Öнія лыдпаса техноло- гияяс сöвмöны зэв öдйö, такöд тшöтш водзö паськалö телейитöд, спутникъяс пыр öні позьö видзöдны лыдтöм каналысь уна сюрс уджтас.

Бöръя воясö видзöда Сыктывкарса кабеля телевиденньö, а сэтысь позьö öні меддонтöм, сідз шусяна социальнöй тариф серти ви-дзöдны тшöтш Белоруссиялысь телеканал, а сідзжö Татарстанысь да Башкортостанысь сэтчöс кывъяса лунчöжся каналъяс. Майбыр жö Комиын олысь тотара-башкирлы: найö быд лун тöдмалöны ас кывйöн выльторъяс, видзöдöны концерт-спектакъяс, оз орöдчыны чужан мусьыс да ас культурасьыс. А мый позяс видзöдны серпаскудйысь коми мортлы да öттшöтш кывны чужан кывъя сёрни да сьылан? Вочакывйыс зэв гажтöм: зэв этша дай медся лöсявтöм кадö.

Дерт, медводдза коми кывъя уджтасъяс юргисны нин Коми Республикаса телевиденньöын кольöм нэмся квайтымынöд воясö, но сійö кадсяньыс унатор вежсис, торйöн нин öні, ёна ошкана либерал-демократияа кадö. Медлёкыс сійö, мый "Коми гор" канал лои дзик федерация улö пырысь да сэні сетöны сöмын öтсяма юöръяс да öткымын уджтас. Дерт, эм коми кывъя "Ас му вылын" уджтас, сöмын асывнас öкмыс часнад зэв этша йöз сійöс видзöдö. Юöр сетан "Вести-Коми" уджтас юргö комиöн витысь, но рытнас коми йöз сійöс оз кывлыны. А шуам, рочöн юöръяссö сетöны сизимысь, рытнас кöкъямыс бöрын да войнас на дас кык часын.

Сöмын öд эм Коми Республика улö пырысь некымын во сайын восьтöм ас телеканал, весиг коми ним гораа бöрйисны неважöн на – "Юрган". Сэні эськö и колö коми кывйыслы сöвмыны да паськавны, гораа юргыны! Тадзи унаöн мöвпалісны тайö каналсö панігас дай сы бöрын на. Сöмын тай кöсйöмъяснас ставыс и помасис. Со матö быд во "Юрганнас" веськöдлысьсö вежöны, выль проектъяс сэні дасьтöны, пычкысьöны-сöвмöдчöны, а коми кывйыс век жебиника "юргö". Мый нö медся ёна майшöдлö тайö ас мувывса каналсö серпаскудйысь видзöдіг?

Медводдза мытшöдыс – коми кывъя уджтасыс зэв нин этша. Лыддьöдлам комисö да сы бöрын роч кывъясö:

1) "Талун", "Вочакыв", "Миян йöз", "Челядьлы. Чолöм, дзолюк", "Шондібанöй-олöмöй", "Сёрни-басни", "Оланін";

2) "Время новостей", "Бремя новостей", "Время итогов", "Рабочий полдень", "Прогноз погоды", "Случай из практики", "Вопрос с пристрастием", "Наследие", "Телемагазин", "КРиК. Криминал и комментарии", "Личный приём", "Эконом-класс", "Русский крест", "Старая кинолента", "Охота рыбачить", "Народная экспертиза", "Телезащитник", "Мужской клуб", "Культурные люди", "Когда душа пуста", "Дорогая редак- ция", "Спортивная линия", "Открытое голосование", "Мультпарад", "Jam ses-sion". Збыль коми уджтасыс сöмын куим, "Шондібанöй-олöмöйыс" петавлö шочиника, вежалунö, а "Сёрни-басни" да "Оланін" зэв дженьыдöсь (3-4 минутысь абу кузьджыкöсь) да найöс весиг газетын йöзöдана ве- жонся телеуджтасъясö торйöнсö оз пасъявны. Тайö кык дженьыдик уджтассö артыштöмöн коми уджтасыс 7, роч кывъяыс ёна унджык – 25, коми уджтасыс роч кывъя дорысь 3,57 пöв этшаджык. Весьлунъясö коми уджтасъяслöн юрган кадыс став каналсасьыс 20 прöчентысь абу унджык.

Мöд мытшöдыс – став коми уджтасыслöн юрган кадыс ичöт, 15 минутысь абу кузьджык. Збыльысьсö и та мындаыс унаысь оз юргы, öд зэв тшöкыда пыртöны уджтас кадас тшöтш реклама (бöръясö вежонся телеуджтасас оз пасйыны да позьö чайтны, быттьöкö "Юрган" каналыс тайö дöнзьöданторсьыс мездысьöма нин). Öти сайын содтам татчö со мый – став рекламасö сетöны рочöн, оз комиöн. И мöдарö: роч кывъясьыс кöть уна уджтас тшöтш 15 минутысь абу кузьджык, эмöсь дыр юрганаяс, шуам, "Рабочий полдень", "Время итогов", "Мужской клуб", "Jam session" да мукöд. "Время итогов" юргö 45 минут чöж. Роч кыв дырджык юргö тшöтш сы понда, мый быд весьлунö "Время новостейсö" сетöны витысь, а "Талун" позьö видзöдны сöмын кыкысь. Мыйла та-дзи пайкöны коми видзöдысьсö, морт оз висьтав.

Коймöд мытшöд – коми кывъя телеуджтасъяссö позьö видзöдны медся лöсявтöм кадö. Позьö чайт-ны, мый тайöс вöчöмаöсь тöдöмöн, мед этшаджык йöз видзöдіс найöс, медводз роч кывъяысь гырысь чинаяс. Найöс петкöдлöны водз асывнас 7 чассянь да водз рытнас 18 чассянь 19 часöдз ("Талун", "Вочакыв", "Миян йöз"). Гöгöрвоана, асывводзнас кызвын йöзыслы некор видзöднысö, а квайт час рытнас абу на ставныс гортасöсь, сиктын идрасьны на колö, пусьыны да мый да. Челядьлы коми уджтасыс овлö вежалунö куим часын, выльысь сійöс петкöдлöны выльлунö 7 чассянь. Ыджыд телеменеджеръясыд, тыдалö, чайтöны, мый коми челядь водз чеччöны да дзоргöны-видзöдöны выльлун асылö "Чолöм, дзолюк", сёйны ни некытчö мунны налы оз ков. Роч кывъя уджтасъяс мунöны медся бур кадö, прамтайм кадö, кор унджыкыс прöстмöны да пукалöны- шойччöны: луннас пажын кадö, рытнас сёйöм бöрас сизим чассянь. Быдöнлы окота тöдны аскиа лун кежлö ывларусö (поводдясö), сöмын "Прогноз погодыыс" мыйлакö бара луннас некымынысь овлö сöмын рочöн. Мыйла оз позь тшöтш комиöн висьтавны?

Нёльöд мытшöдыс петö став видлалöм куимсьыс. Тайö коми уджтасъяслöн векньыдик темаяса адасыс. И збыль, оз öмöй ков коми вужвойтырлы ас чужан кывлысь юргöмсö кылігтырйи видзöдны политика, спорт, дзоньвидзалун, культура, оланпасъяс, криминал да уна мукöдтор йылысь? Оз öмöй ков лöсьöдны тшöтш вежонся кывкöрталан уджтас, концертъяс да спектакъяс, кывзыны коми гижысьясöс? Мыйла ставсö тайöс позьö кывны республикаын олысь роч кывъя йöзлы? Тыдалö, найö выяджыкöсь коми дорысь. Коми кывъя уджтасъяслöн юöртан адасыс вывті жеб: республикаса юöръяс ("Талун"), торъя йöз йылысь серпасъяс ("Миян йöз") да корöмаяскöд дженьыдик воча сёрнияс ("Вочакыв"). Со и коми телевидениелöн ыджыд сöвмöмыс.

Гöгöрвоана öтитор: канал пансьöмсяньыс коми кывъя уджтас дасьтöмсö пуктöмаöсь тöдчытöмтор пыдди, сетöмаöсь неуна эфир кадсö мода вылас, öвтыштчигмоз. Дзоньнас юöр сетан политикасö миян республикаса ас каналсаяс веськöдöмаöсь сы вылö, медым тырвыйö могмöдны роч кывъя йöз-лысь корöмъяссö (на лыдö пырö матö став öнія веськöдлан котырыс). Коми йöз-лы тайö могсö оз пöртны. Та-дзи торкöны каналан кывъяс йылысь оланпассö, сылысь мöд статьясö. Сэні гижöма: коми да роч каналан кывъяс Коми Республикаын бергалöны öткодь тшупöдын. Быдöн аддзö тайö тшупöдсö "Юрган" телеканалö видзöдліг. Дай коми журналистыс сэні лыда. Кывсьöджык сöмын Пивкин Öльöксан. Но мый сійö öтнас вöчас.

Кывкöртöдыс таысь вермас лоны öти – колö вежны сэтчöс веськöдлан нырвизьсö да пуктыны коми уджтас вöчöмсö роч кывъякöд öти тшупöдö. Эм мöд туй, ёна бурджык: Татарстанын, Башкортостанын моз панны сöмын коми кывъя канал, мед кöть и абу лунтыр юрганаöс, да нимтыны сійöс "Коми юрган". Эм, дерт, и коймöд туй, медся гаж-тöмыс: немтор каналас оз вежсьы. Республикаса айясысь кодкö вöрзяс оз мыйкö вöчны? Со тай Коми небöг лэдзанінсö пöдлалöм бöрын сійöс пыр на кöсйысьöмöн восьтöны. А коми небöгсö сэк кості ньöбнысö некытысь...