Январь 18 лунö Россия Федерацияса Государственнöй Думаöн веськöдлысь Борис Грызлов аддзысьліс журналистъяскöд. Медвойдöр сійö чолöмаліс парламент йылысь гижысь корреспондентъяс пöвстын конкурсын вермысьясöс, а сідзжö сетіс аттьöалана гижöдъяс да казьтылана козинъяс федеральнöй кытшъясса газет-журналын зільысьяслы, кодъяс ёртасьöны Госдумакöд да петкöдлöны сылысь уджсö асланыс петасъясын.

Кыдз пасйис Борис Грызлов, талун Думаса депутатъяслöн уджöн тöдмöдö аккредитуйтöм 1,5 сюрс журналист. Ставныс найö ыджыд сямаöсь да водзмöстчысьöсь. Та вöсна депутатъяс век мунöны налы воча да восьсöн висьталöны парламентын став лоöмтор йывсьыс. Спикер казьтыштіс, мый журналистъяс пöвстын конкурссö нуöдісны 17-öдысь нин, да чолöмаліс вермысьяссö — ставнас 40 гöгöр мортöс. Быдöнлы на пöвстысь вичмис диплом да МР3-плеер.

Та бöрын Борис Грызлов аттьöаліс регионъясысь воöмаясöс. На лыдö веськалісны федеральнöй кытшъясса газет-журналъясысь редакторъяс, кодъяс кутöны топыд йитöд Госдумакöд да зільöны петкöдлыны петасъясас сылысь уджсö. Парламентö вöлі корöма 8 татшöм веськöдлысьöс — федеральнöй кытш лыд серти. На пöвстын и Рытыв-Войвыв кытшö пырысь дзик öти регионысь — Коми Республикаысь — "Коми му" газетса главнöй редактор Елена Плетцерöс (лыддьысьысьяс тшöкыда казявлöны "Торги Коми" петасын Борис Грызловлысь сійö либö тайö оланпас серти гöгöрвоöдана гижöдъяссö). Борис Вячеславович пöся аттьöаліс Елена Владимировнаöс ёртасьöмысь да сетіс казьтылана козин — Государственнöй Думалöн паса киын новлан зарни часі. Спикер кутö лача, мый "Коми му" и водзö мöдас бура петкöдлыны парламентлысь уджсö аслас лист бокъясын.