Лидия Александровна Кислицына ичöтсяньыс сьывны радейтöма. Налöн семьяын, и бать-мамыс, и нёльнан нылыс ливкйöдлöмаöсь коми да роч сьыланкывъястö.И талун Лидия Александровна верöсыскöд, коді велöдчöма весиг гудöкасьны, окотапырысь петкöдчöны сцена вылын. Муртса лун-мöд сайын найö "Ворс, гудöк!" котыркöд гажöдöмаöсь Сыктывкар бердын Улыс Човса интернатысь ветеранъясöс.
НИМАЛАНА АРТИСТ ОШКÖМА
Миян республикаö Геннадий Заволокинлöн волöмыс вöлі збыльысь ыджыд праздникöн. И таын нинöм шензянаыс абу. Россияса народнöй артист, государственнöй премияа лауреат Геннадий Дмитриевич вöлі да кольö медся радейтана артистъясысь öтиöн.
Сэки чукöртчылöмаöсь и сьылысьяс да гудöкасьысьяс, и "Ворс, гудöк!" передача видзöдысьяс. Сэкся гажыс öнöдз кольöма йöзлöн сьöлöмас. Геннадий Дмитриевич ачыс гудöкасьöма да сьылöма и мукöдлы сетöма позянлун петкöдлыны енби-сямсö.
Öнöдз на Кислицынъяс пöся казьтылöны тайö аддзысьлöмсö. Нималана артистöс пö ловъя кытшö босьтісны. Геннадий Дмитриевич зільöма кыдз позьö унджыкöс кывзыны, и бур передача дасьтöма-гижöма. Сійö кытшас вöлöмаöсь и Кислицынъяс. Иван Григорьевич ворсöма гудöкöн, а Лидия Александровна — ливкйöдлöма-сьылöма. Гозъялöн петкöдчöмыс сэтшöма кажитчöма, мый Геннадий Заволокин козьналöма налы календар, кытчö пуктöма ассьыс кырымпас.
43 ВО ÖТЛАЫН
Лидия Александровна чужöма да быдмöма Луздор районса Занулье сиктын. Сизимöд классас велöдчöма Читаёвса школаын нин. Сэки сиктса мортыдлы паспортсö абу сетлöмаöсь, медым эз вермы пышйыны карö. Школаса директорыс и вöзйöма, Лида пö, вай гиж пись-мö Сыктывкарса 1 номера педучилищеö. А тöданныд, мыйла? Да 14 арöссянь нывка пусьöма детсадйын, посни челядькöд ноксьöма. Педучилищеысь вочакывйыс воöма да Лидалы сетöмаöсь паспорт, мун пö да водзö велöдчы.
Первой курсын велöдчысьяс арнас керöмаöсь картупель Сыктывдін районса Ыб сиктын. А карö ныв лэччöма дзик öти плащöн. Паськöмыд, дерт, няйтöссьöма. Песлалöма эськö, но плащыдлöн рöмыс быгалöма. Кöть караул горзы! Татшöмнад пö училищеö ог жö мун, аслам юрöй усьö дай бать-мамöс янöда.
Сэки син улас веськалöма юöр: юркарын кампет вöчан фабрикаö колöны уджалысьяс... И 16 арöса ныв воöн-джынйöн зільöма сэні. Общежитиесö абу сетöмаöсь, а патера медалöмысь колö сьöм мынтыны. Но нывлы бара мойвиöма. Тöдсаыс висьталöма, Сыктывкарса вöр пере-работайтан комбинатö пö ко- лöны уджалысьяс. И сэні сетöны оланін. Мунöма ставсö тöдмавны. Кадръяс отделын юалöмаöсь, шыöдчöмсö пö талун гижанныд али лун-мöд мöвпаланныд? Сійö корöма ручка да кабала. Аскинас нин зільöма учётчик-бракерöн...
Тані и аддзысьöма Иван Кислицынкöд. Ворсöмаöсь гажа кöлысь. Верöсыс рöднас орчча Киров обласьтысь. Школасö помалöм бöрын велöдчöма Луздор районысь Ношуль сиктса 4 номера ФЗУ-ын вöр промышленносьтса механизаторö. Общежитиеын олігöн на киас веськалöма гудöк. Рытъяснас заводитöма велöдчыны ворсны. Но ёртъясыс дöзмöмаöсь. Иван, тэнад низгöм-сьыд пö пельным нин сьöдмис... И сійö вöлöм кыв шутöг босьтö гудöксö да мунö кер бунтъяс костö... Тані пö некодöс нин ог дöзмöд. Но прамöя ворсны абу велалöма. Босьтöмаöсь армияö. Пограничникалöма Ленинград обласьтса Выборг кар дорын. Гортас воöм бöрын бара чукöртöма ноп да лэччöма Сыктывкарö. Медасьöма ЛДК-ö трактористöн.
43 во гозъя öтвылысь олöны-вылöны. Иван Григорьевич эськö роч морт, но öні комиöн бура сёрнитö. И велалöма гудöкасьнытö. Ачыс нюмъялö:
—Но, а мый вöчан? Гöты-рöй радейтö сьывны. Быть лоис выль пöв босьтчыны гудöкасьны.
БАТЬÖЙ ОК И БУРА ГУДÖКАСИС...
—Батьöй, Александр Семенович Яборов, ок бура гудöкасис. 7 во флотын служитöма. Лыдтöм-тшöттöм сьылан тöдіс. Праздник лунö заводитас вöлі ворсны да, керка дорö йöзыс чукöртчасны сійöс кывзыштны. А мамöй, Ольга Васильевна, да ми — нёль чой — вöлі сьылам, — казьтылö Лидия Александровна. — А батьöс ёна пыдди пуктылісны. Кувсьöм бöрас Кыддзавиддзын дзик став олысьыс воліс колльöдны сійöс бöръя туйö...
Лида водз босьтчöма артиставны. Витöд классын нин школаса мукöд велöдчыськöд öтвылысь концертъясöн ветлöдлöмаöсь районса сикт-грездö. Лида сьылöма да ёрт-акробатъясыскöд петкöдлöмаöсь торъя номеръяс. Сиктса олысьяс татшöмтö сэки некытысь эз аддзывны.
РÖДВУЖ ЛЫДАС... ВАСИЛИЙ ЮХНИН
—Нималана гижысьлöн гöтырлы, Наталья Васильевналы, ме лоа племянничаöн. Юхнинъяслысь семьясö бура тöдлі. Ыджыд аттьö гозъялы. Вась дядь пыр вöлі шуö, Лидук пö, бобö, колö велöдчыны, — казьтылö Лидия Александровна. — Ме, дерт, кывзыси. Помалі карын рытъя школа, сэсся уджысь орöдчывтöг вöр техникум... Веськöдлі предприя-тиеса партийнöй котырöн да профсоюзлöн ревизионнöй комиссияöн, 25 во зіли бöрйысьöмъяс дырйи. И быдлаö Вась дядь ышöдліс.
Нималана гижысь радейтöма нывкаöс. Кор Василий Юхнин шойччöма Крымын, Занульеö воöм бöрас Лидалы козьналöма крепдешин кöсынка, шöвк галстук, тетрадь да книга видзан чемодан-балетка, гежöд кодлöн сэки сійö вöлöма, а нöшта — "Звезда" часі...
Яборовъяс дорö гöститны волігöн гижысь пыр вайлöма гöснеч: кампет да карса кöлач. Лидалы да Анна пöчлы кöлачыс вöлöма медся чöскыдторйöн. Занульеын сійöс сэки абу вузавлöмаöсь. Л.А.Кислицына казьтылö, мый Юхнинъяслöн семьяын быдмысь нывъяслысь кольöм паськöмсö сылы сетлывлöмаöсь. Тадз пö и быдми. И таысь налы муöдз копыр да ыджыдсьыс-ыджыд аттьö. Сиктса нывлы пö тайö вöлі збыльысь ыджыд отсöг. Сöмын кöмкотыс абу лöсявлöма, менам пö кокöй вöлі ыджыдджык.
Аньлöн кывъяс серти, Василий Васильевичöс радейтöмаöсь Луздор районса олысьяс. Гижысь вöлöма веськыд мортöн, некор ловнас абу усьлöма, пыдди пуктöма уджалысь мортöс... Василий Юхнин олöма Сыктывкарса Первомай уличаын. И аслас патераын окотапырысь вочаавлöма луз- дорсаясöс. Быд локтысьöс пö вердö-юкталö вöлі, узьтöдö и.
—Василий Васильевичöс, дерт, пыдди пуктім. И вöлі мыйысь. Сідз, книга йöзöдöмысь сылы сетöмаöсь сьöм. Мöд, гашкö, машина босьтіс али нöшта мыйкö. А сійö ньöбöма пилорама да вайöма Занульеö. Медым колхоз вермис пилитны аслыс брус да пöв, — пасйис Лидия Александровна. — Талун тай тадзисö некод оз вöч. Ни гижысь, ни артист...
ЧУЖАН МУЫД ТАЙ КЫСКÖ
Быд во Лидия Александровна ветлывлö чужан муас. Кыскö пö сэтчö, кöні кольöма томдырыс. Дерт, копыртчылö батьыслöн гуыслы. Мамыс, Ольга Васильевна, майбыр, öнöдз на ловъя. Сылы 88 арöс. Буретш сы дорын и чукöртчылö став рöдвужыс. А тайö кызь мортысь унджык — ныв-зятьыс да внук-правнучкаыс. Ыджыд пызан сайын казьтылöны бöрö кольöм вояссö. Дерт, юргöны и коми сьыланкывъяс.