт. Хормейстернас да продюсернас 14 во нин зільö Ирина Ивановна Чувьюрова. Ачыс жö и гижö унджык сьыланкывсö. Сылöн водзмöстчöмöн хорыслы сетöма "Зöнзöвöй" ним, мый лоö "медбуръяс пöвстын медбур".
Кыдзи композитор, Ирина Чувьюрова кутіс нимавны коми сьыланкывлöн 2000 вося "Василей" гаж вылын "Зöнзöвöй" хорлöн петкöдчигöн. Сэки "Чужанін" сьыланкывйысь жюри шуис сійöс вермысьöн. 2005 воын "Дзодзöгъяс" сьыланкывйысь Ирина Чувьюрова шедöдіс видзöдысьяссянь приз. А тавося январын лоис вермысьясысь öтиöн чужан кыв йылысь сьыланкывъяс юкöнын, мыйысь козьналісны ноутбук.
Ирина Ивановна Чувьюрова чужис Печора бердса Соколово сиктын. Сыктывкарын педучилище помалöм бöрын велöдіс Изьва районысь Мокчойса школаын начальнöй классъяс. Уджалігас нин велöдчис культура колледжын. Сэсся вуджис культура керкаö, кöні дженьыд кадöн котыртіс куим вокально-хорöвöй ансамбль. Сэки нин гижис аслас шылад улö кывбуръяс. 1997 воын вуджис овны Сыктывдін районса Выльгорт сиктö.
Мый йылысь Ирина Чувьюровалöн сьыланкывъясыс? Дерт жö, войвыв му-лöн стрöг мичлун, муса чужанін, радейтчöм йылысь. Сійö гижис нин 30 сайö сьыланкыв, кодъяс важöн юргöны Коми мулöн быд пельöсын. "Василей" фестиваль вылын Ирина Ивановналöн петкöдчöм бöрын сылöн сьыланкывъяс вылö пондісны воны республикаса народнöй котыръяссянь шыöдчöмъяс.
Районса культура юкöнысь чиновникъяс кö ёнджыка водзмöстчисны, композиторлысь сьыланкывъяссö важöн нин эськö позис лэдзны торъя небöгöн. Но кыдзи тшöкыда овлö, енбиа морттö ёнджыка пыдди пуктöны оз гортас, а бокын. Кöть эськö таво Коми Республикаса национальнöй политика министерство сетіс Ирина Чувьюровалы авторлысь диск лэдзöм вылö сертификат. Ирина Ивановна уджалö оз сöмын "Зöнзöвöй" хоркöд, но и ветеранъяслöн "Мастерицы" да челядьлöн "Потешки" ансамбльяскöд.
Сідзи нин артмис, мый "Зöнзöвöй" хорын сьылöны нывбабаяс. Мужичöйяс пöвстысь сэні сöмын баянист Владимир Панюков да Коми Республикаса заслуженнöй уджалысь, композитор да баянист Михаил Оверин. Но, кор колö, Ирина Ивановна и ачыс петкöдчö хоркöд баянöн ворсöмöн.
Кызь во сайö нин сьылöны хорын Валентина Александровна Веселова, Надежда Юрьевна Курдюкова да Александра Анатольевна Жаворонкова. Сцена вылын нелямын во нин сиктса почётнöй гражданин, йöзöс велöдан юкöнын отличник, Коми АССР-са народнöй артистка Валентина Есева нима премияа лауреат Парасковья Андреевна Кузьпелева. Бöръя воясö сійö сьылö "Мастерицы" ансамбльын. Хорас эмöсь и кызь кык, и квайтымын арöсаяс. Арлыд вылö видзöдтöг ставнысö найöс öтувтö сьыланкыв дінö муслун.
Неважöн Ирина Ивановна тöдмöдіс хорöс аслас "Гöститчöм" выль программаöн, кодöс сиöма национальнöй да культурнöй йитöдъяс ёнмöдöмлы. Та вöсна "Зöнзöвöй" хор тшöкыда аддзысьлö сцена кузя аслас ёртъяскöд. Выльгортса сьылысь аньяс волісны нин сиктса уна районö, петкöдчисны Чебоксарыын да Великöй Устюгын. Сылöн концертъяс вылын век тырыс йöз.
–Öтчыд Выльгортын "Завалинка" фестиваль вылын "Сьöлöмшöръяс" сьыланкыв зэв ёна вöрзьöдіс менсьым сьöлöмöс, – висьталö народнöй хорын сьылысь Татьяна Юрьевна Антоник. – Кывзысьяс пиысь унаöн шуисны, мый тайö сьыланкывйыс йöзкостса. А бöрын-джык тыдовтчис, мый авторыс Ирина Чувьюрова. Со та вöсна ме и локті хорö. Ог вöлі тöд, артмас оз меысь артисткаыс. Но сьöлöмöй кыскис сьыланкыв дінö. Воöн-джынйöн нин сьыла народнöй хорын, кöні шойчча ловнам. А Ирина Чувьюровалöн сьыланкывъясыс ключ ва кодьöсь, кодöс окота помтöг юны.
–Хорыс сетö меным содтöд вын-эбöс, – юксьö мöвпъяснас Валентина Александровна Веселова. – Öти кадö ми верöскöд татчö волывлім. Репетиция вылö котравліс и ичöтик на пиным. "Зöнзöвöй" вöлі миянлы аслыссикас шойччанінöн. Сьыланкывъяс öтувтісны ставнымöс. Ми тані юксям асланым тöжд-майшасьöмöн, пасъям чужан лунъяс, празд-никъяс. Быдöнлы сюрас бур кыв, быдöн вермас петкöдлыны ассьыс творческöй сямлунсö.
Кодкö шмоньпырысь шуис Ирина Чувьюроваöс Сыктывдінса Есенинöн. Тайö тадзи и эм. Сылöн лирическöй гижöдъясыс йиджтысьöны сьöлöмöдзыд. Уна сьыланкыв гижö и комиöн. А тайö нин торъя сёрни. Öд коми кывбуртö колö кывны сьö-лöмöн. Босьтны кöть Ирина Ивановналысь "Чужанін" сьыланкыв, коді лоис Коми мулы аслыссикас кыпöн да öні юргö уна котырлöн репертуаръясын. А "Зарни ёль" ансамбльса сьылысь Виктория Пыстина петкöдчис тайö сьыланкывнас Финляндияын да Санкт-Петербургын. Сідзжö ёна вöрзьöдö быдöнлысь сьöлöмсö Ирина Чувьюровалöн "Чужан керка". Öд сиöма сійöс мамлы.
Кöть "Зöнзöвöйлы" уна во нин, но кадыс оз пöрысьты сійöс. Хорö вочасöн локтöны и томъяс. Сідз, дас во сайын локтіс том специалист Людмила Муравьёва. Татчöс сьылысьяслöн син водзын чужис и сылöн семьяыс. Сійöс коралісны, сетісны верöс сайö да важся коми войтырлöн традицияяс серти ворсісны кöлысь. Весиг нöбасигас нин Людмила эз эновтлы сценасö, а сэсся кутіс волывлыны репетиция вылö кагаыскöд нин. Ичöтик Катюша векджык узис коляскаын "Зöнзöвöйлöн" сьылöм улын. Öні нывка велöдчö коймöд классын да волывлö сьывны "Потешки" ансамбльö. А сэсся бöрынджык вуджас и "Зöнзöвöй" хорö.
Дерт, и Выльгортса сьылысьяслöн тырмö тöжд-майшасьöмыс. Талун хорлы колöны выль костюмъяс. Но кыдзи и век, абу позянлуныс, культура вылö сьöмсö этша вичмöдöны да. Абу и асланыс транспорт. Гастрольясöн удайтчö ветлöдлыны сöмын хормейстерлöн зільöмöн.
–Сэк жö нинöм вылö видзöдтöг ми сьылам. Ме аттьöала ставнысö, кодъяс сьылöны да кывзöны менсьым сьыланкывъясöс, – шуö Ирина Ивановна. – Сиа асланым хорлы кузь нэм. Öд сьыланкывтöг, кыдзи и радейтчöмтöг, сьöкыд овны свет вылас. А ми ваям йöзыслы нимкодьлун.
Миянлы кольö сöмын нимкодясьны Ирина Чувьюровалöн творческöй корсьысьöмъясöн да шедöдöмторъясöн. Регыд чужас Сыктывдінса композиторъяслöн сьыланкывъяса выль диск. Сійöс нимöдöмыс, дерт жö, лоас и Ирина Чувьюровалы, и Михаил Оверинлы, и "Зöнзöвöй" хорса сьылысьяслы ыджыд праздникöн.
