Комиын Себастьян Каньолиöс бура нин тöдöны. Неважöн француз воліс Кöрткерöс районса Одыбö челядьлы содтöд тöдöмлун сетан "Нюмсер" шöринö. Францияысь гöсьт велöдчис кыны сюмöдысь юркытш да ворсны коми йöзкостса музыкальнöй инструментъясöн.
ВАЛА–ЕМЕЛЬ КЛЮЧÖ
Одыбын Себастьянöс дыр нин виччысьöмаöсь. Дона гöсьтöс пыр и вала ыстісны. "Нюмсерын" уджалысьяс нуöдлісны сійöс Емель грездö, ключ дорö, кöні ваыс сэтшöм сöдз, ни кöдзыд тöлын оз кынмыв, ни жар гожöмын оз косьмыв.
–Водзынсö тайö ключсьыс грездын став олысьыс васö юлöмаöсь, кор юкмöсъ-ясыс налöн косьмылö- маöсь. Весиг вöвъяссö татчö вайöдлöмаöсь юктöдны. Öти минутöн нелямын литр ва тюргö, – висьталіс "Нюмсерын" уджалысь Геннадий Попов.
Сэсся коми морт да француз öта-мöдсö ключ ваöн мыссьöдісны да чибльöгысь юктöдісны. Дерт, босьтісны васö и сьöрсьыс.
–Час ме тэнö самöварын чай пузьöдны на велöда, – туисö ва босьтöм бöрын висьталіс Себастьянлы Геннадий Иванович.
Себастьян сöмын нюмъяліс да юрнас довкйöдліс. Сылы таысь зэв на и нимкодь вöлі. Öд Комиö Себастьян Каньоли волывлö, медым матысяньджык тöдмасьны татчöс войтыркöд да налöн оласногöн.
Шöринö Емельысь локтöм бöрын Францияысь том морт кисьтіс ключ васö са-мöварö да пестіс сійöс.
СЮМÖДЫСЬ ЮРКЫТШ
Самöвар пузигкості Ген-надий Иванович велöдіс Себастьян Каньолиöс сюмöдысь юркытш кыны. Французкöд öти парта сайын велöдчисны и драматург Алексей Попов да кывбуралысь Анжелика Елфимова.
Кыдз шуласны, енбиа мортыд быдтор сяммö вöчны. Сідзи и эм. Геннадий Иванович вылö видзö-дöмöн Себастьян öдйö и кыис аслыс юркытштö. Зэв на и бура артмис.
–Молодеч! – ошкыштіс сійöс Геннадий Иванович.
Тöдмöдісны Францияысь воöм гöсьтöс и коми йöзкост-са инструментъясöн. Весиг велöдісны ворсны пöлянöн, буксанöн да зиль-зёльöн.
ЗАРНИ КИАÖСЬ
"Нюмсерын" уджалöны витöн: Татьяна Владимировна Габова, Анна Петровна Подорова, Рада Павловна Михайлова, Геннадий Иванович Попов да Михаил Николаевич Габов. Ставныс зарни киаöсь. Мыйсö сöмын оз кужны вöчны: кысьöны-вышивайтчöны, сёйысь лепитчöны, сюмöдысь-пуысь, бумагаысь вöчасьöны, серпасасьöны, бисерöн вурсьöны, гудöкасьöны, коми йöзкостса инструментъясöн ворсöны. Ассьыныс тöдöмлунъяссö сетöны Одыбса нывкаяслы да зонкаяслы. "Нюмсерö" волывлö 90 велöдчысь. Шыöдчылöны и сиктсаяс.
–Зэв нимкодь, мый миян уджным оз весьшöрö вош. Весиг Францияын нин миянöс тöдöны, —шмонитö Геннадий Иванович. — Унаöн мунöны водзö велöдчыны. Сергей Поповöс куим арöссянь гудöкасьны велöді. Öні сійö водзö босьтö тöдöмлунъяс мöд номера педколледжын. Лоас музыка велöдысьöн.
Тöдöны "Нюмсерлысь" киподтуйсö и районын, и республикаын да весиг суйöр сайын. Кöрткерöс районöн веськöдлысь Николай Доломина волöма тайö шöринас да вылö донъялöма велö- дысьяслысь уджсö. "Нюм-серын" зільысьяс нуöдöмаöсь жö сылы мастер-класс. Ве-лöдöмаöсь сюмöдысь перна кыны. Неважöн Николай Доломина козин пыдди шöринлы сетöма куим выль гудöк ньöбны сьöм.
–Челядь, локтан "Öшкамöшка" фестиваль вылö мунам выль гудöкъясöн нин, – юöртіс быдтасъясыслы Геннадий Иванович.
А Одыбса зонпосни енбиаöсь. Сэтшöм бура гудöкасьöны! Сідз, Илья Ларуков удмурт йöктöмъяс ворсіс. Тöкöтьö йöктыны эг чеччышт. Зонка детсадсяньыс нин велöдчылöма гудöкасьны. Öні сійö 4-öд классö ветлö.
ШОПЕР ДА ТРАКТОРИСТ
Ёна чуймöдіс, мый "Нюмсерын" уджалöны вöвлöм шопер да тракторист. Шоперавлöма Анна Петровна, а тракториставлöма Геннадий Иванович.
–Томдырйи Кöрткерöсын грузöвöй машинаöн журъявлі, – казьтыліс Анна Петровна. – Семья сэки эз на вöв да, тшöкыда матігöгöрса совхозъясысь новлöдлі картупель да мукöд груз.
Ыстывлöмаöсь командировкаö и Маджаö. Аслас машинаöн шопер-ань журйöд-лöма и Маджаса зонпосниöс. На пöвстын вöлöма и Анжелика Елфимова. Сэксянь, дерт, уна во нин колис. Анжелика тайöс оз нин и пом-нит. А со Анна Петровна тöдіс сэкся визув нывкаöс, коді öні – енбиа кывбур гижысь.
Геннадий Иванович томдырйиыс тракторöн уджав-лöма. Но Енмыс сылы мöд ордым дасьтöма – югыдджыкöс. Öні сійöс кыдз совхозын уджалысьöс некод нин оз и казьтыв. Быдöн тöдöны Геннадий Поповöс кыдзи зарни киа мортöс да енбиа гудöкасьысьöс.
