Сыктывкарса коми культура шöринö неважöн чукöртчылісны шмонитны радейтысьяс, кодъяслы апрель 1 луныс – праздник. Кöть эськö кодсюрöлöн, кыдз пасйис фольклор туялысь Олег Уляшев, быд лун "первöй апрель" – шмониттöг-ылöдчытöг луныс налöн оз коль. Öтияс пö ылöдчöны выгöда ради, мукöдыс – сідз. Олег, буракö, ставнас республикасö нин кытшовтіс, уналаö воліс, уна йöзкöд аддзысьліс. Эм мый казьтыштны и шмоньсорöн. Сійöс кывзігöн тай ставöн бурпöт сералісны.
Рытпукысьяслысь серам петкöдліс и нималана коми гижысь Владимир Тимин. Унаöн тöдöны сійöс кыдз шмонитны радейтысь мортöс. Владимир Васильевич казьтыліс аслас олöмысь тешкодь лоöмторъяс. Сідз, зэв на том пö вöлі, батьлысь юалісны: кытысь нö татшöм енбиа пиыс тэныд. А сійö и вочавидзöма: ог пö тöд, быдмигас тай нормальнöй вöлі-а, – серам петкöдліс гижысь.
Гижысьяс котырысь жö Анжелика Елфимова, зэв шмоньлив ань (эз öд весьшöрö сы дыра "Чушканзіын" зіль), лыддис серамбана кывбур.
Геннадий Юшковлöн гижöд серти неыджыд сценка петкöдлісны СГУ-ын велöдчысьяс.
Рыт вылын юргисны и сьыланкывъяс. Гитара улö сьылöмöн гажöдісны учёнöй Павел Лимеров (а шуöны, учёнöйяс пö жугыль йöз) да серпасалысь Степан Семяшкин. Сійö сьöрсьыс пыр новлöдлö ассьыс "фирменнöй" шляпасö, кодöс ачыс кыöма целлофан пакетъясысь, выліас гижöма "нарисую" да öшлöма значокъяс. Со и гаж вылö локтысьяс водзын ош-йысис аслас вöччöдчанторнас. "Райда" конкурсын "Катшасин" ним шедöдысь Нина Тарабукиналы "Трасича" сьыланкывйысь ёна жö клопайтісны.
Но медся ёна клопайтісны "кöвöэнщикъяслы". Найö петкöдлісны "Давай поженимся" телепередача серти сценка. Репетируйтны пö эг и слöймöй, тöрыт на лöсьöдім да, эн пö дивитöй, корисны ворсысьяс. А дивитнысö вöлі нинöмысь. Нуöдысьясыс быттьö нэмсö телевидениеын уджалöмаöсь. Турагентствоын öні зільысь Ганна Холопова ворсіс Гузееваöс, журналист Виктория Пименова Сябитова пыдди вöлі, а "Василисааліс" кывбуралысь Анжелика Елфимова. Найöс кöть талун драма театрлöн сцена вылö лэдз!
Нöшта Ганна Холопова висьтасис, кыдзи "Коми муын" зілигöн на уджъёртъясыскöд ветлöмаöсь Кулöмдін районö. Мед кузь туйсö "дженьдöдыштны", мунігас быдса "поэма" рифмуйтöмаöсь-гижöмаöсь. Сійöс и лыддис Ганна Холопова чукöртчысьяс водзын, мед тöдмöдны журналистлöн быдлунъя сьöкыд, но сэк жö интереснöй уджöн.
Серамсорöн рытыс коли тöдлытöг. Чукöртчысьясöс ворсöдісны тшöтш. А кодсюрö, медся шмоньливъясыс, гортаныс козинöн мунісны.
