Чолöм, енбиа бур йöз, газет вöчысьяс!
Ёна важöн судзöда "Коми мутö". Радейтам ас кывъя газет-журналтö. Газетö гижöмыс миян шоча овлö, а лыддям ставсö.
Ми семьяын быдмим куим чой: Александра, ме — Глафира, Мария. Грездным ичöт. Школа сэки эз вöв. Ветлöдлім бокиса сиктö. Велöдчим ставным бура.
Бать миян — Пётр Иванович Юдин, вöлі грамотнöй мортöн. Судзöдліс районса и республикаса газет-журналъяс: "Печораса вöрлэдзысь", "Вöрлэдзысь", "За новый Север", "Ордым", "Ударник". Рытъяснас воліс-ны миянö мужикулов, аньяс, нывъяс. Бать налы лыддьö, сёрнитö. Мужикъяс радейтісны сьывны, юисны тшай самöварысь. Челядь котыр волісны жö. Мед ог мешайтöй, каям вöлі пöлатьö да сэсянь видзöдам. Ми быдмим да сідзжö лыддим дед-бабъяслы. Ёна радейтлісны кывзыны Максим Горький йылысь. Сійö миян радейтана гижысь. Тадзи олім-велöдчим Ыджыд войнаöдз.
Деревняясын воссялісны начальнöй школаяс. Войнаöдзыд сикт-грездад уна на вöлі велöдчытöм йöзыд. Весиг оланпас вöлі, мед велöдны сэтшöмъяссö. Тадзи рытъя школаяс лоисны. Начальнöй школаясын велöдісны комиöн. Рочсö сöмын мöд да коймöд классын öти урокöн лун сетісны, а нёльöд классын — кык урокöн лун. 5-öдсянь став предметсö велöдісны роч кывйöн. Кутісны велöдны и немеч кыв, а чужан кывсö велöдісны сöмын коми челядь. Мый нö лои, мыйла оз ков чужан кывйыс? Уна во дугдывлісны велöдны комисö, öні на этша татшöмыс. Оз ков пö, шуöны.
Ми кык чой олам-вылам на. Коми аньяс. Мам-бать вöліны дзик комиöсь. Абуöсь нин найö югыд му вылас. Бать миян, Пётр Иванович, пуктіс юрсö война дырйи 1943 воö Ленинград дорйигöн. Вöлі сылы 47 арöс. Батьлöн тайö коймöд война. Верöс менам, Василий Николаевич Шахтаров, Отечественнöй война вылын да госпитальын вöлі 4 во. Локтіс 1945 во помас медаль-орденъясöн. Вöлі II группаа инвалидöн. Пыр уджаліс, кыдзи вермис. Стажыс сылöн 53 во. Эз юлы ни эз куритчыв. Быдтім нёль челядьöс. Василий Николаевичлöн олöмыс помасис 1995-öд воын 71 арöсöн.
Ми чойкöд ыджыд арлыдаöсь нин. Том кадсянь уджалім. Ме, Глафира Петровна, начальнöй классъяс велöдысь. Уджавны заводиті 1940 воö 16 арöссянь. Уна во öтнам велöді нёльнан классö кык сменаöн. Нёль школаын, детсадйын да клуб-библиотекаын уджавлі. Чой, Мария Петровна, уна во вöлі детсадйын воспитательöн. Зілим уджавны бура. Эмöсь миян наградаяс. Чой быдтіс нёль челядьöс жö. Кыкнаннымлöн коли кык челядьöн. Асьныс важöн семьяаöсь. Чойлöн верöсыс, Альберт Миронович, вöлі бур мортöн, зэв киподтуя. Кувсис 1997 воын.
Уджалöны на миян челядь, велöдчöны внук-внучкаяс. Ми олам Мылдін районын. Ме, менам ныв, внук — Ваньпи грездын, а чой, Мария Петровна — посёлокын, 25 километр сайын. Митрöпан посёлок абу ыджыд, но сэні эм и ыджыд шöр школа, и сиктсöвет, и клуб-библиотека, и пошта да с.в.
Шыöдча чинаяс, учёнöйяс, гижысьяс дорö: энö лэдзöй бырны коми сикт-грездлы, коми йöзлы. Ми надейтчам на бурас. Мед оз быр коми кывным, коми сёрниным, коми войтырыс. Олöмыс сьöкыд. Та йылысь бура висьталöма енбиа коми гижысь, еджыд мича тошка Николай Щукин декабрь 4-öд лунся "Коми му" газетын "Мыйла та выйöдз воим?" гижöдын. Бурасьыс-бура гижö и енбиа ань Александра Петровна Мишарина. Жаль, коми газет-журнал вылö этшаöн гижöдчöны. Ми мыйлакö абу татара либö прибалтикаса кодьöсь, ог зільöй дорйыны асьнымöс.
Став бурсö. Кузь нэм, бур шуд. Лючки овны-вывны.
