Кольöм выльлунö Печать керкаын воссис "Ордым" коми небöг вузаланін. Сійöс восьтöмын водзмöстчис "Коми му" газет редакция.
—Тайö мöвпыс чужис важöн нин. Бур, мый збыльмис. Эскам, воддза татшöм "Востым" лавка моз "Ордым" некор оз пöдлась, и туйыс сэтчö оз эжсяв, — пасйис "Коми му" холдингöн веськöдлысь Александр Ульянов.
Лавкасö восьтігöн Коми Республикаса печать да юöр сетан агентствоöн веськöдлысь Ирина Брагина пасйис, мый налöн ним вылö воис нин уна письмö, кöні войтыр юасьöны, кытысь позьö ньöбны коми гижысьяслысь небöгъяссö. Нимкодь, мый öні татшöм позянлуныс лои.
—Чайта, вузасянінсö восьтöмыс кутшöмакö ышöдас гижысьясöс и творческöй уджас, да коми литература кутас водзö сöвмыны, — шуис Ирина Петровна. — Дерт, "Коми му" редакция "Ордым" восьтöм бöрын ёнасö оз озырмы, но тайö налы лоö содтöд нажöтка.
Лавка джаджъясысь позьö аддзыны Иван Куратовлысь, Владимир Тиминлысь, Андрей Поповлысь да мукöд коми гижысьлысь небöгъяс. Литература радейтысь татысь вермас ньöбны и мукöд финн-йöгра кывъя петасъяс. Вузалöны и сьыланкыв чукöръяс да велöдчан небöгъяс.
Коми небöгöн вузасьны заводитісны гöрд лента вундöм бöрын. Медводдза ньöбасьысьлы мойвиис босьтны небöгъяссö вит прöчентöн донтöмджыка. Тыдалö, коми литература радейтысьяс ёна нин виччысьöмаöсь татшöм вузасянін восьтöмсö. Найö окотапырысь ньöбалісны радейтчöм йылысь висьтъяс, челядьлы коми библия да мукöд петас. Юасисны и, кор позяс ньöбны "Ордымысь" Виктор Напалковлысь "Войся ангел" романсö.
Водзö вылö, дерт, озырмас лавкаын вузöсыс. "Ордымын" позяс ньöбны коми сьыланкывъяса дискъяс, открыткаяс, тетрадь-ручка, а сідзжö ас киöн вöчöмторъяс, серпасъяс, кодъясöс вермасны вöзйыны и миян лыддьысьысьяс.
