Кольöм вежонö Кöрткерöс районын ёрдса приставъяс тупкисны вит культура керка: Вомынын, Пöддельнöйын, Шойнатыын, Одыбын да Намын. Тайö стрöйбаясас торкалöны пöжарысь видзчысян нормаяс да. Тырмытöмторъяссö бырöдны урчитісны нелямын лун.

Кыдзи висьталіс Пöддельнöй сиктса культура керкаöн веськöдлысь Галина Вокуева, стрöйбаас и збыльысь абу биысь видзчысьöм могысь став коланаыс. Но медым бырöдны тырмытöмторъяссö, та вылö сьöмыс абу. Отсöгсö виччысьöны Кöрткерöс районса "Досуг" клубъяслöн котырсянь. Öд буретш сы борд улö найö пырöны.

–Кольöм во пöжарнöйяссянь сюраліс жö миянлы, — висьталö Галина Васильевна. – Клубö пыран кильчöыс вöлі крут да тшöктісны нюжöдыштны.

Сэки сöмын ас вынъясöн абу жö вермöмаöсь тайöс вöчны. Шыöдчöмаöсь сиктса депутат дорö, коді ставсö артыштöма-мерайтöма да весиг ассьыс пиласö сетлöма. Плака-керсö ваялöмаöсь косялöм важ клуб дорсьыс. Удж вылас медавлöмаöсь кык зонмöс. Öтиыслы вештысьöма сиктса администрация, а мöд зонмыскöд Галина Васильевна сёрнитчöма, мый дон босьттöг кутас лэдзлывлыны йöктыны.

Кусöдчысьяслысь öнія индöдъяссö збыльмöдöм могысь колöны торъя специалистъяс да уна сьöм.

–Сиктса культура керкалы сьöмсö зэв этша вичмö-дöны, да и сійöс ми ог ад-дзылöй, – шуö Галина Вокуева. – А районсянь корöны "план тыртны". Во гöгöрнас миянлы колö нажöвитны 30 сайö сюрс шайт. А чукöрмö сöмын 20-23 сюрс шайт. Концерт вылö верстьöлы билетсö 30 шайтысь вузалам, челядьлы – дас витысь. Йöктыны комын шайтöн жö лэдзам.

–А öні тіян став уджыд сувтіс? Кыдзи кутанныд нажöвитчыны? – юася Галина Васильевналысь.

–Быд во сентябрь 1 лунсянь сёрнитчам школакöд öта-мöдöс "мездыны", йöр-мылам кö. Март 8 лунöдз найö миянöс лэдзисны актöвöй залас. Мужичöйяслы сиöм гажсö сэні нин нуöдім. А сэсся водзö ог тöд, – ышловзис культура керкаöн веськöдлысь.

Збыльвылас кö, тайö шогыс абу сöмын Кöрткерöс районса культура керкаяслöн. Республика пасьталаын клубъясыд пöдласьöны. А кутшöм вермас сэні лоны öнія кадлы лöсялана биысь видзчысян оборудование, стрöйбасö кö нин колö зорйöн пыклыны. Öд кызвын сиктса клубсö кыпöд-лöмаöсь война кадöдз да сэксянь нинöм на и абу вежсьöма.

Дум вылö усьö Сöвет кадся "Дело было в Пенькове" кино. Сэні грездас тшöтш жö том йöзыслы некöн вöлі чукöртчывны, прöст кад коллявны. Гажöдчылісны Алевтина нима ань дорын. Йöктісны грампластинка улö да юисны самöкур. Гашкö, та выйöдз жö воас и талунъя сиктын культураыд да?

И Пöддельнöйын клубыс меститчöма эновтöм керкаын. Некымын во сэні вöлöма сиктса администрация. Сэсся сійöс вуджöдöмаöсь школаö, а стрöйбаас восьтöмаöсь клуб.

–Ог и помнит стöчасö, кымын вося нин керкаыс. Сё сайö восö сулалö нин-а, – шуö Галина Васильевна.

Кыдзи висьталіс "Коми му" газетлы Пöддельнöй сиктса культура керкаöн веськöдлысь, кор найöс вуджöдöмаöсь тайö стрöй-баас, пöжарнöйяс сійöс абу видлалöмаöсь. Кусöдчысьяс кутöмаöсь волывлыны Пöддельнöйын олöма йöзлöн керка сотчöм бöрын.

Шыöдчылім юалöмöн и Кöрткерöс районса "Досуг" котырöн веськöдлысь Любовь Попова дорö.

–Медым бырöдны Вомынса, Пöддельнöйса, Шойнатыса, Одыбса да Намса клубъясын тырмытöмторъяссö, колö 322 сюрс шайт. 89 сюрссö вичмöдісны нин районса администрациясянь. Дерт, тайö этша, ковмас уджйöзасьны, – висьталіс Любовь Васильевна. – Колö аддзыны и подряда котыръясöс, кодъяс вöчасны став колана уджсö. Чайтам, ставсö удитам помавны урчитöм кадö. Сöмын Вомынын вермас нюжавны дзоньтасьöмыс, уджыс сэні мукöдлаын дорысь унджык да.