Спортивнöя чери кыйöм да туризм сöвмöдöм йылысь миян республикаын уна во нин сёрнитöны. Öні весиг торъя уджтас дасьтöны. Но збыльмас-ö чина йöзлöн дум-водзмöстчöмыс?..

Чайта да, стöча да бура вермас вочавидзны сöмын сэтшöм морт, коді вöлöма суйöр сайын да ачыс кыснанасьлöма сэтчöс ю-тыясын. Господин Пшемыслав Маевски буретш татшöмъяс лыдысь. Сійö вöлöма мирса 40 государствоын. Уна странаын вуграсьлöма и. Локтасны-ö суйöрсайса чери кыйысьяс Комиö? Миян гöсьтлöн аслас видзöдлас.

КОМИЫН — 1996 ВОСЯНЬ НИН

Пшемыслав Маевски чужöма Польшаын. Помалöма Варшаваын видз-му овмöс кузя медшöр школаын вöр овмöс факультет. Сэні жö дорйöма вöр-ва видзöм кузя кандидатлысь диссертация. А сэсся уджалöма Польшаын, Норвегияын, Швецияын...

1996 воын Комиын вöлі котыртöма "Эзысь парма" регионса некоммерческöй фонд. Став тайö кадсö Пшемыслав веськöдлö тайö котырнас.

Пшемыслав Маевски, вö-лöмкö, ёна радейтö вуграсьны. Локтöмсяньыс кыснанасьöма республикаса зэв уна юын: Емваын, Мозынын, Вашкаын, Эжваын, Сыктылын, Лöкчимын, Лузаын, Лёхтаын, Ирваын да мукöдлаын. А сі дзжö и Сибырса юясын, нималана Волгаын...

А ГЫРЫСЬЫС ЭТША!

—Кыдз суйöрсайса олысь висьтала, Комиын вöр-ваыс збыльысь зэв мича. Весиг и вöрзьöдлытöм пармаыс эм на. Юяссö абу дорöма бетон берегъясö, кыдзи вöчöма Европаын. Сэсся тані абу уна йöзыс. Öткымын юöд кывті гöн ловъя лолöс он аддзыв, — пасйис Пшемыслав Маевски. — Вужвойтырлöн культураыс зэв вылын. Коми бура тöдö да пыдди пуктö парма-юсö, оз пакöститчы. Тадзи коркö уна нэм сайын овлöмаöсь пöль-пöчным. А нöшта вужвойтыр вежавидзысьöсь, быдöнлы дасьöсь отсöг вылö локны, "зарни киаöсь", быдтор сяммöны вöчны.

Ставыс тайö, дерт, бур. Но вуграсьысь эскöдö, мый республикаса ю-тыясын талун чериыс этша да содтöд на збыльысь гырысь сир-комыс абу. Комиын олысьяс та дорö, буракö, велалöмаöсь. Сідз, Пшемыслав Маевски висьталö, Луза юын пö шöркодя шедöны кило джынъя сиръяс, а Мозынын да Емваын — öти килоа. А муртса пö вуджан Из, серпасыс син водзад другöн вежсьö. Сибырса юясын, шуам, шöркодь сирыс 3 килоа. Ачыс сэні кыснанöн лэптöма 10 килоа некымын сир.

—Быдöн кöсйö кыйны ыджыд сир, ком, кебöс... Суйöр сайысь воöмалы арпиыд оз ков. Спортивнöя вуграсигöн тайö медся тöдчанаыс. Дерт, Комиын сöстöм ваа да мича юыс уна, но чери рöдыс зэв этша. Тайö лоö аслыспöлöс мытшöдöн, — эскöдö Пшемыслав Маевски.

И ПЫВСЯН КОЛÖ

Но, вöлöмкö, эмöсь и мукöд помкаяс. Республикаын бур туйыс абу уна. Ю йылö воöдчыны позьö сöмын вына машинаöн, а тшöкыдджыка — мотора пыжöн либö вертолётöн. А тайö турист зептысь содтöд сьöм. Вуграсьысь висьталö, мый мотора пу пыжöн кывтны бур, но сысянь вуграсьны зэв сьöкыд. Öти-кö, джоджыс абу. Пыжсянь кыснанасигöн пыр лоö видзчысьны, медым ваас он путкыльтчы. Сэсся колö и бурджык пуклöс да пелыс. Абу и якöр. Мукöд странаын татшöмыс абу, пыжад йöкты кöть узь.

—Жаль, но пыж пыдöсын гöвкъялö ломтас-мавтас колясыс. Вужвойтыр та дорö, тыдалö, велалöмаöсь. А су-йöрсайсаыдлы тайö оз кажитчы. Сійö татчö локтас нимкодясьны вöр-ваöн, лолавны сöстöм сынöдöн, а оз апавны бензин дук, — шуö Пшемыслав Маевски. — Сэсся абу и пыжсянь берегö петані ныс. Комиын вöр керкасö пыр мичаинö кыпöдöны. Сэк жö уналаын керка пытшкыс абу сöстöм, оланін гöгöр туплясьö быд сикас лöп-ёг. Дерт, колö и пывсян, медым вуграсьöм бöрын гöсьт вермис мыссьыны-корöсясьны.

Дерт, öтуввезйын öткымын фирма öні вöзйö кыйны Комиын весиг нельма да чими. Но ставыс тайö, тыдалö, закон торкöмöн. Öд сійö жö нельмасö пыртöма республикаса Гöрд книгаö. А суйöр сайысь воöм морт чери кыян правилöястö да мукöд законтö век пыдди пуктö. И öтчыд кö сійöс мыждасны да, Ен мед видзас, кыскасны кывкутöмö, мöдысь ачыс некор оз лок и ёртъяссö на öлöдас.

СУЙÖР САЙЫН БУРДЖЫК?

Вуграсьны радейтысьяс öні ветлöны мир пасьта. Тайö бизнесыс талун ёна сöвмöма. Сідз, Швецияын чери кыян лицензия ньöбигöн сетöны юыслысь либö тыыслысь карта, кöні пасйöма быд йир да ляпкыді н. А сідзжö ясыда гижöма, кутшöм чери да кöні позьö кыйны, мый оз оз позь вöчны. Индöма, мый позьö вöдитчыны сöмын тоштöм куим вугырöн, медым мездігас черилöн вомыс кыдз позьö омöльджыка доймис. Лицензияын урчитöм серти, позьö кыйны сöмын 45 сантиметра да гырысьджык судак. Пыжлöн пуклöсас эм линейка, медым вермин мерайтны.

Сідзжö позьö босьтны пелыса пыж. Луннас сыысь колö мынтыны 300, а мотора пыжысь — 1.600 шайт.

—Комиын татшöмыс öнöдз абу. Аслыд колö тöдмавны, кöні да мыйöн позьö кыйсьыны, кутшöм рöд быть колö бöр ваас лэдзны. Республикаса лавкаясын тоштöм вугырсö öдвакö ньöбан. А мый вöчны, кыснанасигöн кö весьт кузя комыс вугырсö ньылыштас? Та йылысь öдвакö кыськö тöдмалан. Юö лэдзöм бöрын татшöмыд, дерт, кулö. А сьöрсьыд кö босьтан, инспекцияын уджалысь тэнö жö и мыждас, — шензьö вуграсьысь.

Талун мир пасьта вуграсьöны аслыснога. Кыйöм черисö веситöны, снимайтöны сійöс казьтылöм вылö да... бöр лэдзöны. Сöмын юква вылö босьтöны öти-кык лов. Но и тадзисö вуграсьны вöлöм колö кужны. Кыснанö кöрталöны öти тоштöм вугыр, сьöрысь колö босьтны сак, медым кыйдöссö дойдавтöг лэптыны, черисö киö босьтöны кöтöдöм торъя кепысьöн. Суйöрсайса вуграсьысь – тайö медводз закон пыдди пуктысь да кывкутысь морт. Лёксö юлы ни сэні уялысьлы некор оз вöч.

ЖАР АФРИКАЫН

Казьтылі нин, Пшемыслав Маевски волöма мирса уна странаö. Сійö казьтыліс Африкаö бöръя ветлöмсö. Кабо-Верде Республика, 1986 воöдз сійö шусьöма Острова Зелёного Мыса Республикаöн, меститчö Атлантическöй океанлöн войвыв юкöнын 10 ыджыд да 8 ичöт ді вылын, Сенегал Республикалöн рытыввылын.

Сэтчöс гостиницаыс зэв пö бур: узьланін, мыссянін, чöскыд сёян-юан... Лун-вой олöмысь колö мынтыны 700 доллар. Мотора пыжöн öти лунö вöдитчöмысь да сэтчöс вуграсьысьöс медалöмысь колö вештыны 80 доллар. А чери кыйöмыс пö мойд кодь. Пшемыслав Маевски висьталö:

—Кыйи кык ваху чери. Öтиыс — 7, мöдыс 10 килоа. Ок и пессисны-нöйтчисны, кор вугырöс тшапкисны. Спиннинг шатьöй мегыр моз нюкыльтчис. Татшöмторйыд нэм кежлö паметьö йиджö. Сэсся шедіс саридзса 20 кымын ёкыш. Ассьым дзик став кыйöм черисö торъя журналö пасъяла. Кодсюрö радейтö кыйны саридзса медся гырысь черисö. Сідз, марлинлöн сьöктаыс овлö 700 килоöдз. Татшöмтö öтнадöн он вермы лэптыны. Некымын час сыкöд лоö тышкасьны. Некымын морта котыр öта-мöдсö вежöмöн воюйтöны. Меным вуграсьöмыс – аслыспöлöс ордйысьöм, но ставсö ачым вöча: некымын дас килоа чериыд ва веркöсын чеччалö да нöйтчö, зі льö вугырысь мынтöдчыны...

Африкаын, вöлöмкö, позьö бура вуграсьны и пляж берегсяньыс, кысянь йöзыс суналöны-варччöны. Сöмын пö колö кузь спиннинг да сьöкыдджык груз, медым кыдз позьö ылöджык самсö саридзö вöйтны. Кыкысь пысасьлöма сэтшöм ыджыд чери, мый вуграсьысь сыкöд нинöм вöчны абу вермöма. Ваын олысьыс абу весиг петкöдчылöма, быттьö пö каньöн-шырöн ворсігмоз первой öтарö-мöдарö шлывкъялöма, а сэсся терпенньöыс потöма да веськöдчöма веськыда саридзö. Ёнсьыс-ён жилкаыс триньöбтöма-орöма.

ИСПАНИЯЫН ЧЕРИТÖ ЛАВКАЫСЬ НЬÖБÖНЫ

Пшемыслав Маевскилы ёна кажитчöма вуграсьны Испанияын. Вежон коллялöма сэтчöс öти ю дорын. Мынтöма ставсьыс 25 сюрс шайт. Вичмöдöмаöсь ю бокö кыпöдöм торъя керка, кöні эм сёяні н да узьлані н, веранда, дерт, и пöсь ва, весиг и чери керан торъя места. Сетöмаöсь мотора пыж да 20 литр ломтас. Испанияын чериыс зэв гырысь. Сідз, тшöкыда шедлывлö 100 килограммöдз сом, карп – 20-öдз, судак – 6-öдз... Но вуграсьысьяс кыйдöссö бöр ваас лэдзöны. Öд йöзыс шойччöны, а свежöй черисö позьö лавкаысь ньöбны.

А Испанияын вöр-ваыс пö мичасьыс-мича. Юыс сöстöм, гöгöр лэбалöны быд сикас варыш-кутшыс, бакланыс да цапляыс... Некытысь пö он аддзы кабалатор ни тыртöм сулея.

Абу дона вуграсьнытö и Швецияын. Сэні ю дорын вермö шойччыны быд окотитысь: вуграсьны радейтысь кöть вöр-ваöн нимкодясьысь. И бара жö оз ков уна мынтыны. Вежон тадзи шойччöмыс сувтö муртса 8-9 сюрс шайт. Вöрса керкаас эм и кöдзыд да пöсь ва. Сэсся вуграсьысьöс могмöдöны став колананас, шатинсянь мотора пыжöдз.

–Суйöр сайын вöчöны ставсö, медым мортыс мöдысь дай коймöдысь на воліс шойччынысö. Бизнесыд – тайö кывкутана удж. Дерт, позьö ылöдлöм-бöбйöдлöмöн сьöм кульыштны, но мöдысь мортыд некор нин оз волы. Та вöсна суйöр сайын зільöны аскиа лунö видзöдöмöн: донсö енэжöдзыс оз лэптыны, медым волысь тыр-бура шойччис да нöшта на став тöдсасö да рöдвужсö ышöдіс тшöтш волыны, – висьталö Пшемыслав Маевски.

А КОМИЫН?

Сьöкыд шуны, кор ставыс тайö лоö миян республикаын. Уджтастö дасьтыны абу сьöкыд. Но кыдзи сійöс олö-мö пöртны? Дерт, Финляндияын эм чериыс, гырысьыс да донаыс. Öд сэні чери рöдмöдан 156 овмöс. Быд предприятие, коді пуксьöма ю-ты берегö, аслас нажöвитöм сьöмысь мынтö торъя вот. И тайö сьöмсö вичмöдöны буретш чери рöдмöдöм вылö. Суомиын быд во ю-тыö лэдзöны арпиянöс.

Комиын уна гырысь предприятие. А коді на пиысь сетö сьöм тайö зэв колана удж вылас? Уна и мукöд юалöмыс. Чайта да, став гöрöдсö разьны абу кокни. Но, гашкö, медводдза воськовсö колö вöчны...