Кольöм воыс Сыктывкарса "Анбур", "Кола", "Титул", "Седьмая печать", "Эскöм", "Милета" издательствояслöн, "Арт" журналлöн, "Коми му" газетлöн, гижысь котырлöн небöг лэдзанiнъяслöн, а сiдзжö республикаса национальнöй политика министерстволöн, позьö шуны, вöлi "тшака-вотöса". Найö öтув лэдзисны матö комын небöг. И тайö, лыддьыны кö сöмын художествоа литературасö.

Абу ичöт пайыс танi коми кывъя петасъяслöн. Сикасыс небöгыдлöн тырмымöн — проза, кывбур, историяысь, челядьлы лыддьöм вылö. Сöмын лыдыс тай шогöдö-а. Кутшöм кöть книга он босьт, некодлöн на пиысь тиражыс весиг сюрсыс абу, кыдзи, шуам, вöлі водзтi. Кодöскö лэдзöма муртса нёльсё сайö, кодöскö витсё, кодöскö сизимсё экземплярöн. Этшалы мойвиöма петны кöкъямыссё-öкмыссё лыдöн.

Вайö видзöдламöй, кытысь жö босьтчöны талунъя тиражъясыс. Тöд вылын кутам, мый тайö ставыс лыддьыссьö социальнöй тöдчанлуна литератураöн, сiдзкö, государство ас тшöт весьтас лэдзö книгаяссö, медым бöрыннас разöдны лыддьысьысьлы. Йöзöс велöдан да культура министерствояслысь корöмъяссö чукöртöны печать кузя агентствоö, кодi арталö ставсö да сэсся вуджöдö колана сьöмтö издательстволы, кöнi кутас петны небöгыс.

Босьтам пример вылö республикаса народнöй гижысь Геннадий Юшковлысь "Чукöсты, Коми му, чукöсты" бöръя небöгсö, кодi петiс кольöм во сизимсё лыдöн.

Корöм пайсö тиражыдлысь, кыдзи и колö, ыстöны йöзöс велöдан министерствоö.

Миян республикаын районса, карса да республикаса матö сизимсё ветымын библиотека. На лыдын тшöтш и школасаыс.

Республикаын ставыс лыддьыссьö нёльсё кык школа. Комисö, кыдзи чужан кыв, велöдöны на пиысь сöмын нёльöд паяс – сё школаын, татшöмыс медуна Кöрткерöс, Кулöмдiн, Сыктыв да Сыктывдiн районъясын.

Некымын книгаöн воö ставнас Мылдiн район пасьталаö. Чинiс пö коми посни лыддьысьысьыд Удораын. Княжпогост районын сöмын Сьöськаса школаö воö коми небöгыд. Инта районын — Петруньö да Печора районса гоз-мöд школаö. Сё библиотекаö коми небöгтö бытьöн ыстöны кык-ö-куимöс.

Ковтöмöсь найö Воркутаса, Сосногорскса, Чилимдiнса школаясын. Сэтчö оз и ыстыны. Кöть эськö, менам чайтöм серти, быдлаын позьö аддзыны коми кыв тöдысь либö тöдны окотитысь велöдчысьтö. Да и мукöд школаас, мед оз кö велöдны комитö, кыдзи чужан кыв, но öд велöдöны, кыдзи государственнöйöс. Сэсся дзик быд школаын мыйкö да öд висьталöны жö Коми Республика йывсьыд да кымынкö кывйöн коркö быть казьтыштöны тшöтш и коми гижысьясöс. Но кыдзи меным висьталiсны йöзöс велöдан министерствоын, сэтшöм кö пö нин окота лыддьыны коми книгатö, позьö ветлыны сиктса библиотекаö.

Тайö министерствоас велöдан небöгъяс вöсна кывкутö быдса юкöн – учснаб. Сэнi эм торъя морт, кодi босьтö небöгсö типографияысь, юклö найöс, ысталö. Та вылö вичмöдöма и сьöм. Дерт, сэсся учебникъясыд воасны быд школаö – рочö и комиö.

А сiдз шусяна социальнöй тöдчанлуна литературанад, збыль вылас кö, ноксьынысö и некодлы. Сьöмсö найöс разöдöм вылö тшöтш жö некöн абу урчитöма. Со и ыстöны ас прöст кадас, ас ичöтик позянлун сертиыс татшöм небöгтö сöмын налы, кодi, кыдзи водзын висьталi нин, велöдö комитö, кыдзи чужан кыв. Кöть нин пö мед найö тöдласны выль петас йывсьыд.

Тадзинад артмö, мый Юшковлöн небöгыс школаясö воис эз уна ни эз этша, кык-сё ветымын экземпляр.

Водзö видзöдлам, кыдзи книгасö разöдöны культура министерствоын, кодi кывкутö библиотекаяс понда. Республикаса национальнöй библиотекаын эм юкöн, кытчö воö книга кузя став корöмыс кар-районъясысь. Найö сэсся шыöдчöны министерствоö да висьталöны, уна-ö небöг колö на тшöт весьтö.

Юшковлысь корöмаöсь вöлi кыксё нелямын нёль небöг. Лои ыстöма быдöнлы. И мукöдыслы весигтö абу öтиöс. Со Кулöмдiн районлы комын небöг, Кöрткерöслы – дас вит, Княжпогостлы да Удоралы – дасöн.

Но тайö бара жö, тöдчöда, сöмын налы, кодъяс корисны. А тадзсö вöчöмаöсь абу ставныс, кöть эськö быдöнлы вöлі юöртöма петас йывсьыд. Мыйын танi помкаыс, код пö тöдас. Гашкö, бара жö чайтöны, мый коми гижысьыд роч сиктад оз ков, а, гашкö-й, кутöны лача школаса библиотека вылö.

Министерство борд улын ставыс нёльсё гöгöр библиотека. Танi и артышттöгыс тыдалö, мый Юшковыд непöштö кык, а весигтö и öтиöн эз во став библиотекаас. А эз кö сэтчö, эз во и лыддьысьысьöдз.

Со тадзи öта-мöд вылö надейтчöмöн вочасöн и öтдортам йöзтö коми небöг дорсьыд. Мам кывсьыс öвсьöдам. А сэсся шензям, мыйла Коми Республикаын коми йöзыс чинöмöн чинö…

Неважöнöдз, гашкö, помнитанныд на, коми небöгтö некытысь он вермы вöлi ньöбны. Тöдан, мый авторъясыс гижöны, тöдан, мый найöс йöзöдöны, тöдан, мый кöнкö петöны книгаясыс. А ньöбöм могысь кöть лун шöра лунö сиська биöн корсь, он аддзы.

Со татшöм шензьöдана серпас. А ставыс вöлi сы понда, мый государство водзтi вичмöдлiс сьöмсö ставнас тираж вылас. Шуам, петiс "Чукöсты, Коми му, чукöсты"-ыд сизимсё тиражöн. И став сизимсёнаныс водзтi эськö мунiс государстволы, сiйö жö министерствоясыслы. И ни öтиöс бокö вузалöм вылö эз позь вичмöдны, кöть сэсся мый вöч.

Öнi жö, йöзлöн шуасьöм бöрти, серпасыс неуна веж-сьыштiс. Государство небöг лэдзöм вылö вичмöдö оз став тираж вылас, а сöмын сы мыйта, мында сылысь корöны кык министерство.

Пример вылö танi вайöдöм Юшковыд эськö сiдзи и петiс витсё гöгöр тиражöн – öд сöмын та мында корисны республикаса библиотекаясö. Но мед мыйтакö вузöс вылад вичмис жö, государство öнi тшöктö издательствояслы аслыныс корсьны сьöм содтöд тираж вылö. Мыйта пö верманныд корсьны, сiдзкö, сы мында и позяс вузавны.

Республикаса гижысь котыр, кодi и лэдзис Юшковлысь книгасö, сьöмсö аддзис нöшта кыксё экземпляр вылö. И артмис сiйö тиражыс, мыйта и урчитöма – сизимсё.

Со, буракö, и ставыс. Министерствояс, кодъяс вермöны аслыныслы корны быд книга кöть сюрс тиражöн, медым найö воисны кöть нин дзик быд библиотекаö (став корöмсö öд могмöдасны), кабырö тöрыштан тиражъясöн тёльскöдчöны. А издательствояс, кодъяслы окота, мед книгаясыс воасны лавкаясö, кöть нин кодлыкö да кианыс веськаласны, оз тöдны, кытысь чуктöдыштны китыр сьöм содтöд тираж вылö.

Миян республикаын матö öкмыссё ветымын сюрс олысь. На пиысь комиыс – кыксё сюрс гöгöр. Но, мед, шуам, на лыдын сэтшöмыс, кодi кужö на да кужö нин лыддьысьнытö мам кыв вылас, öкмас сё сюрс гöгöр морт. Гöгöрвоанныд: сё сюрс мортлы сизимсё небöг! Налöй, нимкодясьöй, коми йöз, асланыд коми книгаясöн!

Национальнöй политикаса министр Валерий Коробовлöн кывъяс серти, ичöт тиражыд пö аслысног пет-кöдлö, кутшöм книгаяс талун збыльысь коланаöсь, а кутшöмöс весиг оз кутны восьтывны. Небöгыд пö петас да сiйöс кö пондасны кватьлавны кинас и кокнас, позяс бöрыннас содтöд лэдзны.

Öти боксянь, тайö, дерт, бур – дзик нинöмла видзны государстволысь сьöмтö да лэдзны бумага шыблас (макулатура). Но мöдарсянь кö, медым тöдмавны, збыль-ö лыддяна лоас небöгыд, колö сiйöс медводз петкöдлыны йöзыслы.

А тадзинад артмö, мый мукöд небöг лэдзöм йывсьыд сикт-грездъясад весиг оз кывлыны, и кытысь, сiдзкö, налы гöгöрвоны, лыддяна книгаыс али абу?..