Тавося тöвшöр тöлысьö бара артмис ветлыны Мордовияö, сэтчöс Саранск юркарö уджмогöн. Быд ветлiг казяла сэні кутшöмкö выльтор, аддзывлытöмтор. Кöть куим лун сöмын вöлi, синмö шыбитчис унатор: миян дорысь лымйыс усьöма ёна унджык, донъясыс век на ичöтджыкöсь, сöмын йöзыслöн быдлунъя тöждыс öткодь. Тайö гöгöрвоана: öти Россияын олам, öти гаж-шог тöдам. Сэтчö мyнiм Мöскуаса том менеджеръяскöд öти купеын, нуöдöны вöлi Мордовияö Чехияса öти фирмаысь йöзöс асланыс могöн. Россияса том йöз ёна видiсны бизнесын öнiя артсö, федерацияса правительстволысь нырвизьсö, пöдтöны пö быдсяма вотнас мыйкöтор збыльысь вöчысьяссö.
Саранскса шöриныс ёна вежсьöма, быдлаын мыйкö кыпöдöны, стрöитчысьяс жуöны-уджалöны. Вöлöмкö, 2012 вoын сэнi нуöдасны ыджыд гаж, кодöс сиöма мордва войтыръяслöн Россияса мукöд йöзкöд öтувтчöмлы 1000 во тырöмлы. Тайö кадпассö мудера мöвпыштöмаöсь, юрсьыныс босьтöмаöсь. Та могысь сэтчöс президентыс корöма Россияöн веськöдлысьяслысь зэв уна сьöм. Тайö кад кежлас жугöдöмаöсь карса стадионсö да сы местаö кыпöдöны сiдз шусяна "Öтувтчан изэрд". Мордваса университеткöд орччöн сулалысь ыджыд шöр стрöйбасö ставнас разьöмаöсь да сы пыдди воöн-джынйöнöн кöсйöны лэптыны 14 судтаа выль университет стрöйба. Сьöмыс пö воöма нин.
Университет йылысь колö пасйыны торйöн, öд сэтчö уджмогöн и ветлi. Сiйö зэв öдйö быдмö! Буретш менам волытöдз эштöдöмаöсь кыпöдны кык ыджыд стрöйба: 9 судтаа Национальнöй культура институт да Культура да сяммич (искусство) двореч. Буретш вöлi факультетъяс да мукöд служба сэтчö вуджöны, выль ота уджвежöсъяс да аудиторияяс овмöдöны. Пыралi тшöтш нимкодясьны выль велöдчанiннас. Орччöн сулалысь дворечас позяс нуöдны кыпыд рытъяс, концертъяс да ордйысьöмъяс. Бур ног веж петiс. Сöмын öтитор шензьö-дiс: выльлаас местаыс абу сюрöма филология факультетыслы, кытöн велöдчöны эрзя-мокша кывъяс туялысь студентъяс.
Пукалi дорйысьöм вылын. Докторлысь диссертация дорйис Андрей Данилович Каксин, хант кыв туялысь öти тöдса. Бура дорйысьöм бöрас кытшовті уличьясöд. Казялi уна юöр — конькиöн став Россияса ордйысьöм вылö корöмъяс. Вöлöмкö, кыпöдöмаöсь сэтшöм бур йиа двореч, мый позьö сэнi нуöдны татшöм тшупöда венласьöмъяс. Волi тшöтш некымын во сайын кыпöдлöм сэтчöс национальнöй драма театр дорö. Керкаыс дзик на выль кажитчö. Афишасьыс тöдмалi: театрыс уджалö тыр öдöн, пуктöны весиг рочысь вуджöдöм спектакльяс, шуам, Алексей Толстойлысь. А öд дас вит во сайын на мордвалöн аслас кывъя театрыс эз вöв. Ветлi тшöтш сэтчöс шöр небöгкудйö, видзöдлі выльöн петöм книгаяс да газет-журналъяс. Видзöдалi найöс да казялi öтитор: сэнi "пöльтöны"-кыпöдöны ассьыныс президент Н.И.Меркушкинöс. Быд газетын зэв уна сы йылысь гижöдыс, кытчö ветлöма, кодкöд сёрнитöма, мый шуöма. Со и "Россия" телеканалса журналист Сергей Брилев Меркушкинлысь ыджыд интервью босьтöма, Мордовиялы сиöм "Федерация" нима торъя петас пö дасьтö. А, гашкö, збыльысь зэв унатор вöчö тайö мокша-мордва аймортыс аслас чужанiнлы. Гижöны, 2018-öд воö пö Россияын лоас футболысь ставмуса ордйысьöм, мунас 13 карын, тшöтш и Саранскын. Сiдзкö, федерациясянь виччысьöны лыдтöм сьöм, сэк кежлö бара унатор кыпöдасны.
Быд воськолысь тöдчö тайö муыслöн сöвмöм-вежсьöмыс, тшöтш и сэтчöс кывъя прессаысь. Шуам, сэнi 2002-öд восянь пондöмаöсь йöзöдны эрзя кыв вылын том йöзлы литература журнал, нимыс "Ратор", кутшöмкö ю ним серти шуöмаöсь. Челядьлы эрзя кывъя "Чили сема" ("Асъя кыа") журналыс 32 лист бока, 4 печатнöй лист ыджда. А миян озыр республикаын "Би кинь" сöмын 16 лист бока (йöзöдан ыдждаыс кык пöв ичöтджык).
Позьö унатор на лыддьöдлыны и ясыда гöгöрвоан: дыр кад чöж узьысь Мордовия бöръя воясас сöвмö вöвлытöм öдöн. Кызвыннас Москваысь пычкöм сьöм вылö, öд сэтчöс веськöдлысьяс оз яндысьны шуны ас мусö дотация босьтысьöн да кужöмöн корöны сьöмсö водзö сöвмыны, ас йöзыслысь олöмсö бурмöдны.
