Талун Коми Республикаса учёнöйяс асланыс корсьысьöмъясын оз овны удж кузя ёртъяссьыс торйöн. Найö кадысь кадö висьтасьöны Россияын да суйöр сайын мунысь уна лыда съездъяс, симпозиумъяс, конференцияяс вылын, ветлывлöны научнöй могъясöн суйöрсайса странаясö. На лыдын и геологъяс, и филологъяс, и биологъяс. Со и неважöн Ливияысь гортас воис Коми наука шöринысь Геология институтса старшöй научнöй сотрудник, геолого-минералогическöй наукаса кандидат Владимир Сергеевич Чупров.
Владимир Сергеевич чужлöма-быдмылöма Изьва районса Сизяб сиктын. Бöрынджык бать-мамыс овмöдчöмаöсь орчча Бакурö. Школаын велöдчигöн на кöсйöма лоны геологöн. Ассьыс мöвпсö сійö збыльмöдіс. Свердловскса горнöй институтлысь (öні Уралса горно-геологическöй академия) геофизическöй факультет помалöм бöрын 1995 воö локтіс уджавны Коми наука шöринса Геология институтö, кодöн сійö кадö нин веськöдліс öні нималана академик Николай Павлович Юшкин. А 2002 воын дорйис наукаса кандидат ним вылö диссертация. Сылöн корсьысьöмъясыс вöлі йитчöмаöсь Коми Республикаса войвыв районъясын да Ненеч автономия кытшын мусирлысь да биарулысь куй-лöдъяс тöдмалöмкöд.
А сэсся Владимир Чупровöс корисны уджыштны суйöр сайын. И 2009 вося мартсянь 2010 вося апрельöдз учёнöй отсаліс корсьны мусирлысь да биарулысь озырлунъяс Ливияын.
—Средиземнöй саридз берегъяс пöлöн меститчöм тайö странаыс Африкаын медся озыр мусирöн да биаруöн, — висьталö Владимир Сергеевич. — Сейсморазведчикъяслöн туялöмъяс бöрын ми стöчмöдім да индалім, кöніджык колö писькöдны мупытшкöсса скважинаяссö. Ливиечьясысь да рочьясысь öтдор миянкöд öтлаын уджалісны Францияысь да Англияысь специалистъяс. Но уджъясыс нюжалісны да медводдза скважинасö вöлі писькöдöмаöсь сöмын тавося январь 30 лунö.
И со Ливияысь локтöм бöрын нин тайö странаас заводитчис революция, мый ёна чуймöдіс Владимир Чупровöс. Сійö оз ёна эскы телевизор пыр висьталöм выльторъяслы. Учёнöйлöн кывъяс серти, Ливияас революциясö котыртісны ортсысянь. Ливиечьяс таöдз олісны бура. Зык-шумсö налы вöлі кыпöдны нинöмла. Африкаса мукöд государствоясын серти тані олысьяслöн нэмыс ёна кузьджык. Триполи юркарын бомжъяс да корысьяс абуöсь. Быд семьялöн некымын машина. Бензин литрыс миян ногöн 4-5 шайта. Машина ньöбигöн государство мынтö джын донсö. Семьяысь кык челядьлы позьö велöдчыны дон босьттöг суйöрсайса вузъясын. Оланінъясысь сідзжö оз ков мынтыны некутшöм сьöм. А кöлысь ворсысь том гозъялы козин пыдди сетöны 60 сюрс доллар. Уджтöмалöмысь мынтöны тöлысьнас 700 доллар. Сэк жö став сьöкыд уджсö странаын вöчöны Египетысь, Тунисыс, Суданысь, Чадысь да мукöд странаысь воöм гастарбайтеръяс.
Но ставыс тайö колис нин бöрö. Талун странасö бомбитöны НАТО-лöн самолётъяс. Правительстволöн войска тышкасьöны оппозициякöд. Кыдзи пасйö В.С.Чупров, веныс вермис кыптыны торъя племяяслöн öта-мöд костаныс лöсявтöмлун вöсна. Сэсся и Ливиялöн озырлунъяс вылö вежыс петö сійö жö США-ыслöн, Европаса странаяслöн. А сы бöрын татшöм революцияясыс вермасны паськавны и Азияса да Африкаса мукöд странаясын. Зык-шум дугдывтöг пестігöн кокниджык веськöдлыны мирнас. Талань и синöны США-са веськöдлысьяс.
Сэк жö учёнöйлöн Ливияын олöм-вылöм да удж йылысь колисны медся бур казьтылöмъяс. Водзö вылö сійö лöсьöдчö гижны наукаса доктор ним вылö диссертация, коді йитчöма Тиман-Печораын мусирлöн да биарулöн геологиякöд. А öні мукöд учёнöйяскöд тшöтш дасьтö Коми Республикалöн 90 во тыригкежлö атлас, торйöн кö, сылысь геологиялы сиöм юкöнсö.
Владимир Сергеевич Сыктывкарын олігöн да уджалігöн оз вунöд и чужан Изьва районсö, Бакур сиктсö, кöні олöны сылöн мамыс Нина Ильинична, Светлана чойыс да Александр вокыс. Кадысь кадö ветлывлö сэтчö.
Нина Ильинична 1969 воын Коми пединститут помалöм бöрын пыр на велöдö Бакурса шöр школаын. Неважöн Владимир Чупров ветліс чужанінас чолöмавны мамсö сылöн олöмын гöгрöс пасöн. Учёнöй зэв ёна кöсйö, мед и ылі Изьва районын войтырыс олісны ёна бурджыка. Налысь олöмсö отсалас сöвмöдны выль туй, кодöс кöсйöны нюжöдны куим воöн Ухтасянь Чилимдінöдз Изьва пыр. Сійö йитас ылі районöс "ыджыд мукöд" да, дерт жö, бур боксянь тöдчас изьвасалöн олöм-вылöм вылö.
—Сэк жö и миян учёнöй-геологъяслöн корсьысьöмъясыс сідзжö кутшöмакö йитчöмаöсь ас войтырлысь олöмсö бурмöдöмкöд, — кывкöрталіс медбöрын ассьыс сёрнисö Владимир Сергеевич. — Комиыд озыр абу сöмын мусирöн да биаруöн. Некымын во нин республикаын перйöны миян геологъясöн аддзöм боксит руда. Удораын кутасны перйыны сотчысь сланечьяс, кодъясöс туялöмö ыджыд пай пуктіс миян Геология институтысь директорöс наука кузя вежысь Игорь Николаевич Бурцев. Мунö сёрни и зарни перйöм йылысь. Аддзöма сідзжö алмазъяс, мукöд озырлун. Дерт, ставсö тайöс колö на стöчмöдны. Мупытшкöсса озырлунъяс перйöмкöд тшöтш ёна бурланьö вежсяс и Комиын олöмыс. И зэв ёна кöсъя, мед öдйöджык помасяс Ливияын некодлы ковтöм зык-шумыс да сэтчöс войтыр бара кутасны овны тöлкöн-ладöн.
