Март 11 лунö Кöрткерöс районса Ыджыдвидз сиктын восьтісны выль библиотека да клуб.
Кольöм вося апрельын сиктса культура керкасö тупкисны, сы вöсна мый стрöйбаыс вöлі киссян выйын. Мöд судтаас сэні меститчыліс и библиотека, кодöс тшöтш жö пöдлалісны. И матö во чöж ыджыдвидзсаяслы некöн вöлі гажöдчынысö.
Медбöрын сюри сиктын стрöйбаыс, кытчö и шуисны вуджöдны культура керкасö да лыддьысянінсö. Совхозлöн кантораын улі судтаас паськöдчисны культураын, а выліас — лыддьысянінын уджалысьяс.
Дерт жö, торйöн нин нимкодь вöлі сиктса культура керкаöн веськöдлысь Наталья Ивановалы да библиотекарь Роза Панюковалы (снимокъяс вылынöсь).
НЕБÖГЛА ДА ГАЗЕТ-ЖУРНАЛЛА
Ыджыдвидзса библиотекаын уджалысьяс выль жырйö вуджöмаöсь Выль во водзын. Асьныс став коланасö штукатуритöмаöсь-белитöмаöсь, мавтöмаöсь. Мед нин öдйöджык лыддьысянінсö восьтыны.
Татчö волывлöны унаöн. Кодкö радейтö детективъяс, кодкö сьöлöм косьтöм йылысь романъяс. Во гöгöрнас лыддьысьö 640 морт.
—Сиктсаясыдлöн öд абу на быдöнлöн гортас компьютерыд, а тöдöмлуныд колö. Волывлöны татчö урок кежлö дасьтысьны школаын велöдчысьяс, верстьö босьтлöны небöгъяс, газет-журнал, — висьталö сиктса библиотекаöн веськöдлысь Роза Геннадьевна Панюкова.
Сідз, Нина Васильевна Симпелевалöн лыддьытöм небöгыс абу. Тайö аньыс пыр юасьö выль петасъяс. Да и ачыс гижö кывбуръяс. А Татьяна Ширяева медсясö радейтчöм йылысь небöгъяс лыддьö. Босьтлывлö татысь и газет-журнал, мый оз вермы пошта пыр судзöдны. Сэсся и пиыслы гортса удж вöчны татысь небöгъяс нулывлö.
Ыджыдвидзса библиотекаын кыпыда восьтісны литература да чужан му туялöм кузя шöрин. Кыдзи висьталіс Роза Геннадьевна, налöн могыс — чукöртны Кöрткерöс районысь да торйöн Ыджыдвиддзысь петлöм нималана йöз йылысь гижöд-снимокъяс. Ышöдны том йöзöс ёнджыка лыддьысьны комиöн да гижны чужан кыв вылын кывбур-висьтъяс. Налысь уджъяссö пыртасны "Литераторы земли Корткеросской" электроннöй базаö.
Кутасны котыртлыны и нималана гижысьяскöд аддзысьлöмъяс. Шöринсö восьтігöн волісны нин Ыджыдвиддзын чужлöм драматург Алексей Попов да Маджаын быдмылöм кывбуралысь Анжелика Елфимова.
—Шуöны, коми кывйыс пö бырö. Оз пö кöсйыны сы вылын сёрнитны да гижны. Тайö абу тадз. Ыджыдвиддзын чужисны енбиа гижысьяс, кодъяс нималöны республика пасьта, тöдöны найöс и Россияын да суйöр сайын. Эмöсь тайö сиктас и сідз шусяна самодеятельнöй гижысьяс. Буретш налысь кывбур-висьтъяссö кутам чукöртны да йöзöдны, — висьталіс Кöрткерöсысь библиотекаяслöн öтувтöм тэчасöн веськöдлысьöс вежысь Александра Ивановна Потапова.
СЬЫВ ДА ЙÖКТЫ
Ыджыдвиддзын библиотека кыпыда восьтöм бöрын гажыс эз на помась. Рытнас войтырöс виччысис мöд козин — выль клуб.
Гортад öд пыр он пукав да уджтö мырк. Окота и шойччыштны, концерт вылö ветлыны, йöктыштны. А татшöм гажыс Ыджыдвиддзын важöн жö нин эз вöвлы. Мöвпалöмаöсь эськö клубсö Выль во кежлö восьтыны, но абу артмöма.
—Дзоньтасьöмыс вель дыр нюжаліс. Но век жö воссим, — нимкодьпырысь висьталіс сиктса культура керкаын уджалысь Татьяна Панюкова. — Миян сэсся тані том йöзыслы некытчö петавны. Бар абу. А веськыда кö шуны, сійö оз и ков. Барад сöмын юöны. А клубад концерт дасьтам. Сьылöны-йöктöны, сценкаясын ворсöны челядь и верстьö.
Культура керкаын уджалысьяс ставсö жö ас кинас мавтöмаöсь-пелькöдöмаöсь. Сералöны тай, няйт пась-кöмсö пö вылысь эг и пöрччылöй. А öні сё майбыр! Сьыв да ов!
—Важ клубас зэв кöдзыд вöлі, весиг гын сапöгöн да пальтоöн йöктылім репетицияяс дырйи. А тані шоныд. Пукалан местаыс сöмын этшаджык. Важас вöлі 140 мортöс пуксьöдам, а татчö 70-öн тöрасны, — висьталіс Ыджыдвидзса культура керкаöн веськöдлысь Наталья Иванова.
Да збыльысь ичöтджык и эм жырйыс. Концерт вылö воысьяс кодсюрö эз и тöрны залас. Кодъясöскö пуксьöдісны на содтöд лабич да улöсъяс вылö, а мукöдыслы калидорас ковмис кывзыны сьылöмсö. Но гортас некод эз мун. Тыдалö, збыльысь гажтöмтчöмаöсь кыпыд концертъяссьыд.
—Кыдзи нö сиктын клубтöгыс овны! Ёна и майшасим, кор тупкисны, а öні лолöй сьылö, — нимкодясьö Антонина Гендриховна Попова.
