Помтöм-дортöм эрдйын йирсьöны кöръяс, неылын чум, а енэжас ворсöдчö-пöртмасьö войвывса кыа... Сьöлöмö йиджана серпас, кодöс кöть öтчыд да окота ас синмöн аддзывны да, дерт, и нимкодясьыштны.

Тундраын олысь-зільысь йöз йылысь сöвет власьт кадö уна гижлісны, весиг и кино снимайтлісны. И талун, овлö, йöзöдöны газет-журналъясын гижöдъяс. Кöр видзысьяслöн уджыс да олöмыс зэв аслыспöлöс, содтöд и сьöкыд. Кар-посёлокын олысьяс ловъя кöртö, гашкö, телевизор пыр и аддзывлöны. Сэсся и оз на быдöн тöд, мый миян республикаын тайö пемöсъяссö видзисны эз сöмын войвылын, но и кольöм нэмын Эжва йылын. И ловъяöсь на йöзыс, кодъяс зільöмаöсь кöръяс дорын, на лыдын Николай Николаевич Юдин.

СКÖРÖДУМСА КÖР ВИДЗЫСЬ

Николай Юдинкöд мойвиис тöдмасьны Кулöмдін районса Скöрöдум сиктын. Николай Николаевичлы 71 арöс, но öнöдз на крепыд да тэрыб вöраса.

— Армияын служитöм бöрын медаси кöр видзысьö, — казьтылö олöма морт. — Сэки тані вöлі "Ленин" нима колхоз. Сэсся сёрöнджык нимсö вежисны. Миян бригадаын зілис вит морт. Веськöдлысьнас вöлі Фёдор Васильевич Хозяинов. Сылöн батьыс Великöй Отечественнöй война воясö тундраысь Эжва йылö вайöдöма кöр стада. Фёдор Васильевич — енбиа пастук, ставсö вöлöм сяммö вöчны. Батьыс, майбыр, быдторйö велöдöма. Да и пиыслöн старанньö-писькöслуныс уна жö вöлі. Кöть мый эн шу, а кöр стадаöн юрнуöдны ыджыд сям колö.

Николай Николаевич нёль во кöр дорын уджалöма. Стадаыс вöлöма абу ичöт, матö 1 сюрс пемöс. Найöс видзöмаöсь Тымсер ю пöлöн. Арнас кöръяс йирсьöмаöсь видз вылын, сэні, майбыр, туруныс тырмымöн. Тöвнас жö кынöмпöтсö перйöмаöсь яла ягын. Медся сьöкыд каднас вöлöма тулыс. Яр шонді югöр улын лымйыс вочасöн вазьö да пуксьö. А сэсся, кыдзи тшöкыда овлö, другöн кöдздöдö. И артмö чарöм. Небыд лымтö кöръясыд кокнас век жö гудйöны вöлöм да воöдчöны чöскыд ялаöдз. А йизьöм-кынмöм чарöмыд асфальт кодь крепыд. Сэки, кыдзи висьталö Николай Нико-лаевич, пемöсъяс сёйöмаöсь козъясысь ройсö.

Пармаын олысьяс, а тайö век жö вöралысьяс да чери кыйысьяс, вочасöн велалöмаöсь рöдмöдны-дöзьöритны кöръясöс. Тундраса пемöсъясыд абу, майбыр, сюрук-кукыд. Тöвнас картаö найöс он йöрт. И кос турунтö ни силостö найö оз сёйны-рöмидзтыны. Уна выльсö Николай Юдин сэки тöдмалöма. Сідз, ковмöма велöдчыны вöчавны дадюв. Сійö абу дадь кодь, мыйöн тшöкыда вöдитчöны сиктса олысьяс. Дадюлыс, кыдз пасйис, Николай Николаевич, кокниа исковтö кыдзи и лым да чарöм вывті, сідзи и нитш да усьöм понöльяс кузя.

Ылі туйö петігöн кöр видзысьяс ставсö пыр сьöрсьыс босьтлöмаöсь. Медводз, дерт, сёян-юан: сакар-чай, сукар, консерв... А нöшта на чайник-пöрт, чом пытшкöсса мукöд эмбур. Ставсö тайöс вöлöм сöвтöны чабичаö, миян ногöн кö, дора дадюлö.

— Кöр дорын уджавны абу кокни. Войнас сьöрсьöн-бöрсьöн вöлі дежуритам. Торйöн нин деливö кöръ-яслöн вайсигöн. Сэки мыйлакö пыр кöинъяс стада дорö вöлі чукöртчöны. Быттьö тöдöны, мый кокниа позьö кынöмпöт перйыны. Мукöддырйиыс, торйöн нин омöль поводдя дырйи, кор турöбалö, öти войнас руд шышъяс джагöдлісны вит-квайт пемöсöдз, — казьтывлö вöвлöм кöр видзысь.

Дерт, такöд коми вöралысьяс абу миритчöмаöсь. Пакöсьт вöчысьяскöд помся тышкасьöмаöсь. И тайö аслыспöлöс войнаыс некор абу помасьлöма. Дежуритігöн пыр кыйöдöмаöсь руд шышъясöс. А казявлöмаöсь кö кок туйсö, заводитлöмаöсь туявны. Зверь, дерт, пышйö, зільö ас ногыс мудеритны, медым ылöдлыны кöр видзысьясöс. Николай Николаевич висьталіс, мый мукöддырйис öти кöин бöрся тöлысьöдз вöтлысьöмаöсь. Но медбöрын век жö лыйлöмаöсь. Торйöн нин энь зверьясöс зільöмаöсь бырöдны.

Артельöн лыйлöмаöсь ма-тö комын кöинöс. И тайö муртса нёль воöн, кор Николай Николаевич зільöма кöр дорын. Ачыс сійö шковгöма вит руд шышкöс. А сідз-жö кык ошкöс. Пармаса кöзяиныд вöлöм радейтö жö чöсмасьны чöскыд кöр яйöн.

ЗЭВ ЖАЛЬ, МЫЙ ТАДЗИ ЛОИС

А сэсся миян странаын пансис перестройка. Кыдз сэк радейтлісны шуны, пöльыштіс пö свежöй тöвру. И тайö тöврусяньыс заводитчисны збыльысь гырысь вежсьöмъяс. Киссис-бырис СССР. Россияын жö вужйöдісны рынок.

Дженьыд кадöн странаын, тшöтш и республикаын син водзын уна мый вежсис. Пöдласис уна гырысь предприятие, кыдзи, шуам, Сыктывкарса механическöй завод, шкап-улöс вöчан "Север" фабрика... Абуöсь нин и совхозъяс, кодъяс сöвет кадö могмöдлісны Комиын олысьясöс сёян-юанöн...

И Эжва йылын вочасöн кусі кöр видзöм-рöдмöдöмыс. Зэв жаль, мый тадзи лоис.

Телевизор пыр петкöдлісны Норвегияöс. Сэтчöс олöм-вылöмыс шензьöдö. Торйöн нин чуймöдіс, кыдзи тайö странаас зільöны видзны важся оласногсö. Мöс-кук, ыж да кöр видзысьлы государство мынтö оз этша сьöм. И öтшöтш медым туристъяс вермисны нимкодясьны гöраясын йирсьысь быд сикас пемöсъясöн.

 А СЭССЯ ВÖРАЛÖМА

Колхозын на уджалігöн быд ар Николай Юдин кырымавлöма сёрнитчöм, код серти ур-тулан кыйöма-сдайтöма. А сэсся медасьöма Вычегодскöй госпром-хозö вöралысьöн.

Сылöн кыйсян угоддьöыс меститчöма Тымсер да Мылва юяс костын. Ас кинас тшу-пöма-кыпöдöма квайт вöр керка. Дерт, ёна ковмылöма сэки пармаад зільны-пессьыны. Став "техникаыс" — кок-киыд. Бурантö сэки судзöдны-ньöбны вöлöм зэв сьöкыд. А машинанад яг-растіыд он вермы мунны.

Быд вöралысьлы урчитлöмаöсь план. Мöд кывйöн кö, уна-ö зверь ку колö сдайт-ны, а сідзжö и тшак-вотöс да весиг пакула. Николай Николаевич висьталіс, мый сылöн угоддьöын уна вöлöма быд сикас зверыс: урыс, сьöд-бöжыс, ручыс, кöчыс... Öти вöралан сезонас сійö вöлöм шöркодя кыйö кызь туланысь оз этша. Мойвилöма кыйны и куим санöс да та мында жö вöрканьöс.

Госпромхозöн урчитöм плантö Николай Юдин пыр тыртлöма да вевтыртлöма. Предприятиеöн веськöдлысьяс век ошкылöмаöсь водз-мöстчысь да зіль вöралысьöс, мукöд уджалысьыслы примерöн вайöдлöмаöсь. Олöма морт петкöдліс Почёт грамотаяссö. Ыджыд шкап тыр чукöрмöма. Бур уджысь содтöд уна дона козин сетлöмаöсь. 1971 воын Николай Юдинöс ыстылöмаöсь Москваö. Вöралысь петкöдчылöма ВДНХ-са выставка вылын...

Николай Николаевич ва-жöн нин пенсия вылын. Бöръя кык восö сійö пармаö, аслас кыйсян угоддьöö, абу нин ветлöма.

— Кокöй тай висьö. Кöть зэв на окота узьны вöр керкаын, кытшовтыштны радейтана яг-расті,.. — висьталö олöма морт.

Николай Николаевич Юдин керка дорö матыстчигöн пыр и гöгöрвоан, мый тані олö вöралысь. Торъя йöртöд сайын — куим мичасьысь-мича лайка. Вöралысь пасйис, мый на пиысь öтиöс аслыс видзö, мöдыс — Алексей пиыслöн, а коймöдыс – радейтана внукыслöн. Гашкö пö, сійö пöль-батьыс моз тшöтш кутас кыйсьыны...