Сыктывкарса аварийно-спасательнöй котырын зільö зэв аслыспöлöс уджалысь — Лана немеч овчарка. Россияса чемпион. Öдвакö öні арталан, кымын выставка да понъяслöн ордйысьöмъясын сійö вермыліс.

И сылöн кöзяйкаыс, кинолог Ирина Степанова, зэв жö аслыспöлöс. Сыктывкарса аварийно-спасательнöй отрядын 34 спасатель. И на пöвстын дзик öти ань — буретш Ирина Александровна.

ПОНЙЫД — МЕДСЯ БУР ЁРТ

А ставыс заводитчöма ичöтдырйиыс. Ира, вöлöм, зэв ёна радейтö понъясöс. Бать-мамыслы кевмысьöма, босьтöй пö меным пон. И сöмын немеч овчаркаöс. Книгаясысь нывка лыддьöма-тöдмалöма, мый тайö рöдсö медся кокни велöдны дзик быдторйö. Нöшта на овчаркаыд – збыльысь бур ёрт. Тадзи Степановъяслöн семьяын овмöдчöма Витта пон.

Сійö кадас Лесозавод посёлокын уджалöма пон видзысьяслöн клуб, кодöн юрнуöдöма республикаын бура тöдса кинолог Павел Поташев. Ирина сэтчö тшöтш жö гижсьöма. Радейтана Виттаыслы квайт тöлысь тырöм бöрын клубас заводитöмаöсь волывлыны да тренируйтчыны. Воськов бöрся воськов ныв велöдчöма кинологö. Дерт, абу вöлöм кокни тайöс збыльмöдны. Сійö ачыс уна выльсö тöдмалöма, и Витта тшöтш жö сюсьмöма. Арöса овчарка быд тшöктöм збыльмöдöма, дженьыдик кадöн зэв вежöра да тöлка понйöн лоöма.

Ичöтсяньыс Ира радейтöма и спортивнöй ориентируйтчöм. Уна ордйысьöмын петкöдчылöма. Школа помалöм бöрын сійö велöдчöма Коми пединститутын, лоöма биология да география велöдысьöн. Но виччысьтöг медасьöма... туристъяслöн республикаса шöринö тренеірöн. И та бöрын заводитöма уджавны Сыктывкарса аварийноіспасательнöй котырын спасательöн да кинологöн.

КОРСЬЫСЬÖ. И АДДЗÖ

Степановъяслöн кык вежöса патераын талун олöны Лана немеч овчарка да Пуля бордер-колли. Налы кыкнанныслы Ирина Александровна лоö, рочышта, вожакöн. Сылысь быд корöм кöть тшöктöм уськöдчöны збыльмöдны. Овлö, Лана да Пуля öта-мöд вылас букыша видзöдöны, весиг эрöстлöны. Мыйла? Кöзяйкасö юкны оз вермыны да. Öтиыс мöдісö пановтöмöн кö Ирина Александровналысь кисö первойöн нюлыштас, либö аньыс сöмын öти понсö ошкыштас да нöшта на юрöдыс малыштас, дерт, сэсся зык-веныд кыптö.

Ирина Степанова öти пöраö видзöма öттшöтш нёль понйöс. Öнöдз казьтылö Ёки немеч овчаркаöс. Сійö вермылöма зэв уна выставкаын да ордйысьöмын, кодъясöс нуöдлöмаöсь Сыктывкарын, Ухтаын, Кировын, Смоленскын, Улыс Новгородын... Ёки шедöдлöма матö 40 кубок. А медальсö öдвакö арталан!

Аварийно-спасательнöй котырö оз быд понйöс босьтны. Первой сійöс колö велöдны-дасьтыны. А тайö ыджыд да сьöкыд удж. Сэсся колö на петкöдлыны ассьыд сямтö.

Быд во Россияса МЧС-лöн региональнöй шöринъясын, кыдзи, шуам, Москваын, Санкт-Петербургын, Казаньын, нуöдöны аварийно-спасательнöй котыръясысь корсьысян понъяслы сідз шусяна аттестация. Куим лунöдз нюжалö тайö аслыспöлöс туясьöмыс. Медводз видзöдöны, кыдзи понйыс кывзысьö, кор весиг кöзяиныс индалö-тшöктö зэв ылын сулалігöн, а сідзжö полö оз лыйöм шыысь, скöр абу, тшапкас-курччас-ö тöдтöм мортöс... Ускöттьö дырйи, кор некымын керка öттшöтш вальдö-киссьö, лöп-ёг чукöр улö веськалöны йöз. И найöс корсигöн понсö лоö ки вылö босьтны, торйöн нин сэні, кöні нёль кока ёрт вермас доймыны. А нöшта понлы да сылöн кöзяинлы лоö кавшасьны крут поскöд, вуджны катласьысь пöв кузя...

Мöд лунас кинолог аслас нёль кока ёртыскöд корсьöны вöрын вошöм йöзöс. Аттестация дырйи дзебсьöны куим, ордйысьöм дырйи — 8-9 морт. Найöс аддзöм вылö сетсьö сöмын 30 минут. Кинолог восьлалö вöрса ордымöд, а понйыс корсьысьö. И öд аддзö!

Бöръя лунас йöзсö корсьöны промышленнöй предприятиеын ускöттьö бöрын либö уна судтаа керка киссьöминын. И та вылö кадсö урчитöма муртса 20 минут. Этша? Но сёрниыс мунö пöгибö воöм йöз йылысь, вермас лоны, на пиын эмöсь и чорыда доймöмаяс. Пöв-кирпич улысь найöс колö кыдз позьö öдйöджык аддзыны да перйыны, сетны медицина отсöг.

Сöмын та бöрын понйöс аттестуйтöны, мöд кывйöн кö, сійö вермö уджавны МЧС-ын, ускöттьö дырйи спасательяскöд мездыны йöзöс.

ТАВО ТШÖТШ НИМÖДÖМАÖСЬ

Ланалöн кубок-медальыс, öткодявны кö Ёкикöд, абу жö этшаджык. Кольöм во Курган карын вöлöма Россияса МЧС-лöн регионса сертификационнöй ордйысьöм. Ирина Александровна аслас быдтаскöд зэв бура петкöдчöмаöсь. Сідз, кывзысьöм да тшöктöминдöд збыльмöдöм кузя лоöмаöсь первойöн. Вöрын вошöм йöзöс корсигöн шедöдöмаöсь мöд, а личнöй зачётын лоöмаöсь коймöд местаын. А командаяс пöвстын налöн сборнöйыс, кытчö öтувтчöмаöсь Комиысь, Салехардысь, Ижевскысь да Челябинскысь понъяс, вермöма тайö ордйысьöмас. И öд панйöмаöсь Россияысь, Украинаысь, Казахстанысь пон-чемпионъясöс.

2010 воын Урал регионын вöлöма ордйысьöм. Торъя юкöнъясын Ирина Степанова да Лана кыкысь вермöмаöсь, нöшта öтчыдысь шедöдöмаöсь мöд места...

И таво нин бара нимöдöмаöсь Коми Республикаöс. Архангельск обласьтса Котлас карын нуöдöмаöсь сідз шусяна скиджоринг. Сэні понйыс кык километр кыскö лызь вылын мортöс. Сыктывкарса аварийно-спасательнöй котырын уджалысьяс Ирина Александровна да Лана лоöмаöсь мöд местаын.

МУНÖМА, ДА ÖНÖДЗ АБУ

Татшöм кывъяс тшöкыда шуöны йöз, кор звöнитöны телефон пыр спасательяслы. И лача кутöны, гашкö пö, отсаланныд... Быд гожöм-ар, кор кисьмö вотöс да петö тшак, содö Ирина Степановалöн да быдтасыслöн тöжд-нокыс.

Ассьыс медводдза командировкасö ань öнöдз на казьтылö. Койгорт районын вошöма мужичöй. Мунöма вöрö вотчыны, а рытнас гортас абу воöма. Рöдвужыс асьныс кык лун корсьöмаöсь. Сэсся гöгöрвоöмаöсь, мый колö корны отсöг, да шыöдчöмаöсь спасательяс дорö. Ирина Александровна казьтыштіс, некымын лун помся пö буретш зэрис. Вöрын корсьысьны зэв сьöкыд. Öдйö кöтасьö паськöм, пу вожъяссянь войталö ва... Некымын лун зэр улын корсьысьöмаöсь. А тайö кадас вошöм мужичöй ачыс петöма туй вылö, но дзик мöд сикт дорö.

Муртса карö воöмаöсь, бара звöнитöмаöсь. Максаковкаса дачаысь олöма ань подöн веськöдчöма Сыктывкарö. Пи-нылыс абу кутöмаöсь виччысьны, вермас пö ылавны да, пыр жö шыöдчöмаöсь спасательяс дорö. Дзиръясяньыс Лана пыр жö заводитöма туявны. Олöма аньöс аддзöмаöсь. Мудзöм пöч пуксьöма мыр вылö. Сэтшöма, вöлöм, шогсьö, мый автобусö сöлöм пыдди подöн мöдöдчöма. Öд ылалöма, содтöд мудзöма, петан туйсö оз тöд. Гöлöс быртöдзыс нин горзöма...

—Медся лёк, кор яг-раскын вошöм морт йылысь юöртöны некымын лун мысти. Муніс пö вежон сайын, паськöмсьыс сöмын трусик-майка... Кыдзи татшöмсö пон туялас, кор кок туйыслöн дукыс абу нин? Да и вöрын ылалöм, а сідзкö, и прамöя повзьöм да öттшöтш шöйöвошöм ань кöть мужичöй вежоннад зэв ылö восьлалö-мунö. Корсигöн жö кадыс медся дона да тöдчана, — висьталö Ирина Александровна.

ЯГЫН КÖТЬ НЮРЫН

Пармаын ылалöм йöзöс корсьны мунöны кыкöн — ань да радейтана Лана. Ачыс Ирина Степанова бура кужö вöдитчыны компасöн да картаöн. Школаын велöдчигöн спортивнöй ориентируйтчöмыс ёна кокньöдö. Та вöсна ягын кöть нюрын быттьö карса уличті восьлалö. Понйыс, ковмас кö, доръяс и омöль мортысь, и зверысь.

Унаысь вöрöд келалігöн аддзылöмаöсь урöс, кöчöс, дерт, и пöткаясöс. И йöраяскöд ныр на ныр паныдасьлöмаöсь. Сöмын пö пармаса кöзяин — ош — зільö бокö вешйыны. Öд варгыль кокаыд зэв мудер да видзчысьысь.

—Казяла, Ланалöн тшöтьыс сувтö, сынöдсö исалö, ставнас кыдзкö быттьö зэвтчö... Сідзкö, ошлысь дуксö кылö. Недыр мысти, видзöдан да, — зверлöн куйланін, ачыс пышйöма нин, медым морт сійöс эз казяв, — нюмъялö нывбаба.