Сыктывдін районса Тöрöяг посёлокын Леонид Степанович Прокушев — Ыджыд войнаса медбöръя ветеран. Сы йылысь позьö книга гижны. Вир кисьтана тышъяс помасьöм бöрын 40 во зільöма Сыктывдінса леспром-хозын. 1963 воын зіль да водзмöстчысь мортöс бöрйылöмаöсь Коми АССР-са Верховнöй Сöветö депутатöн. Гöтырыскöд, Агния Андреевнакöд, быдтöмаöсь-велöдöмаöсь квайт челядьöс.
МОРÖСАС — ОРДЕН-МЕДАЛЬ
öіÖЛеонид Степановичлöн керкаыс Пожöг юлöн берегас. Тöрöяг посёлоклысь тайö юкöнсö мыйлакö шуöны "кулацкöйöн". Олöма морт, та йылысь юалі да, вак-вакöн серöктіс:
— Да татчöс кыкнан уличаас сöмын ас киöн тшупöм-кыпöдöм керкаяс. И быдöн-лöн йöрас — аслас му. Вöдитам быд сикас град выв пуктассö. А посёлокас жö — пöвйысь да брускысь вöчöм керкаяс. Вöр заптысьяс, буракö, завидьтöмаöсь да та вöсна тадзи и нимтöмаöсь...
Олöма морт здук кежлö лöньліс. А сэсся бара шыасис:
— Ме öд чужлі да быдмы-лі Ипать грездын. Сэні коллялі ассьым медся бур да шуда вояссö. Пыр зіли-уджалі. Бать-мам öтарö вöлі дольöны, Лёньö, быд мортöс пö донъялöны удж сертиыс... Налöн велöдöм-туйдöм серти и олі.
Ас нэмнас Леонид Степанович уна тöдлöма тужа-нужасö. Война грымöбтöм бöрын Ипатьысь став мужичöйыс мунöмаöсь вöрöглы паныд тышкасьны. Грездын кольöмаöсь аньяс, пöль-пöч да челядь. Найö и колхозын гöрöмаöсь-кöдзöмаöсь, турун пуктöмаöсь, вöр лэдзöмаöсь, "Ставсö фронтлы!" сэкся индöд-корöм збыльмöдöмаöсь.
Вочасöн быдмöмаöсь зонъяс. 1944 воын Ипатьö воöма райвоенкоматсянь 14 пöвестка. Ставныслысь медводз, дерт, врачьяс донъялöмаöсь дзоньвидзалунсö. И сöмын куим зонмöс босьтöмаöсь армияö. На лыдын вöлöма и Леонид Прокушев.
Салдатъясöс поездöн нуöмаöсь Архангельск обласьтö. Офицер первой юасьöма, коді кытысь воöма, мый вöчлöма... Радöвöй Прокушев дженьыда вочавидзöма, ме пö Комиысь. А офицерыд бара на юалöма, а, гашкö пö, вöралысь да? Парма-ягад олысьыд, дерт, тулан-уртö лыйö. Тайöс кылöм бöрын офицерлы нимкодь лоöма, тэнö пö велöдам снайперö.
Квайт тöлысь коми зон велöдчöма. Первойсяньыс петкöдчöма сылöн ёсь синмыс да лыйсян сямыс. Пасад вöлöм стöча инмö. Дерт, сэсся радöвöй Прокушевöс ошкöмаöсь, мукöдлы примерöн вöлöма.
Но немечлы паныд воюйтны абу мойвиöма. Налысь часьтсö ыстöмаöсь страналöн рытыввылö. Япония пö, гашкö, уськöдчас да. Сибырса öти станцияын юöртöмаöсь, Гöрд Армия пö босьтöма Берлин, война помасьöма. Победа! Ставöн радлöмаöсь... Том йöз öд эз вермыны тöдны, мый августын пансяс Япониякöд война.
И Комиысь зонлы ковмöма воюйтны. Командирлöн индöд серти снайпер Прокушев лоöма пулемётчикöн. Бура пö лыйсян да. "Максим" пулемёттö ёртыскöд кыс-калöмаöсь пельпом вылас. Нöшта на патронъяссö.
Миян генералъяс шуöма-öсь бöбйöдлыны японечьястö. Та могысь тшöктöмаöсь вуджны Хинган гöра вомöн. И миян салдатъяс збыльмöдöмаöсь тайö индöдсö. На лыдын вöлöма и Леонид Прокушев. Японечьясыд татшöмтор йылысь и мöвпыштны абу вермöмаöсь. Коді нö гöра йылö кавшасьö? А пушка-снарядсö лэптан öмöй? Дерт, сэсся Гöрд Армия öдйö зырöма вöрöгтö. Босьтöмаöсь Мугден кар да водзö мунöмаöсь...
Оз ков чайтны, мый Японияса армия абу сяммöма воюйтнысö. Но сöветскöй войска сöмын на пасьвартіс немечьясöс. И генералъяслöн, и салдатъяслöн опытыс вöлі зэв ыджыд.
Ставсö сизим во служитöма Леонид Степанович. Гортас сержант Прокушев воöма 1951 воын. Морöсас Отечественнöй война орден да "За победу над Япо- нией" медаль...
40 ВО ВÖР КЫСКАЛÖМА
Вöвлöм салдат медасьöма уджавны вöрö. Кыскалöма пожöм-коз кражъяссö "газген" тракторöн. Нёль во мысти велöдчöма шоперö. Сэсся пуксьöма МАЗ-лöн руль сайö. И бара на керасысь краж петкöдöма. Шыладор грездын тöдмасьöма Агния нывкöд. Ворсöмаöсь кöлысь. Том гозъя кыпöдöмаöсь Тöрöяг посёлокын керка. Чужöмаöсь челядь.
Леонид Степанович лун и вой уджалöма. Леспромхозын сэки бура мынтысьöмаöсь. Сöмын зіль да водзмöстчы. А сійö урчитöм плантö пыр вевтыртлöма. Тадзи и лоöма коммунистическöй уджвывса ударникöн. "За трудовую доблесть" медаль сетöмаöсь. И бöрйöмаöсь леспромхозса шоперöс Коми АССР-са Верховнöй Сöветö депутатöн.
Пенсия вылас петтöдз 40 во уджалöма Сыктывдінса леспромхозын. И öнöдз сійö кадсö медся пöсь кывъясöн казьтылö. Олöма морт шуö, мый уджалысь мортöс Сöвет власьт воясö збыльысь пыдди пуктылісны.
ВЕСЬ ОВНЫ ОЗ ВЕРМЫ
Миян волігöн Леонид Степанович пыді вежöсас буретш ботан вöлі зэвтöма, розьяссö пö дöмла. Регыд öд тулыс... Телевизор водзын сійö пукавны абу велалöма. Уджтöгыс пö ог вермы.
Олöма мортлöн киыс збыльысь зарни. Кокниджык шуны, мый оз куж вöчны-сö. Йöзлöн корöм серти пими-унты вурö-дöмö. Карысь тöдсаыс волöма, "Буранлы" пö додь колö. Ёртöй пö петкöдліс тэнсьыд вöчöмтор-тö да завидь босьтіс...
Леонид Степановичлы 84 арöс, но пыр на ачыс пусьö, пöжасьö, песласьö, джоджсö мыськö и. Дерт, Степан пиыс отсасьö батьыслы: ва вайö, пес пыртö...
Прöст кадö олöма морт чери кыйö, весиг и ружьеöн парматі келалö. Сійö казьтылö:
— Сöвет власьт воясö быд ар вöравлі. Государстволы сдайтлывлі 250 урöдз да 35 туланöдз. Сэки небыд зарнитö вöлі босьтöны. Öні тай дона куыд некодлы оз ков. Некымын йöра мойвиис кыйны. Лайка отсöгöн лыйлі кöкъямыс ошкöс.
И öні бара на тулыс воöм-сö виччысьö. Окота пö свежöй юкваöн номсасьыштны. Гашкö пö, бöръяысь да. Леонид Степанович шензьö:
— Юöртісны, Россияын пö чери кыйöмысь регыд ковмас сьöм мынтыны. Кодсюрö, буракö, дзикöдз дурмисны. Олöмыс оз кытчö колö мун. Кыдзи нö уджтöмалысь либö пенсионер кутас вуграсьны, мынтысьны кö ковмас? Ставнымöс, тыдалö, кöсйöны браконьерöн вöчны... Пöль да бать нэм чöжыс чери кыйисны, а меным да пиян-внуклы сэсся оз позь? Тешкодь. Ю дорын овны да кодлöнкö йöй индöд серти лавкаысь саридзса донасьыс-дона треска сёйны? Мый нö тайö вöльнöй светас вöчсьö? Талун Россияын быттьö тöдöмöн йöзсö быд ногыс дзескöдöны.
Дöзмöма олöма морт. Пыр тшöкыдджыка сійö казьтылö бöрö кольöм вояссö.
— Эн думайтöй, мый норася. Но Сöвет власьт воясö йöзыс öнія серти ёна бур-джыка олісны. Öтув кутчысисны, öта-мöдлы отсасисны. А талун, видзöдлöй, мыйта му-видз эндöма, скöт картаяс вальдöмаöсь, вöр керасъясын уджыс воысь-во лöньö. Мый йылысь мöвпалöны чинаяс? Уджтöгыс мортыдлы оз позь овны, тшыкö сійö, — майшасьö Леонид Степанович.
