Том йöзлöн выль коми сьыланкывъяслы сиöм "Койташ" республикаса фестиваль, "Мысли огня" файер-шоу, "И наши скорби Богу не чужды" благотворительнöй концерт, Юралысь бердса искусствояс гимназиялöн юбилейлы сиöм концерт, Ольга Сосновскаялöн приз вылö том сьылысьяслöн да мича нывъяслöн "Райда" республикаса конкурсъяс, "Тайна книги Ошлапей" да "Все, все, и даже Незнайка, идут в школу" челядьлы спектакльяс. Тайö сцена вылын торъялана петкöдчöмъясыс, збыльвылас кö, зэв топыда йитчöмаöсь. Найöс ставнысö пуктiс öти морт — нималана том режиссёр Анастасия Есева.

Настялöн кö пöртсис олöмас ичöтдырся мöвпыс — лоны хирургöн, эськö, чайта да, ёна гажтöм вöлi миян олöмным. Дерт, став колана концерт-ордйысьöмыс и тайö нюмъялысь нывкатöгыс эськö котыртчылiс, но дзик мöд нога нин найö юргисны да дзик мöд нога сьöлöмад йиджтысисны.

Ме верма чуньöн лыддьöдлыны режиссёръясöс, кодъяскöд менö сiдз ли тадз матыстлывлiс олöмыс. Дерт, тайö медводз Юрий Изюм-ский. Юрий Николаевичлöн нимыс, помнита да, юргис ылын ли матын, ичöтсянь. /д коркö республикаса быд гаж вöлi дасьтö сійö. Ад-дзысьлi жö ме сыкöд сöмын мамö отсöгöн. Сiдзи артмис, мый менам искусствояс колледжын велöдчигöн мамöй тшöтш пырис заочнöя "студентавны" орчча культура колледжö. И сылöн сессия дырйиыс ме быд прöст здукö котравлi сы дорö кыйöдны, мый нин найö, верстьö йöз, сэнi вöчöны. Тшöтш жö кывзi, кыдзи горалö ён дядьö Изюмскийлöн гöлöсыс.

Сэсся тöда Анастасия Казаковаöс, код дорын усьлiс шуд "артистасьыштны" "Коми му" газетлысь 90 вося юбилей дасьтiгöн. Виктор Напалковлысь режиссёралöмсö мойвиис жö, кыдз шуласны, ас куöн кывлыны, кор Виктор Михайлович кольöм во корлiс нуöдны "Василей" гаж.

Быд пöрйö синва петтöдз любуйтча Светлана Горчаковалöн режиссёралöм вылö. Шензьöмöн шензя, кыдзи Светлана Гениевна кужö восьтыны спектакльсö быд видзöдысь водзын, мый йирмöг весигтö босьтлö.

Но тайö став енбиа войтырыс верстьö йöз нин. Наöн абу öти вöлöк вуджöма тайö туйöдыс восьлалiгöн.

А тайö нывкаыс, код йылысь ме кöсъя неуна мойдыштны, кöть и зэв на том, а, чайта да, вермас нин венласьыштны нималана-ясыдкöд.

Анастасия Есева. Настя. Менам земляк, Кöрткерöс районса жö, Важкуръя сиктысь банйöм чужöма, восьса серама, коскöдзыс кöсаа нывка.

Настялы вöлöма вит арöс, кор орчча Приозёрнöй посёлокса артистъяслöн на ордын концертасьöм бöрас матыстчöма гудöкасьысь дорас да веськыда шуöма: "Ме кöсъя сьывны!" Сэксянь сэсся абу и лэччывлöма выль сьылысьыд сцена вывсьыд.

Дас вит арöсöн Настя пырöдчас аслас медводдза конкурсö — Кöрткерöс районса "Звезда" газетöн нуöдöм "Мисс "Звездаö" — да лоас вермысьöн. И сэк жö мыйлакö нывка зумыда лöсьöдчö лоны бурдöдысьöн, а оз артисткаöн.

Но, кыдз шуласны, мортыд кöсйö, а Енмыс лöсьöдö. Настялöн син улас веськалас кабала, кöнi корöны велöдчыны искусствояс гимназияö. Сьылысьяс лыдö нывка арлыд сертиыс эз нин лöсяв, а театральнöй студияö буретш позис пырны.

Мамсö нывлöн татшöм другысь вужвыйöн вежсьыны окотитöмыс абу падмöдöма. Сiйö сöмын шуöма, вöч пö, кыдзи кöсъян, ассьыд пö öд олöмтö олан. И Настя тiпкан сьöлöмöн воськовтiс аслас ордымöд — лэччис карö. Гимназияын буретш паныдасис сiйö мортыскöд, кодi, позьö шуны, лоис ныв ордымöд нуöдан да югзьöдан кодзулöн.

Тайö мортыс вöлi гимназияса веськöдлысь, театральнöй студия котыртысь-лелькуйтысь, талун вылö теат-ральнöй представлениеяс пуктысь режиссёръяс пöв-стысь медся нималанаыс — Виктор Напалков. Шуны кö, мый Виктор Михайлович Настялöн медся радейтана велöдысь, сiдзкö, нинöм не шуны. И сыöдз, и сы бöрти, да и öнi оз этша сы кодь муса туйдысьыс, слабог, кытшав енбиа нылöс. Но эз кö пö вöв Виктор Михайлович, меысь пö некор эз артмы татшöмыс, кутшöм ме эм öнi.

Гимназияын ыджыд ве-жöра йöз пöвстад кык воыд лэбыштöма тöдлытöг. /нi Настя стöча тöдiс, мый лоас Виктор Напалков кодь сюсь, вежöра да ыджыд сяма режиссёрöн. И мунiс эз кытчöкö, а Перымса культура институтö. Но сэтысь ковмис косны бöр — бюджет юкöныс вöлi тыр нин, а коммерческöяс — донсьыс юрсиыд сувтлö. Дерт, нывкалы вöлi аминь забеднö кöсйöмсö пöдтöмысь. Но бара жö сiйöс бурöдiс Виктор Михайлович. Некор пö оз ков шогсьыны, мыйкö кö эз ло сiдз, кыдз кöсъян. Збыльвылас пö мортыс оз вермы тöдны, кöнi сылы бурджык. Пыр пö миян культура колледжö, унджык тöдöмлун институт дорсьыд босьтан.

Тайö велöдчанiн йывсьыс Настя карö локтöдзыс абу на и кывлöма. Тöда кö пö вöлi, мый татшöмыс эм, хирург йывсьыд и мöвпыс юрö сэки эз и волы, гашкö. Колледжын Настяöс збыльысь кытшалiсны енбиа йöз: Надежда да Юрий Изюмскийяс, Вера Морозова, Надежда Гусева да уна мукöд. Накöд пö сёрнитöмыс нин ыджыд шуд, а налысь ве-лöдчöмыс — сё пöвста шуд. Танi велöдчöмкöд тшöтш Настя отсасис гимназияын Виктор Напалковлы лöсьöд-ны сэтчöс челядьлысь пет-кöдчöмъяс.

Бöръя курссö помалiгöн Настя дорö шыöдчис Сыктывкарса коми культура шöринöн веськöдлысь Валентина Самарина да корис том нывкаöс видлыны вынсö том войтыр костын выль коми сьыланкывъяслы сиöм "Койташ" республикаса фестиваль дасьтöмын. Дерт, этатшöм пыдди пуктöмыд Настялысь сьöлöмсö мавтыштöма, но сэк жö и тiрзьöдöма. А кыдз нö! Вöзйöны сэтшöмтор, мый öнöдз сöмын медся пыдi мöвпъясад бергалiс!

Но кыдзи ачыс Настя висьталö, пытшкöн пö пыр кыла, колö али оз босьтчыны сiйö ли тайö уджас. Енмыс пö али рöдительяс пыр отсалöны мыйкö ассьым аддзыны, öвсьыны ковтöмторйысь. Унаысь нин та-тшöмторсö казявлöма. Уна вöзйöмысь öтдортчöма. И "Койташад" кысянькö вылiсянь бласлöвиттöг абу жö кутчысьöма.

А му вылас бласлöвитöмла код дорö, чайтанныд, котöртiс Настя? Да, аслас муса Виктор Напалков дорö. Сöмын Виктор Михайлович дзик пыр и öлöдöма нывкатö — тэныд пö тшöктiсны, сiдзкö, ставнас аслыд и ковмас ноксьыны. Ме пö сöмын тэ бöрся кута сюся видзöдны да бöрас став бурсö да тырмытöмторсö висьтала. Виктор Михайловичлöн эм нöшта öти енби — кужö корсьны сэтшöм кывъяс, кодъяс кöть и абу ошканаöсь, но и ньöти абу дойданаöсь. Кыдзи бать велöдö ассьыс челядьсö — стрöга, но небыда.

Сэксянь Настя уна концерт да конкурс нин дасьтiс, удитiс нин лöсьöдны мöд "Койташ". Но медводдза "кагаыд" пыр коляс медся мусаöн, кöть кутшöмöн сiйö эз "чуж".

Колледжысь Настя петiс гöрд дипломöн — пуктiс гимназияса челядькöд "Ошлапей" спектакль. Мый сійö збыльысь артмис "вит" вылö, висьталö сiйöс дас витысь тыр залöн петкöдлöмыс.

Концертыд да спектакльыд торъялöны вужвыйöныс. Шуам, öтарсö кö лöсьöдан тöлысь чöж (спектакльсö), песан ас ногыд быдöнöс, то мукöд концерт водзвылас став артистыскöд удитлан паныдасьлыны сöмын кык-ö-куимысь. Спектакльын кö режиссёрöн "лöсалöма" быд воськов, быд шевкнитчöм, то концерт дырйиыд быдсямаыс овлö. И биыд вермас кусны, и шыладыд ланьтас, и кывъястö артистыд вунöдас. Сэсся спектакльыд — тайö пырджык гöгöрвоана мойд ли висьт, кодöс сöмын колö восьтыны тырвыйö, а концертнад, кöнi быд сьылысь ли йöктысь — ачыс поводнöй "роман", тайöс вöчны ёна сьöкыдджык.

Но Настялы любö уджавны сцена вылын. Торйöн нин челядькöд, кодъяс ичöт арлыд выланыс видзöдтöг мукöддырйиыс ёнджыка да öдйöджык гöгöрвоöны режиссёрöс нималана артистъяс дорсьыд.

Дерт, гаж котыртöмыд — тайö абу сöмын öтнаслöн режиссёрлöн уджыс. Да, сiйö мöвпалö, мыйджык да кы-дзджык ставыс пондас видзöдсьыны. Но ставыс колана ногöн артмö сöмын сэк, кор сiйö вермас воны öти кывйö аслас отсасьысьяскöд — йöктöмъяс пуктыськöд, шылад дасьтыськöд, серпасасьыськöд, би лöсьöдысь-кöд. Настялы аминь кокни уджавны балетмейстер Татьяна Пупышевакöд, кодi син сертиыс нин аддзö Настялысь кöсйöм-корöмсö.

И татшöм сьöлöм сетысь йöзыс век жö унджык паныдасьлöны нывлöн олöмас ышнясьысь да петитчысь дорсьыд. Та понда и уджыс сетчö кокньыдджыка. И мöвпыс жуöмöн жуö том юрас. Мед тайö мöвпъясыс коркö лэччисны енэжсьыс му вылас да пöртсисны олöмас, Настя пырис велöдчыны Санкт-Петербургса профсоюзъяс университетлöн Кировса юкöнö культураын менеджерö.

Жаль сöмын, мый абу ставыс морт сайын. Став окотитöмсö кö позис пöртны олöмас, эськö сё пöв гажаджыка да кыпыдджыка артмисны петкöдчöмъясыд. Но унджыкысьсö падмöдö сьöмöн дзескöдöм. Вöлi кö пö мый вылö лышкыдасьнытö, эськö сэк быд пöрйö позис мыйöнкö да шензьöдны видзöдысьтö. Настя весиг эз кут меным лыддьöдлыны тайö "шензьöданторъяссö" — татчö пö пырö став дивöыс, мыйöн, шуам, асьнысö убöлитöны тешитны сöмын зэв озыр йöз.

Но мед кö миян сы мында сьöмыс абу, и, гашкö, некор оз ло. Та пыдди миян эм енбиа том йöз, кодъяс мый вынсьыныс вöчöны миян гöгöрса олöмсö праздникöн. Кыдзи Настя. Кыдзи найö, кодъясöс öнi сiйö ачыс нин велöдö гимназияса театральнöй юкöнын да кодъяс Настя моз бытьöн тшöтш пондасны нимавны да нимöдны миянлысь муса Коми мунымöс.