Писькöс, зіль, водзмöстчысь... Ставыс тайö Пётр Цембер йылысь. Том морт луннас уджалö, рытнас – велöдчö...
Ас юрöн
Пётр чужöма-быдмöма Сыктывкарын. Велöдчöма 24-öд номера шöр школаын. Тшöтшъяяссьыс сійö нинöмöн быттьö абу торъялöма, зон кыдз зон. Но сэки нин быд воськолысь либö вöчöмторйысь Пётр кывкутöма. Тадз велöдöма батьыс, Георгий Валерьевич Цембер.
Весиг и школасö помалігас нин том морт стöча тöдöма, мый водзö кутас велöдчыны Коми государст-веннöй пединститутын физико-математическöй факультетын. И водзвыв дасьтысьöма. Та вöсна зэв кокниа пырöма тайö вузас. Велöдчöма окотапырысь. Но сэсся сылысь ёртъяссö босьтöмаöсь армияö.
И Пётр батьыслы шуöма, мый тшöтш кöсйö служитны. Пиук, бура пö та йылысь мöвпыштлы, вöзйöма батьыс. Верстьö морт, дерт, медводз думайтöма пиыслöн институтын велöдчöм йылысь. Пётр жö дзик мöд ног мурталöма. Öти-кö, аслас ёртъясысь абу кöсйöма кольччыны. Мöд-кö, армияын колö служитны. Весиг и институт помалöм бöрын, но сэки нин уска-тошка пöрнöй мужик веськалас 18 арöсаяслöн котырö. На бöрся пö котöртны-вöтчыны лоö, ок, сьöкыд. И Георгий Валерьевич Цембер абу вензьöма.
Командирыс бать пыдди…
Том морт мунöма военкоматö да вöзйысьöмöн вöзйысьöма, кöсъя пö служитны. Тадзи веськалöма радиотехническöй войскаö. Налöн часьтыс сулалöма Остров карын. Сійö Псковсянь 50 километр лунвылынджык.
—Ок и мича карыс. Великая ю юкö карсö кык пельö, а шöрас ді. Уна нэм сайын сэтчö кыпöдлöмаöсь форт, коді и дорйöма-видзöма карсö вöрöгъясысь. Буретш сэні и вöлі часьтным.
Медводдза квайт тöлысьсö радöвöй Цембер мукöд моз велöдöма Морзе азбука, вöлöма дневальнöйöн, збыльмöдöма мукöд мог. Командирыс казялöма кывкутысь да водзмöстчысь салдатöс. Сёрни бöрын индöма Комиысь зонмöс штабö да пуксьöдöма компьютер сайö. Öд Пётр сійöс ассьыс вит чуньсö моз бура тöдö.
Ёртъяс письыс кодкö весиг вежалöма, ок пö тэныд, Петя, и мойвиис: миян моз плац кузя оз ков стройöн восьлавны, лун и вой он зунясь аппарат дорын да наушник пыр кывзысь... Ставыс быттьö тадз, но и штабын уджыс юр выв тыр. Мукöддырйиыс сёр рытöдз ковмылöма пукавны...
—Ассьым командирöс öнöдз медся бур кывъясöн казьтыла. Миянлы, сержант-салдатлы, Павел Викторович Виложкин вöлі бать кодьöн. Чайта да, сыкöд биö кöть ваö уськöдчис эськö миян пиысь дзик быдöн. Öні тай ёртъяскöд, кодкöд öтвылысь служитім, кöсъям ветлыны Остров карö аддзысьлыны Павел Викторовичкöд, — висьталö вöвлöм салдат.
Уджалö дай велöдчö
Армияысь воöм бöрын сійö бара велöдчö пединститутын. Оз кöсйы пукавны батьыслöн сьылі вылас да, заводитöма уджавны, вузасьö юркарса сідз шусяна учколлекторын. А уджысь орöдчытöг босьтö тöдöмлун. И ньöти оз жалит. Ас кöшта вылö петöм бöрын бура тöдö сьöмлысь донсö. Ньöбöма нин аслыс "Нива" машина. И аскиа лунö дзик мöд синмöн видзöдö.
—Уджöй сьöлöм серти, вузала быд сикас чери кыян угоддьö, вугырсянь ботанöдз. Унаöн менö тöдöны нин. Та вöсна быд сикас корöмöн шыöдчöны. Верма кö, дерт, зіля отсавны. Вузасьысьлöн тайö — медшöр могыс, — эскöдö Пётр Георгиевич.
Квайт арöссянь вуграсьö
Прöст кадö том морт радейтö вуграсьны. Чери кыйнысö велöдöма батьыс. Квайт арöса писö Георгий Валерьевич босьтöма вадорö. Мыртыюын медводдзаысьсö вуграсьöмаöсь. Пётр вöйтöма табъя шатьсö. А чериыс мыйлакö оз дэбöд. Батьыс и чукöстöма, сэтöр коръя чай пö пузис, лок, юам. Нуръясьöм бöрын казялöмаöсь: Петя шатьыслöн табйыс абу. Детинка чашнитöма, а вугырсö, вöлöм, ньылыштöма ком. Та бöрын унаысь на ветлывлöмаöсь ю да ты дорö.
Чайта да, тані колö казьтыштны Георгий Валерьевич йылысь. Сійö пасйис, мый 1973 воö дугöдчöма курыд зелля юöмысь. Буретш чужöма медводдза пи. Ачыс аслыс шуöма, тырмас пö кодавны, кад нин лöсьöдны морт нога олöм. И öнöдз сійö вомас водка ни вина войт абу босьтлöма. Чери кыйöмыс лоöма сьöлöм личöдысь-кокньöдысьнас. Сійö жö воас ньöбöма "Прогресс" пыж да "Вихрь" мотор.
Уна во Г.В.Цембер кыйсьöма аслыспöлöс угоддьööн, сідз шусяна "балдаöн" — свинечысь вöчöм чай юан пань ыджда мормышкаöн, кöні кызьöд(!) номера вугыр. Сэтчö вöлöм самалö нёль-ö-вит нидзув. Ю шöртіыс, йир вылысладорсяньыс, пыжöн кылöдчö. Угоддьöнас ворсö тöвся кыснанöн моз, сöмын лабутнöйджыка. Георгий Валерьевич кыйлöма 5-8 килоа сиръяс. А öтчыд Нидз куръя улысладорысь шедöма 12 килограмма. Самсö кватитöма, но ёна абу пессьöма. Пемыд пыдöссьыс "Прогресс" пыж дорö кыпöдчöма, пиньыс понлöн кодь...
Бöръя воясö ая-пиа ветлöны вуграсьнысö Архангельск обласьтса Лена сиктö. Мöвпалöны ньöбны сэтысь керка. Пётр висьталö:
—Местаыс сэні зэв мича. Орччöн визувтö Эжва, неылын и важ Эжваыс... Гырысь и посни чериыс, майбыр, эмышт на. Но медся тöдчанаыс — вуграсьысьыс сэні этша.
