Кык тöлысь да джын чина войтыр велöдöмаöсь коми кыв. Татшöм курсъяссö Сыктывкарын квайтöдысь нин котыртöны. Тайö каднас коми кывйысь тöдöм-лунсö содтöмаöсь 166 морт, на пиысь 152-ыс – КР-са Госсöветысь депутатъяс, власьт тэчасъясын уджалысьяс.

Чинаясöс коми кывйö медводдзаöн босьтчöма велöдны Любовь Моторина, сійö жö и велöданноглы подувсö лöсьöдöма. Тамара Дружинина пыртöма тайö уджас мультимедийнöй выльторъяс. Бöръя куим курссö велöдöма Елена Коснырева. Сійö висьталö, котырыс пö, кодъяслы апрель 5 лунö сеталісны коми кыв велöдöм йылысь торъя эскöданпасъяс, вöлі медыджыдöн – 21 морт. Дас öтиыс на пиысь уджалöны министерствоясын да власьтлöн мукöд тэчасын. Ставныс найö быд лун паныдасьлöны коми йöзкöд, и кор пö чолöмасян чужан кывнас, мöд синмöн нин тэ вылö видзöдöны, восьсаджыкöсь лоöны. Тадзи и асьныс чина войтыр ёнджыка пыдди пуктöны коми войтырсö.

Любовь Будзанивская да Кристина Попова уджалöны Коми Республикаса бöрйысян комиссияын, ас кöсйöм сертиныс локтöмаöсь коми кыв велöдан курсъяс вылö.

– Ми топыд йитöд кутам журналистъяскöд, тшöтш и коми газет-журнал редакцияясын уджалысьяскöд, телевидениеын да радиоын коми передачаяс дасьтысьяскöд. И, дерт, вужвойтырлысь кывсö миянлы быть колö тöдны, – висьталö республикаса избиркомын мониторинг вöчан секторöн веськöдлысь Любовь Будзанивская. – Батьöй менам роч, а мамöй, Нина Изосимовна Зорина, – коми, и сійö да Сыктыв районса Поёлын олысь рöдвужöй зэв нимкодьöсь лоины, мый ме куті бурджыка гöгöрвоны найöс, и комиöн тшöтш сёрнитны.

Любовь Александровна висьталö, мый велöдчынысö найö чукöртчывлöмаöсь вежоннас кыкысь кык час кежлö, быд урок бöрын сетлывлöмаöсь гортса уджъяс, медым выльысь казьтыштны велöдöмторсö. Тшöктылöмаöсь и индöм сюрöс серти гижöд лöсьöдны, ас йылысь комиöн висьтавны. Бöрас вöлöма экзамен, кöні велöдчысьяс вочавидзöмаöсь вель уна юалöм вылö, лыддьöмаöсь кывбур, висьт лöсьö-дöмаöсь-гижöмаöсь. И, кыдзи пасйис курсъяссö нуöдысь Елена Коснырева, кызвыныс экзамен дырйи вöзйöм уджъяссö вöчöмаöсь бура, ёна зільöмаöсь-старайтчöмаöсь. Бур боксянь велöдысь донъяліс и Кристина Поповаöс, сылöн пö кывъяс велöдöмын тыдовтчис ыджыд сям, век лöсьыда дасьтысьліс быд урок кежлö. Елена Григорьевна торйöн пасйис, весиг пö Госсöветö бöрйысян кадколастö избиркомсаяс пыр волывлісны велöдчынысö. Збыльысь, бöрйысьöмыс кö эз веськав курсъяс нуöдан кадö, велöдчысьыс эськö унджык вöлі, сöмын избиркомсьыс квайтöн вöлöм кöсйöны коми кывйысь тöдöмлунсö содтыны. Налöн татшöм позянлуныс лоас на.

–Унаöн и асьныс вöзйы-сьöны велöдчыны, – тöдчöдіс Елена Григорьевна. – Сідз, тайö котырас дас морт оз уджавны власьт тэчасъясын. Журналистлы да öтуввезйын финн-йöгралы сиöм лист бок нуöдысьлы, пединститутын да медколледжын велöдысьяслы, Коми наука шöринысь учёнöйяслы да ичöт бизнесын зільысьяслы коми кывйыс чина войтырлы моз жö тшöтш удж вылас колö, музыкантлы содтöд тöдöмлуныс ковмöма коми сьыланкывъяс лöсьöдны, горт олысь аньлы – отсавны челядьыслы коми кыв урокъяс кежлö дасьтысьны...

–Чина войтырöс коми кывйö велöдан курсъяссö нуöдам государственнöй кывъяс йылысь оланпас серти, – пасйис курсъяссö помалысьясöс чолöмалігöн Коми Республикаса национальнöй политика кузя министр Галина Габушева. – И ме эска, мый тані босьтöм тöдöмлуныс ковмас тіянлы быдлунъя уджад.

Министр корис найöс юксьыны мöвпъясöн, мый нöшта колö бурмöдны курсъяс котыртігас. И ставöн öтув вочавидзисны, окота пö пыдісяньджык велöдны вужвойтырлысь кывсö. Дерт, та вылö тöдчымöн унджык кад ковмас, но эм кö кыв тöдны кöсйöм да коланлун, сюрас та вылö и кад да вын.