Коми войтыр важысянь овмöдчылöмаöсь Печора, Эжва, Емва, Мозын юяс пöлöн. Сэтчöс вöр-ваыс вöлі озыр быдсикас зверь-пöткаöн. Ю-тыын уяліс уна пöлöс чери. Яренск уездлöн 1608 вося пасъялан небöгын паныдасьлöны мойяс да мукöд дона пемöс йылысь гижöдъяс.

XIV нэм заводитчигöн Иван Калита ыстывліс ассьыс войтырсö Печора ю бердö судзöдны кыйсян варышъясöс. Сэки Вылыс Эжваса, Емваса, Удораса, Чилимдінса да Изьваса кызвын войтырыс кыйсьöм-вö-ралöм тшöт весьтö и овлісны. Иван Грозныйлöн тшöктöм серти Яков Строганов 1573 воын ньöбис коми вöралысьяслысь низь да мукöд дона зверь куяс. Бöрынджык воевода Елизарий Корсаков Емва бердса олысьяслысь ньöбис сюрс ур да уна сьöдбöж ку. Коми муысь дона куяссö вайлывлісны эз сöмын Москваö, но и Россияса мукöд гырысь карö.

Дона куясöн вузасян ярмангаяс сэки вöліны Великöй Устюгын, Сольвычегодскын, бöрынджык Яренскын, Перымын да весиг Изьваын. XVIII нэмын кутісны нимавны Усть-Сысольскса ярмангаяс. Мозын да Вашка юясбердса олысьяс вузасьлісны лэбач-пöтка яйöн да чериöн Важгортса ярманга вылын. Эжва вылын Усть-Сысольскса промышленник Попов кыйліс уна стерлядь. Эжва да Войвыв Двина юясысь кыйöм ловъя стерлядьсö нулывлісны Петербургö. Коми вöралысьяс медъёна кыйлісны ур. Тайö зверь куыс и вöлі налы сьöм пыдди. Куим ур сулавліс öти кöпейка. А Вылыс Эжваса да Печораса олысьяс ассьыныс кыйдöснысö вузавлісны Чердыньса купечьяслы.

Эжва бердса олысьяс вöралöмысь öтдор вöдитісны му-видз. Вöралöм да му вöдитöм вылö пайыс воліс öтмында. Но XX нэм заводитчигкежлö вöралöмлöн тöдчанлуныс пондіс чинны. Сиктъяскöд орччöн бур вöрыс колис пыр этшаджык и этшаджык. Сыысь öтдор уна вöр да му вöліны Строгановъяслöн, купеч Сухановъяслöн, мукöд промышленникъяслöн киясын. Сэні асныравны эз позь.

Коми-зыряналöн вöраланінъясыс вуджлісны батьяссянь пияныслы. Коми войтырлöн оласногын тайö вöлі зэв тöдчанатор. Öти семьялöн мукöддырйи вермис лоны некымын вöралан керка чериа ты-юсянь неылын. Кыйсян угоддьöяс паськöдчылісны гортсянь 50 да унджык километр сайын вöрса ю йывъясын.

Вöралан керкаясыс вöліны пöшти öткодьöсь. Керкасянь неылын сувтöдлісны сёян-юан да прöмыс видзан амбар. Шулісны татшöм амбаръяссö эз öтмоза. Сыктыв районын да Вылыс Печораын вöлі "кум", Эжва бердын — "тшамъя", Емва вылын — "лабаз", Вашка вылын — "туруш". "Тшамъясö" тшуплісны метрöн-джынйöн пасьта да метрöн-джынйöн кузьта. Срубсö сувтöдлісны нёль сюръя вылö мусянь кык метр вылнаö. Амбарö пырöм могысь вöчлісны неыджыд öдзöс. Мукöддырйи и öдзöсыс эз вöв. Пырöм могысь перйылісны джоджсьыс öти плака. Кайлісны сэтчö керйысь вöчöм сод кузя, коді куйліс орччöн му вылас. Татшöм амбарас эз вермыны пырны ни зверь, ни шыр да весиг ош. Амбарсö кутысь керъяссö сюйлісны пыдö муас. Вöр керкакöд орччöн вöралысь гижтыліс ассьыс рöдвуж пас.

Вöр керкасянь нюжалісны муртса тöдчысь чöс, лэч, нальк туйяс. Кузьтаыс налöн эз вöв öткодь. Ставыс сы сайын, ыджыд-ö угоддьöясыс, ёна-ö ылöдз вермылісны ветлöдлыны вöралысьяс, налöн пияныс да внукъясыс. Öткымын вöралысьлöн угоддьöясыс паськöдчылісны вит сюрс гектарöдз. Татшöмъясас бать кыйсьыліс пияныс-кöд, матыссаясыскöд. Батьыслöн кулöм бöрын угоддьöяссö юклісны ас костаныс пияныс. Но мукöддырйи приданнöй пыдди пай сетлісны и нылыслы. Угоддьöлöн кöзяиныс вермис козьнавны либö вузавны сійöс, но векджык кольліс аслас пияныслы. Вöралан ордымъяс вузавлісны да ньöбавлісны уна йöз дырйи, но некутшöм гижöда пасйöдъястöг.

Йöз октасъясын эз позь кыйсьыны. Вöр керкаысь эз позь вöрзьöдны капканъяс, мукöд вöралан кöлуй. Вöралысьяслысь тайö гижтöм законъяссö торкалöмысь накажитлісны зэв стрöга. Со татшöм вöлі коми вöралысьяслöн аслыссяма оласногыс.

Вöралан кадсö юклісны кык пельö. Воддзаыс пансьыліс сентябрын да помасьліс ноябрь помын либö декабрь заводитчигöн. Мöдыс январь помсянь либö февраль пансьöмсянь нюжавліс март помöдз, кор заводитліс нин сывны лым. Сэки чарöм вывті позис воöдчыны гортöдз. Коми мулöн войвылын лунвылын серти вöралан кадыс вöлі кузьджык.

Тшöкыда коми вöралысьяс зверь-пöткаысь öтдор кыйлісны и чери, а арнас вотчисны. Та могысь найö арнас катлісны пыжöн гöтыръясныскöд, кодъяс вöр керка дорын кыйлісны чери, вотлісны тшак да ягöд. Сэсся нывбабаяс кынмавтöдз на бергöдчылісны гортаныс. Аскöдныс нулісны кыйöм нин прöмыссö, тшак да вотöс. Арся вöралан кад помасьöм бöрын и ачыс вöралысь даддьö сöвтöм прöмысöн бергöдчыліс гортас.

Тöвнас вöралысьяс кыйисны сьöдбöж, тулан, руч, кöч, а тундраын — кынь. Мукöддырйи öтвылысь чергöдлісны йöраöс, а яйсö юклісны.

Коми-зыряна важысянь кыйсисны уна ногöн. Лэбачьясöс кыйлісны везйöн, кöчьясöс — петляöн. Наысь öтдор пуктавлісны дзуг, лэч, нальк, кляпча. Бöрынджык нин лоисны пищальяс. Чери кыйлісны тывйöн, гымгаöн. Тывсö кузь тöвся рытъясö кылісны гöтыръясыс. Кыйсисны сідзжö кыснанъясöн, продольникъясöн. А ёна важöн, кор чериыс уна на вöлі, кыблісны азьласöн.

Кольöм нэмлöн ветымынöд воясö ме ачым кыблі. Сэк кежлö колö бура дасьтысьны. Заптыны кос сирöд пес, сюмöд. Азьласыс векджык вöлі кык пиня да помас мыйкö вугыр сяма. Татшöм ногöн черисö кыйöны и Войвылын олысь мукöд войтыр: карелъяс, ханты, манси, ненечьяс, саамъяс.

Комиын йöзыс векджык овмöдчылісны юяс пöлöн. Вöр керкаяс сідзжö кыпöдлісны вадорын. Со и ёнджыкасö вöдитчылісны пыжöн, паромöн, пурйöн. На отсöгöн кылöдлісны турун, пес, вайлісны вöралан прöмыс, ветлывлісны тшак-вотöсла.

Ветки пыжъяс вöчлісны пипуысь. Шöр да Улыс Печора вылын, Эжва да Мозын юяс бердын вöдитчылісны мегыра пыжъясöн. Налöн кузьтаыс волывліс вит-квайт метрöдз. Татшöм пыжъясас позис сöвтны 400-500 килограмм груз.

Неуна окота висьталыштны коми-зыряналöн оланінъяс йылысь. Сиктын керкасö тшуплісны помечöн. Медводз сэтчö овмöдчылісны öти рöдысь петлöм войтыр. Уналаын сикт-грездъяссö шулöмаöсь налы подув пуктысьяслöн нимъясöн. Шуам, татшöмъяс лыдын Закар-Вань, Еремей грездъяс. Печора вылын öти грезд шулöмаöсь Гришеставöн. Сійö висьталö, мый тайö грездас овмöдчылöмаöсь тайö рöдсьыс став войтырыс.

Керкаяссö тшуплісны уна ногöн. Миян пöль-пöчьяслöн медся важъяс лыдын вöлі ичöтик öшиньяса сруб. Пытшкöсас тэчлісны изйысь гор. XIX нэмын-XX нэм заводитчигöн кутісны стрöитны квайт пельöса керкаяс, а сэсся и шöрас посводза тöвся да гожся керкаяс. Мукöддырйи орччöн кыпöдлісны кык сруб, на костын вöчлісны посводз. Татшöм керкаясыс и талун паныдасьлöны Изьва, Мылдін, Удора районъясын. А изьвасаяс стрöитöны кык судтаа керкаяс.

Керка пытшкöсса стенъяссö джынйöдзыс лöсавлісны, а выліджык керъяссö сідзи и кольлісны. Пöтöлöксö вевттьылісны шöри поткöдöм керъясöн. Пачсö тэчлісны пу подув вылö пыран öдзöссяньыс шуйгаладорас либö веськыдладорас. Ен пельöсын сулавліс пызан. Пыран öдзöс весьтас вöчлісны пöлать. Стенъяс пöлöн сувтöдлісны пу лабичьяс. Пачсянь паныд стенлань нюжöдлісны сёр. Пач саяс вöлі гöбöчö пыран öдзöс. Гöбöч вывсö вевттьылісны пöвъясöн. Гöбöчö пыранінсö сідзжö вöчлісны пöвъясысь.

Керкаяссö тшуплісны ниа пуысь, пожöмысь, а Печора бердын весиг сус пуысь. Керсö пöрöдлісны тöвнас либö водз тулысын, кор пуяслöн эз на пет сöзыс. Керкаяссö кыпöдлісны некутшöм подувтöг. Бöрынджык пельöсъясас кутісны пуктыны изъяс. Лапаöн кутісны тшупны XX нэмлань нин.

Коми войтыр стрöитчöм водзвылын зілисны бöрйыны керкалы бур места. Вайлісны вöрысь сюмöд дозйöн кодзувкотъясöс. Керка местаыс кö бур, кодзувкотъяс кольччасны овны. А оз кö шогмы овны, пышъясны сюмöд дозйысь да нуасны аскöдныс вайöм лыссö. Керка сруб кыпöдöм могысь коми войтыр эз пöрöдлыны кык йыла да косьмыны заводитöм пуяс. Тшупан кö пö керкасö косьмыны заводитöм пуысь, сэні олысьясыс сідзжö кутасны висьны да косьмыны. Матича кер пуктöм водзвылын сэтчö вöчлісны пытш-кöссяньыс паз, кытчö пуктылісны эзысь сьöмпас, вурун да шабді зудöс. Медым пö выль олысьяс пыр вöліны озырöсь сьöмöн, скöтöн да няньöн. Сідзжö уна туналöмтор вöлі пач тэчигöн, выль керкаö овны пыригöн.

Сикт-грездъясын некор эз öшöдлыны кильчö öдзöсö томан. Кытчöкö мунігöн сöмын сувтöдлісны öдзöс водзас карнан либö гöлик.

Коми войтыр гортын вöдитчан уна сикас кöлуй вöчлісны асьныс. Печкисны вурун, кылісны джодждöра, тывъяс, кепысьяс, бадь ньöрйысь кöрзинаяс, сюмöдысь туисъяс, пестеръяс, гындісны гын сапöгъяс, песісны ку. Усть-Сысольскса уездын XX нэм заводитчигкежлö вöлі кучик вöчан 15 завод. Быдын песлісны вонас гортын видзан скöтлысь 1.000-3.000 ку. Изьва районын 1900 воын вöлі няр вöчан 62 завод, кöні уджалісны 230 морт. Кöр куясысь аньяс вурисны пими, малича, мукöд паськöм.

Сійö кадö коми войтыр торъялісны асланыс зільлунöн, веськыдлунöн, öта-мöдлы отсöг сетны дасьлунöн, писькöслунöн. Найö пыр зілисны венны быдсикас сьöкыдлунсö, вöліны зэв вежавидзысьöсь. Вöр-вакöд орччöн олігöн найö босьтлісны аслыныслы буретш сы мында, мыйта колö вöлі семьянысö вердöм могысь. Тадзи тöждысьлісны асланыс чужан мулöн аскиа лун вöсна. Коми войтырöс позьö шуны вöр-валöн челядьöн, кодъяс пöся радейтісны ассьыныс чужан мунысö. Кыдзи пасйыліс ас кадö композитор Александр Осипов Г.Дехтяревлысь "Гроза над Усть-Куломом" опера донъялігöн, коми войтыр некор эз надейтчывны кодкö вылö, эз ойзывлыны да норасьлыны нелючкияс вылö. Войвылын сьöкыд олöм-вылöмыс велöдіс найöс бергöдчыны асланыс вынъясöн. И мед жö эськö коми йöзлöн оласногысь медся ыджыд бурторъясыс колясны и водзö вылö.