Сöветскöй Союзса Герой лётчик Алексей Маресьев йылысь, дерт жö, ставöн тöдöны. Борис Полевой гижліс "Повесть о настоящем человеке" книга, а сэсся ыджыд экран вылын петкöдлісны татшöм жö нима кинофильм. Алексей Петрович – шензьöдана морт. 1942 вося апрельын сылöн самолётыс öзйöма да усьöма вöр шöрö. 18 лун да вой петöма фронтлань. Сиктса йöз сійöс аддзöмаöсь. Но лётчик кыкнан коксö кынтöма. Медым эз заводитчы гангрена, госпитальын кок лапаяссö лоöма вундыны. Но и сэки ловнас абу усьöма. Протезöн велöдчöма выльысь ветлöдлыны. И бара на пуксьöма самолётö да тышкасьöма вöрöгкöд. Коктöм Алексей Маресьев уськöдöма сьöд креста нёль самолёт.
И Комиын талун, вöлöм, эмöсь жö татшöм йöзыд, кодъяс оз чегсьыны, некутшöм сьöкыдлунысь ни мытшöдысь оз повны. На лыдын – Тöрöяг посёлокысь Николай Прокушев. Асьнысö геройöн оз лыддьыны. Но буретш татшöмъясыс, чайта да, и лоöны мукöдыслы, торйöн нин томуловлы, ловъя примерöн.
ОШ КЫЙЫСЬ
Сыктывдін районса Тö-рöяг посёлокын кызвын мужикуловыс арбыд келалöны-вöралöны матігöгöрса пармаын либö вуграсьöны Пожöг юын. Быдöнлöн, кыдз шуласны, аслас ордым. Но Тöрöягын öти мортöс дзик ставöн пыдди пуктöны. Тайö ош кыйысь Николай Прокушев. Сылы муртса на 43 арöс, а талун посёлокас олысьяс пиысь сійö медся уна варгыль кокаöс лыйлöма. Содтöд дас сайö йöра кыйлöма.
Сылысь керкасö пыр жö индісны. Да и сорасьнысö зэв сьöкыд: потшöс бокас сулалö "Буран", кильчö дорас куйлö лайка...
Муртса на воськовтан порог вомöн, а син водзын нин ош куяс, кодъясöн вевт-тьöма диван-креслö, паныда стенмас — сьöла-чукчилöн мыгöръяс. Джаджйын — ыджыд сир юр. Ловъя дырйиыс, гашкö, пудъя вöлöма да. Понлöн кодь пиньяса вомсö жергöдöма-паськöдöма.
Ачыс кöзяин нюмъёвтöмöн паныдалö воысьясöс, пырöй пö, пырöй. Да вöчö некымын воськов. И сöмын сэки казялан, мый повтöм ош кыйысь чотö. Николай Вениаминовичлöн öти кок пыддиыс — протез.
ПИСЬКÖС ДА ЗİЛЬ
— Ме тані, Тöрöягын, и чужи да быдми. Комиын, чайта да, тайö медся гажаиныс. Велöдчи посёлокса школаын. А 9-öд да 10-öд классъяссö помалі Выльгортын нин. Та бöрын пыри юркарса 8 номера училищеö. Зэв окота вöлі лоны электрослесарöн, — висьтасьö Николай Прокушев.
Дерт, Тöрöягын сэки олöмыс пуöмöн пуöма. Лесопункт, а сылöн вöлöма аслас подсобнöй овмöс, школа, детсад, клуб, лавка... Посёлокас этша вылö олöма 1.000 морт. Син водзын райын кодь олöм-уджыс другöн вежсьöма, кор странаын вужйöдöмаöсь рынок. Мый вöчны? Тайö юалöмыс сэки уналы войнас узьны абу сетöма. Семья, челядь... Кы-дзи сьöм нажöвитны? Уджыд со абу.
Николай Прокушев пыр зільöма ас вылö надейтчыны. Бать-мамыс тадзи овнысö велöдöмаöсь. И сиктса том морт абу шöйöвошöма, куйлысь из улö ваыд пö некор оз письт. Заводитöма корсьысьны. Медасьöма Печора вожса бурöвöйö. Квайт во уджалöма. Сійö кадас бура мынтысьлöмаöсь. Первойсö весиг самолётöн удж вылас лэблöмаöсь. Билетсьыс да весиг и столöвöйын сёйöм-юöмысь предприятиеыс вештысьлöма. Но вочасöн век жö заводитöмаöсь дзескöдны уджалысьясöс. Тöжд-мог пö содö, а нажöтка чинö...
Том морт бара аддзö выль удж. Ставыс быттьö бур. Виччысьтöг суö ускöттьö. Комын арöсын Николай Вениаминович кольö кок пöлаöн. Но и та бöрын сьöлöмыс ни этшыс абу чорзьöма. Мукöд моз абу сетчöма юöм-кодалöмö. А талы примерыс син водзын лыдтöм-тшöттöм: кымын пöрнöй мужичöй, зіль да уджач, дзикöдз лэдзчысисны... Татшöмъяс пи-ысь унаöн нин важöн абу ловъяöсь.
Николай Прокушев пиньсö мурч курччöмöн заводитöма корсьны олöмыслысь выль нырвизь. Бöр локтöма чужан Тöрöяг посёлокö да тані медасьöма связистö. И сы водзö сувтöдöм могъяссö збыльмöдö — посёлокын телефон йитöдыс уджалö.
Дерт, овны öні абу кокни. Но сьöкыдлунысь сійö некор абу повлöма. Öні гортас öтнасöн олö. Гöтырыс, Надежда Семёновна, уджалö карын. Сöмын шойччан лунъясö волывлö Тöрöягö. Лена нылыс велöдчö Санкт-Петербургын.
АС МУЫН ДА ПАРМАЫН
Казялі, Николай Вениаминович зэв пöся сёрнитö вöр-ва йылысь. Сиктса морт став сьöлöмсяньыс радейтö и пармасö, и Пожöг юсö. Öнöдз на казьтылö важся оласногсö, кор Комиын эз гусясьны ни ылöдчыны. Вужвойтыр эз тöдлыны томан. Дзик на неважöн ыджыдалöма... сöвесьт. Пожöг ю берегын пыжысь моторсö абу перйылöмаöсь, и бензин бакыс сэні жö сулавлöма.
—Ар дасын заводиті сьöла-тартö лыйны. Батьöй, Вениа-мин Степанович, Ыджыд войнатö ставнас вуджис. Гортö воöм бöрын ружьетö киас сэсся эз босьтлы нин. Умтöдзыс, буракö, лоöма, — казьтылö Н.В.Прокушев. — Вочасöн "сираси". Но кыйсьöмыс абу сöмын виöм-бырöдöм, а талун ёнджыкасö шойччöм, вöр-ваöн нимкодясьöм. Пöткаыс син водзын быри-воши. Эскöй кöть эн, а кольöм арнас ош весиг кытчöкö воши. Газетъясын тай вöлі гижöны, Сыктывкар дорын пö уна чукöрмöма...
ГУСЬЫС ЧЕПÖСЙÖМА
Николай Прокушев радейтö туявны-кыйны пармаса кöзяинтö. И та могысь видзö отсасьысьясöс – лайкаясöс. Бöръя ошсö аддзöма понйыс. Ноябрь. Лымъя нин, но ывлаыс шоныд. Ружьесö сьöрсьыс абу босьтöма. Рöч вылысь казялöма кок туй. И тайö здукас нёль кока ёртыс заводитöма увтны. Матыстчигас нин гöгöрвоöма, мый сэні ош гу. Кöзяинсö аддзöм бöрын лайкаыс тайкö пытшкас чеччыштас. Öдва удитöма кинас кватитны-кутны. Бöрыньт-чигмозыс казялöма: зверыс гуас куйлö...
Гортас воöм бöрын карын олысь ёртъясыслы юöртöма, босьтöй пö лицензия, аддзи ош гу.
Вежон помас шуöма ветлыны да видзöдлыны, друг да варгыль кокаыд муніс. Ывлаыс со шоныд да. Сідзкö, зверыд прамöя оз на нускы-узь. "Буранöн" мунöма тöдса веретяöдз. Лайкасö кöртыштöма даддяс, мед оз мешайтчы. Ружьеыс киас, лабутнöя да видзчысьöмöн матыстчöма гу дорö. Радлыштöма, узьö на пö... И тайö здукас ош лыйыштöма-чеччыштöма гу вомсьыс веськыда вöралысь вылö. Быть пö лоис шковгыны ружьеысь.
Матігöгöрса яг-раскыс да Пожöг юыс öнöдз на вердöны. Зверь-пöтка, тшак-вотöс, чери... Век нин пызан вылö содтöд вöлöга. И миянöс Николай Вениаминович чöсмöдліс комöн да тшак- варенньööн.
ЗАРНИ КИА
Выльгортса шöр школаын на велöдчигöн зон библиотекаысь босьтöма "Таксодермия птиц" книга. Помсяньыс помöдз ставнас сійöс лыддьöма. И сьöлöмöдзыс йиджöма. А, гашкö пö, тшöтш видлыны да? Медся сьöкыдыс вöлöма корсьны-ньöбны колана сорасъяссö, мыйöн кусö весалöны да возйысь видзöны. Сэсся лыйöма ур, кульöма кусö... Вой шöрöдзыс сэки ноксьöма зонка. Асывнас гортса-ясыс шай-паймунöмаöсь: стенмас пукалö... ловъя ур.
Вочасöн зверь-пöтка мыгöрыс содöма, тшöтш и лэбачьясыс. Медъёна чуймöдіс öти пöтка: дзик быттьö чукчи, но мыйлакö ичöт. Абу-ö тайö дозмöрлöн да тарлöн пи?
—А сійö, дерт. Татшöмсö некымынöс мойвиліс пон улысь лыйны. Первойысьсö весиг чуймыштікодь, мися, буракö, абу быдмöма пöткаыс. Мöдсö киö босьтöм бöрын видзöдласöй вежсис. Сэсся книгаясысь на йылысь лыддьывлі. Но ас синмöн аддзылі, кыдзи лёк тулысын кöндозмöрыс тапикасис тар койт вылын. Сэки пукалі чомйын. Поводдяыс сійö тулысын вöлі омöль. Да и матын эз вöв дозмöр койтыс, — висьталö вöралысь.
