"Коми му" газетлöн воддза номерын ми неуна тöдмöдім Коми Республикаса опера да балет театрын Японияса йöктысь Мина Окумуракöд. Талун сы йылысь лыддьöй паськыдджыка.
Чуньыс абу тэрыб, а кокыс печласьö
Чужлöма Мина Японияса Исикава карын. Вит арöссянь нывка велöдчöма ворсны фортепианоöн. Мöвпалöма лоны нималана пианистöн. Но сылöн абу бура артмöма. Шуö тай, чуньясöй пö оз тэрыба котравны. Но регыд Миналöн дум-кöсйöмыс вежсьöма. Öтчыд Исикаваö гастрольöн волöмаöсь Россияысь артистъяс. Петкöдлöмаöсь "Лебединое озеро" балет. Бать-мамыскöд Мина ветлöма жö сійöс видзöдны. Нывкалы сэтшöма воöма сьöлöм вылас налöн ворсöмыс, мый аслыс окота лоöма велöдчыны – буретш "Лебединое озероын" йöктыны.
–Пыр жö и кори бать-мамöс нуöдны балет школаö, – казьтылö Мина Окумура. – Исикаваын государственнöй хореографическöй велöдчанінъяс эз вöвны. Сöмын асшöр школа. Йöктыны велöдіс роч морт.
Мина öтпырйö и фортепианоöн ворсöма, и йöктöма. Но сьöлöм сертиыс ёнджыка балет вöлöма. Сэки нывка рочнас абу на сёрнитöма. Преподавательыс абу жö тöдöма япония кыв. Сёрнитöмаöсь вуджöдчысь отсöгöн. А мыйсюрö нывка и ачыс зільöма гöгöрвоны.
–Йöктöмыдлöн аслас кыв, буретш сійöс и колö гöгöрвоны, – шуö Мина.
Нималана пианист Мина Окумураысь эз артмы. Да сійö и оз шогсьы та вöсна. А со балетын Мина – "кодзув".
Япониясянь Сыктывкарö
Школа помалöм бöрас Мина пырöма велöдчыны Ташкентса хореографическöй училищеö. Куим тöлысь мысти вуджöма Алматыö. Сэсся локтöма Перымын государственнöй хореографическöй училищеö. Буретш Перымас Мина Окумураöс и казялöма Коми Республикаса опера да балет театрысь шöр балетмейстер Любовь Сизова. Сійö вöзйöма локны уджавны Сыктывкарö. Мина абу пыксьöма.
Артмис, мый Японияын чужлöм нывлöн "кодзулыс" öзйис кöдзыд Войвылын. Сэки, квайт во сайын, Мина ни сылöн рöдвужыс эз тöдны, мый вöльнöй свет вылас эм Сыктывкар. Öтуввезйысь найö корсьöмаöсь Коми мулысь юркарсö.
–Дерт, мичаа сылысь "чужöмбансö" эг аддзöй. Мыччысис сійö меным, кор самолётсьыс петі, – висьталö ныв.
–И кутшöм сьöлöмкылöмъяс чужисны? Кöнкö мöвпыштін, кытчö ме вои? – юася сылысь.
–Эг повзьы. Ёнджыкасö думайті йöктöм йылысь. Дерт, майшаси, рочöн эг бура сёрнит да. Но челядьдырся кöсйöмöй вермис полöмöс.
Японияын да Комиын олöмыс, традицияясыс ёна торъялöны. Культуранад эськö позьö вочасöн тöдмасьны, велавны коми оласногас. Но 40 градуса тöвся кöдзыдад дзик пыр он велав. Миналы, дерт, висьталöмаöсь, мый кöдзыд, но сійö абу чайтöма, мый сы выйöдз.
–Чемоданын эськö вöліны шоныд кöмкот да куртка, но век жö татшöм паськöмнад эськö гегдалі. Тöлыс пуксис да, уджъёртъясöй пыр жö и козьналісны меным пими да пась, – висьталö Мина.
Öні Японияса балерина велалыштöма нин трачкöдчысь кöдзыдъяс дорö. Куш кокас кöмалас гын сапöг да повтöг вермас петны ывлаö.
Радейтö ельдöг да пывсян
Медводз Мина тöдмасьöма Алёна Панюковакöд. Миналы сійö вöзйöма сувтны орччöн. Мыйлакö Японияса ныв чайтöма, мый сöмын Алёна зэв шань. Сы дорö сэсся и сибöдчöма. Öні коми да Японияса аньяс медся матысса пöдругаяс.
Комиöн Мина оз на сёрнит. Но коми балетын йöктылöма нин, "Яг-Мортын" ворсöма Райдаöс. Радейтö сійö нöкъя ельдöгöн чöсмасьны да жар пывсянын корöсясьны. Гоз-мöд во сайын волöмаöсь татчö и Миналöн бать-мамыс. Номсасьöмаöсь и коми йöзкост сёянöн. Сэтшöма жö кажитчöма нöкъя ельдöгыд. Дерт, и жар пывсяныд.
–Батьöс Алёналöн верöсыс сэтшöма корöсяліс, мый лабич вылас унмовсис, – сералö Мина Окумура.
–А Японияса вöлöга, шуам, суши ли роллы вылö оз номсöдлы?
–Оз. Ме найöс ог и радейт. Вежöй петö тоху вылö, а сійö тані абу.
–Ачыд он вöч?
–Дерт, пусьыла, но Японияын моз оз артмы. Тані вöлöгаыс абу свежöй да кöрыс оз сэтшöм ло.
Мусукыс—принц
Ичöтдырся кöсйöмыс Миналöн збыльмöма – йöктöма "Лебединое озероын". Дерт, медводз йöктöма юсьясöс кордебалетын. А кык во сайын сылы мойвиöма ворсны Одеттаöс и Одиллияöс.
–Кор меным сетісны рольсö, нимкодьöйла лов вылын быттьö бобувъяс лэбзисны, –казьтылö Мина. – Сэсся ме тані и Жизельöс йöкті. А öні мöвпала "Спящая красавицаын" Аврораöс ворсны.
Миналöн тані эм радейтана зон. Муслуныс налöн чужöма сцена вылын. "Лебединое озеро" балетын Мина да Вадим – принц да принцесса. Кольöм во найö йöктöмаöсь "Жизельын". Мина – сиктса нылöс, а Вадим – граф Альбертöс. На костын, кыдзи и балетын, ыпнитöма муслун.
–Альберт – граф. Но сійö висьтасис Жизельлы сиктса мортöн жö. Но кор ныв тöдмалö, мый Альбертлöн эм невеста, шогысла кулö. На костын радейтчöмыс оз кус. Альберт локтö мусаыслöн гу вылас да висьталö, мый век на радейтö... Эска, мый и ми Вадимкöд некор ог торъялöй, – нюмдіс Мина. – Ме сійöс став сьöлöмöн радейта!
Кевмысьö Енлы, а оз Буддалы
Кык во сайын Мина пыртчöма православнöй вичкоын, кöть и Японияын найö эскöны Буддалы. Опера да балет театрса артистъяс ветлöмаöсь гастрольöн Йошкар-Олаö. А сэні шöр изэрд вылас национальнöй художественнöй галерея весьтö öшöдöмаöсь аслыспöлöс часі. Тайö часісö Йошкар-Олаö воысь гöсьтъяслы мариечьяс быть петкöдлöны.
Часіас нёль öдзöс. Быд час мысти сэні ворсö вичко музыка. Тайö шы улас вылыс шуйга öдзöссьыс мыччысьö Ен мам öбраз. Сэсся бöр саймовтчö. Та бöрын улыс шуйга öдзöсöдыс петö осёл. Сійö мыш вылас нуö Богородичаыслысь öбразсö да пырö улыс веськыд öдзöсас. Та бöрын нин Ен мамыс мыччысьö вылыс веськыд öдзöсöдыс.
Тайö часіыс пö петкöдлö христианалысь эскöмсö, Мари му вылö осёл вылын Богородичалысь локтöмсö...
–Дерт, став тайö мичлунсö кывъясöн он вермы серпасавны. Колö ас синмöн аддзывны, – казьтылö Мина.– Буретш сэки и ыркмуніс сьöлöмöй. Окота лои вичкоö ветлыны. А сэсся и пыртчи.
–Енмыслы эскан?
–Да. Сійö меным отсаліс, лов вылын вöлі сьöкыд да.
–Весиг, колöкö, православнöй праздникъяссö пасъян, йиа йöрданын Ва вежöдан лунö мыссян? – водзö юася сылысь.
–Дерт, ог став праздниксö тöд да и молитва ог лыддьы. Но, шуам, Алёна пöдругакöд Благöвещенньö дырйи чери сёйим. А йиа йöрданад эг на пырав. А мый, Енлы эскысьясыс збыльысь сэтчö сунгысьлöны? – чуймис Мина.
* * *
Öні Мина Окумураöс бура нин тöдöны миян балет радейтысьяс. Тшöтш и Россия пасьтала да суйöр сайын. Сöмын нималö сійö оз кыдз Японияса балет йöктысь, а Комиысь балерина. Сійö петкöдчыліс "Встречные ветра", "Лебединое озеро", "Жизель", "Яг-Морт" да мукöд балетын.
Гöгöрвоана, балериналöн "пенсияыс" водз воö. Уна вылö 35 арöсöдз йöктöны. Водзö вылö Мина мöвпалö восьтыны Японияын балет школа. Велöдчö тшöтш вуджöдчысьö.
–Анастасия Волочкова моз пасьтöг ог пöрччысь, – шуис Мина Окумура.
