Аски следовательяс пасйöны ассьыныс профессиональнöй праздник.

Сыктывкарса УВД-ын кызвын следовательыс нывбаба. Шуöны, мый налы кокньыдджык разьны мыж вöчысьыдлысь кывсö. Ассьыныс профессиональнöй сямсö эз нин öтчыдысь петкöдлыны кык чой Ольга да Татьяна Аксёноваяс.

БАТЬ КОК ТУЙÖД

Юстицияса подполковник Ольга Викторовна да юстицияса майор Татьяна Викторовна школаын велöдчигас кöсйöмаöсь мамыс моз жö лоны бурдöдысьöн. Весиг ветлöдлöмаöсь медсестраö велöдчан курсъяс вылö. Но мыйöн помалöмаöсь школасö, мунöмаöсь велöдчыны Уфаса юридическöй институтö.

—Кор чойкöд кутім мöвпавны, кöні миянлы водзö велöдчыны, бать вöзйис лоны юристöн. Ми сэсся весиг öти здук эг майшасьöй, — висьталö Ольга Викторовна. — Öд и батьным миян дыр кад вöлі колонияса начальникöн, а сэсся Княжпогост районса федеральнöй судьяöн. Вöлі кодлысь кок туйсö талявны.

Уфаса юридическöй институтын Ольга да Татьяна Аксёноваяс босьтісны юрист-психологлысь тöдöмлун. И кор бöр воисны Комиö, Сыктывкарса УВД-ö татшöм специалистъясыс эз ковны. Эз вöв местаыс и чужанінас — Княжпогост районын. Позис эськö вöзйыны ОМОН-ö. Но сэні зільысьяс тшöкыда ветлывлісны командировкаö Чечняö. Том специалистъяс-тö жалитісны да сэсся и ыстісны Ухтаö следовательясöн.

Буретш сэки и гöгöрвоисны Ольга да Татьяна Аксёноваяс, кутшöм сьöкыд уджыс следовательлöн. Кор туялан уголовнöй делöсö, мыйта кад сэтчö мунö: колö зэв уна йöзкöд сёрнитны, некымын экспертиза вöчны. Овлö, ковмылö и сёр рытöдз пукавны, шойччан лунъясö да праздникъяс дырйи зільны-мырсьыны. А медся сьöкыдыс — мыж вöчысьяскöд, доймалöмаяскöд да свидетельяскöд öти кывйö воöдчыны.

АНЬЫД "ПЫДÖДЖЫК КОДЙÖ"

—Ставсö тайöс, дерт, вочасöн велалан вöчны, — шуö Ольга Викторовна. — Но ме первойсö полі, мый ог сяммы мыж вöчысьяслысь колана ногöн юасьны. А тайö следовательлы медся тöдчана. Öд водзö туясигад вермас и сэсся колана ордымсьыс бокö кежны.

Медводдза уджсö, мыйö кутчысьöма Татьяна Викторовна, стöча оз помнит. Казьтыштіс сöмын, мый öти мужичöй пö пöрйöга документъяс вöчöма. Но том следовательлöн сэні ставыс бура артмöма, уджсö эштöдöма урчитöм кад кежлö.

А Ольга Викторовна бура помнитö.

—Öти мужичöй улич вылын чужъялöма аньöс, мыйысь нывбабаыд чорыда доймалöма да веськалöма больничаö, — казьтылö юстицияса подполковник. — Ме и туялі тайö лоöмторсö.

—А кодлы кокньыдджык сёрнитчыны мыж вöчыськöд, ань али мужичöй следовательлы? — юася налысь.

—Кыкнанныслы абу кокни, — вочавидзисны Аксёноваяс.

—Чайта, аньяс пыдöджык "кодйöны", — содтіс Ольга Викторовна. — Мужичöйлы öдйöджык дышöдö корсьысьнысö, а нывбаба сёр войöдз пукалас-зунясяс, но эштöдас. Тайöн, гашкö, торъялам ми да.

РОЗА БУКЕТÖН ЧУЖÖМАД

Следовательлöн уджыс сьöкыд да тшöтш и повны на лоö. Öд мыж вöчысьыд быдсямаыс эм. Кодсюрö сэтшöм асныраöсь, раммöдны найöс абу кокньыд. Мужичöй-следовательлы лоö виччысьны лёксьыс, а нывбабалы кутшöм?

—Тіянöс повзьöдлывлісны?

—Быдторйыс вöвлі. Мукöддырйисö звöнитчöны, грöзитчöны, виам пö. Но полан-дзöран кö быдторсьыс, уджад эн и кутчысь, — висьталö Ольга Викторовна. — Öтчыд öти мужичöй ёна и тешитчис ме вылын, кикимеритчис, грöзитчис и, кор следствиесö нуöді. Но век жö туялöмсö помöдз вайöді. Ёрдас нин сэсся шуис: "Пета дзескыдінсьыс, ньöба роза букет да чужöмад сійöн швачкöбта".

—Тшöкыда бöрыннас вочаасьланныд татшöмъ-ясыскöд?

—Ог тшöкыда, но вочаасьлам. Коркö базар вылын öти мужичöй менö тöдöма да горзö вöлі: "Ольга Викторовна, менö бытшкасьысь сутуга саяд эз пуксьöдны, условнö сетісны. Но ме сэсся ог кут гусясьны!" Веськыда шуа, вöлі нимкодь. Öд мортыс, видзöдöмпырысь, збыльысь бурланьö вежсьöма.

Татьяна Викторовналы тшöтш жö паныдасьлöны вöвлöм судитöмаясыс. Öти сідзжö ошйысьöма, мый лючки олö. Уджала пö и гöтраси нин.

МЫЖ ВÖЧЫССЯНЬ "КОЗИН"

Овлö, следовательяслы мыж вöчысьяс быдсямасö вöзйöны: уна сьöм, машина, патера да с.в. Мед сöмын бытшкасьысь сутуга сайö оз пуксьöдны. Татшöм "козинъяссö", дерт, и Ольгалы да Татьяналы вöзйылöмаöсь.

—Сэки Ухтаын на уджалі, — водзö казьтылö Татьяна Викторовна. — Öти том морт ёна пакöститчöма да гуся-сьöма. Мыйöн пані сы вылö уголовнöй делö, мамыс да адвокатыс менö "топöдісны". Медводз сьöм вöзйисны. Сэсся шуисны, бöрйы пö мотоцикл либö машина. Бöрыннас нин патера вöлі козьналöны.

Татшöма лышкыдасьысьясыскöд Ольга да Татьяна Аксёноваяс сёрнитöны крута. Налöн видзöдлас серти, бöрйин кö нин следовательлысь профессия, ло помö-дзыс сійöн, а эн небыд нямö-дöн. Батьныс на шулöма нывъ-ясыслы: "Верма ставсö тіянлы прöститны, сöмын предайтöм да взятка босьтöм ог!"

ЮБКАА ЗОНКАЯС

Чужлöмаöсь кык чой Татьяна да Ольга Аксёноваяс Княжпогост районса Емваын. Мыйöн сöмын школаас велöдчигöн абу ноксьылöмаöсь. Радейтöмаöсь спорт. Ворслöмаöсь баскетболöн, волейболöн, исласьлöмаöсь лыжиöн, лыйсьылöмаöсь пистолет-ружьеысь, туриста-лöмаöсь, катамаранъясöн ю кузя кылöдчылöмаöсь. Школаас найöс юбкаа зонкаясöн и шулöмаöсь.

Туристалігöн веськавлöмаöсь и неминучаясö. Приполярьеö ветлігöн Ольга Аксёнова усьлöма гöра вывсяньыс да изъяс костас сибдылöма. Сэки коксö чорыда дойдлöма. Но нывка абу вöлöма ляб да велöдысьыслы абу и норасьöма. Дерт, дыр кад абу вермöма дзебны, мый доймöма. Бур, накöд тшöтш гöраясö мунöма хирург. Операциясö Оля Аксёновалы сэні и вöчö-маöсь. И доймöм нывка помöдзыс вöлöма походын.

—Пыкöссö вундыліс. Бур, лыыс абу вöлі дрöбалöма. Вурыс туйыс öнöдз тöдчö. Приполярье мекöд нэм кежлö колис, — нюмъялö Ольга Викторовна.

Мöдысь сійö тöкöтьö абу пöдöма. Катамаранъясöн вöлöм кылöдчöны. Друг Ольгалöн пыжыс путкыльтчöма. Нывка увлань юрöн дзумгысьöма ваас. Видлöма бöр бергöдчыны, но абу вермöма. Мездысьны абу жö дзик пыр артмöма, зэлыда кöртасьöма да.

—Некымынысь видлі, ог вермы. А водзын юыс лöптöсь вöлі, пуяс пöрла-сьöмаöсь. Думайта, мися, сэтчöдз кö кылала, вöя. И öд кыдзкö мыні жö. Ырс-петі васьыс, — казьтыліс сійö.

А öд Ольга Аксёновалысь катамараннас путкыльтчöмсö ставöн аддзылöмаöсь, но сідз некод абу и уськöдчöма мездыны. Кор нывка матыст-чöма велöдысь дорас да мö-дöма юасьны, мыйла абу отсалöмаöсь, сійö и шуöма: "А ме шензя вöлі, мый тэ сэні вöчан?"

Ставыс тайö вöлöма и Татьяна чойыслöн син водзын.

—Олялысь ваö дзумгысьöмсö ме водзвыв быттьö тöді, — содтöд казьтыліс чойыс. — Юрын друг вирдыштіс, час, мися, путкыльтчас. И збыльысь — дзурс. Öд сулала берегас да нинöм вöчны ни шуны ог вермы. Быттьö кывйöй дубалöма, а ки-кокын эбöсыс абу. Сöмын вежöрын водзö гарта — куимысь видлас и быйкнитас-петас. И ставыс сідзи лои.

ТЭНЫД ЛЁК И МЕНЫМ ДЕЛИВÖ

Ольга да Татьяна Аксёноваяс — двöйни чойяс. Сійöн на костын йитöдыс зэв топыд да öта-мöдсö ёнджыка кылöны. Шуöны тай, öтарыслы кö лёк, и мöдарыслы деливö. Весиг оланруыс кö вежсьö, кылöны.

Кор Татьянаöс нуöмаöсь роддомö чужтыны писö, а Ольга абу тöдöма та йылысь, вир-яйнас да ловнас кылöма ставсö:

—Менö друг температуритіс. Гöгöр кутіс доймыны. Лекарство юа, но оз личöд. Суседкаöй весиг повзис, думайтіс, мый ме чорыда гриппöн висьми. Сэсся асъядорыс дойыс лэдзис. Быттьö некыті и абу висьлöма. И звöнок — Таня вайöма пиöс.

ВИСЬТАСЯН — ВИТАМИН СЕТА

Водзынсö Татьянаöс да Ольгаöс сöмын бать-мамыс вермöмаöсь торйöдны. Ичöт-дырйиыс дзик öтпертасаöсь вöлöмаöсь да. Детсадъяс, медым воспитательясыс торйöдісны двöйниöс, ки пыдöсаныс гижлывлöмаöсь нимъяснысö. Öтарыслöн — Оля, а мöдыслöн — Таня.

—А вушъяс гижöдыс да, матыстчасны вöлі миян дорö, юасьöны: "Кыдзи тэнö шуöны? Висьтасян — витамин сета", — сералöны кык чой.

Школаас велöдчигöн кык нимаöсь вöлöмаöсь, кыкнаннысö Оля-Таняöн вöлöм шуöны. И удж вылас найöс тшöкыда соралöны.

—Сэки Ухтаын на уджалім, — казьтылöны кык чой. — Пукалам кабинетын, чай юам. Öдзöс воссис, пырö оперуполномоченнöй. Видзöдліс миян вылö да зэв öдйö бöр öдзöссö пöдлаліс. А, вöлöмкö, сійö зэв дыр кабалаясöн ноксьöма да чорыда нин мудзöма. Со и думыштöма, мый синмыс вералö. Бöрыннас ёна и сералім.

Сэсся сійö оперуполномоченнöйыс быд паныдасигöн вöлöм шуö:

—Ме тöда, тэ Оля.

Овлöма и, мыж вöчысьяс чуймалöмаöсь. Кыдзи висьталіс Ольга Викторовна, коркö сійö вежон чöж öти мужичöйöс юасьöма. Сэсся öти татшöм жö допрос дырйи пырöма Татьяна Викторовна. Мужичöйыд зэв сюся ви-дзöдлöма Татьяна вылö да шуöма: "А ме тэнö кыськö аддзылі нин".

Кык чой вак-вакöн серöктöмаöсь.

—Вежон чöж ныр на ныр пукалім, а чойöс аддзис да татшöмтор шуис! —нюмдіс Ольга Викторовна.

АКСЁНОВАЯС АБУ ЛЯБÖСЬ

Кыдзи висьталі нин, Ольга да Татьяна Аксёноваяс ичöтдырйиыс ёртасьöмаöсь спорткöд, туристалöмаöсь да катамаранъясöн кылöдчы-лöмаöсь. А Уфаын юридиче-скöй институтын велöдчигöн ветлöдлöмаöсь рукопашнöй косьö велöдчан секцияö.

Первойсö эськö тренерыс абу кöсйöма нывкаясöс босьтны, тайö пö зонъяслы спорт. Но Аксёнова чойясысь сідзи он мын. Найö быд лун волывлöмаöсь вермасьны.

—Во джын миянöс тренерыс пыдди эз пукты, — водзö казьтылісны Ольга да Татьяна. — Быдногыс песлöдліс, чайтіс, мый лябöсь да öвсям. А сэсся гöгöрвоис, мый зонъяс моз жö ми вынаöсь да пелькöсь и босьтіс аслас группаö.

Вермасян сямыс следователь Аксёноваяслы унаысь ковмылöма и олöмын, и уджын. Öти зон велöдчигас на видлöма тешитчыны нывъяс вылын. Но Ольга Аксёнова терпенньöсьыс петöма да гырддзанас веськыда чужöмас тувйыштöма. Зонмыд сöмын тутöма. Та бöрын пö сыкöд бур ёртъясöн лоим.

А мöдысь удж вылас кöсйöмаöсь видлыны налысь вын-сямсö. Ольга Викторовнаöс вермасьнысö сувтöдöмаöсь боксын спортса мастеркöд. Дерт, вермöма Ольга. А боксёрыд куйлöма мыш вылас.

—Тіян уджад уна "няйтыс". Абу окота эновтчыны?

—Дерт, мудзан, — шуö Ольга Викторовна. — Но уджöс ог кöсйы вежны. Саридз дорын шойччышта да бара выль вынъясöн босьтча.

—Татьяна, ті кыдзи шойччанныд?

—Менсьым став мудзöс веськöдö пиöй. Сійö и лолöс гажöдö.