Таво Чужан кывлысь лун пасйигöн том йöзлöн "Ми" котыр нуöдіс сідз шусяна флеш-моб, кодöс вöлі сиöма коми кывлы.

Февраль 21 лунö дас кык часын ныв-зон чукöртчисны Сыктывкарса шöр пошта дорын. Сэсся разі-пели котöртісны Коми Республикаса Юралысьлöн да правительстволöн керкалань. Том йöз сувтісны стрöйбалань мышнас, кытчö вöлі гижöма "Ме радейта коми кыв". Здук сулыштöм бöрын флеш-моб котыртысьяс бергöдчисны правительстволöн керкалы паныд да водзаныс паськöдісны "Коми му" газетъяс. Недыр чöв сулыштöм бöрын сюв-сяв котöртісны Сыктывкарса администрациялань. Сэні бара жö тадзикöн сулалісны.

–Мый могысь ті петінныд карса улича вылö? – юалі флеш-моб котыртысьяслысь.

—Тайö акциянас ми кöсйим петкöдлыны, мый коми кыв сöвмö, а оз кус, – висьталіс Сыктывкарса коми культура шöринын уджалысь Ольга Аверина.

–А мыйла сулыштінныд буретш КР-са Юралысьлöн да правительстволöн да карса администрациялöн керкаяс водзын?

–Мед власьтыс аддзыліс, мый ми – комияс.

Ог тöд, казялісны эз чина йöз коми том йöзлысь водзмöстчöмсö. Öшиньяс пыр тай некод эз тыдав-а. А вот кöзяинтöм пон вöтлысис чужан кывлы сиöм акция котыртысьяс бöрся. Весиг накöд орччöн тшöтш пукаліс...