Во кык сайын нин "Коми му" газет редакция автономнöй учреждениеса вöзйисны восьтыны Печать керка бердын коми небöгöн вузасянін.
Тайö уджыс, дерт, зэв кыв-кутана. Но босьтчим. Медводз кöртымалім Печать керкаысь лыддьысьысьяслы га-зет-журнал вичмöдан жырсö. Корсим дизайнеръясöс, дасьтім лавкалысь макет, бизнес-план. И медбöрын босьтчим корсьны сьöм. Тайö, дерт, медся сьöкыдыс. Миян республикаын уна сёрнитöны коми небöг тырмытöм йылысь, но некод оз босьтчы мыйкö та кузя вöчны. Шуам, нёль во сайын пöдласис Коми книжнöй издательство. Дерт, таысь абу нимкодь, но öд сы пыдди кымын ичöтик издательство нин чужис: "Кола", "Анбур", "Коми гижысь чукöр" "Коми му", "Арт", "Титул" да с.в. И вузаланторйыс эм жö. Сідзкö, колö и коми небöгöн вузасянін.
Медвойдöр шуим сылы ним бöрйыны. Öтияс вöзйисны "Востым", торйöн нин Владимир Васильевич Тимин сы дор вöлі. Но бара жö — востымыд — востым и эм, öзйылас яра да и кусас. Öтчыд "кусліс" нин да, вай, мися, огö нин тайö нимсö пуктöй. Газет пыр шыöдчим асланым лыддьысьысьяс дінö. Кымын вöзйöм воис! Ёна и радлім да чукöстім бöрйынысö нималана коми йöзöс: Галина Бутыреваöс, Евгений Козловöс, Александр Ульяновöс, Павел Симпелевöс. Комын сайö вöзйöмысь вель на и сьöкыд вöлі бöрйынысö. Пасъя сöмын, кодъяс, кытысь да кутшöм ним вöзйисны. Леткаысь А.А.Кетов вöзйöма "Бива". А ёна и вензим та кузя. Меным медъёна тайö нимыс сьöлöм вылö воис. Шойнатыысь Ольга Печеницына аслас 12 арöса Полина нылыскöд мöдöдöмаöсь некымын ним: "Ловби", "Енби куд", "Мед олас", "Бур козин", "Колантор", "Зарни вежöр". Юркарысь Людмила Огнёва вöзйöма "Рöмпöштан", Абъячойысь Александра Кузиванова "Зарни анбур" да "Эзысь анбур", Сьöдкыркöтшысь Елизавета Карпова лыддьö медся мичаöн "Мыла-мича коми кывъя небöг-журнал лавка" ним. Вывті кузь да, чайтам, Елизавета Павловна оз дöзмы киритöмсьыс. Аттьö сылы конкурсö пырöдчöмысь. Печора районса Конецбор грездысь Е.А.Истомина гижöма зэв бур письмö ö шыпас да сöстöм ключ йылысь. Кужöма восьтыны аслас гижöдын коми войтырлысь оласногсö да тайöн ёна и кыпöдіс ловнымöс. Галина Васильевна Бутырева весиг тшöктіс письмöсö мича рамкаö пуктыны, лавкаас öшöдны да пуктыны вöзйöм "Ö ключ" ним. Мылдінысь "Заря" газетын, буракö, уджалысь (сэсянь тай чолöмсö мöдöдöма-а) Г.В.Субботина вöзйöма татшöм нимъяс: "Енби", "Бияр", "Зарни куд", "Ярэск", "Бисер". "Биярсö" да "Зарни кудсö" босьтім тöд вылö. Сыктывкарысь Гений Дмитриевич Горчаков пыртіс дженьыдик письмöтор. Со мый сэні гижö: "Уна гижны ог кут, но ме ногöн тыр-бур вежöра быд морт гöгöрвоö, кутшöм ыджыд тöдчанлуныс книгаяслöн, да ме ногысь колö коми книгаясöн вузасянінлы сетны "ЛОВВА" — ("Живая вода") либö "Югыд ва" ним. Тайö медся бура петкöдлö морт олöмын книгалысь тöдчанлунсö". Аттьö, Гений Дмитриевич, бур письмöсьыд. Но öд татшöм нимъясыс эмöсь нин. Кöрткерöс районса "Звезда" газет лэдзö "Ловъя ва" лист бок, а "Югыд ваыс" — заповедник.
Любö лои ставлы Кöрткерöс районса Ыджыдвидз сиктысь письмö лыддьöм бöрын. Эльвира Александровна Старцева став семьяыскöд вензьöмаöсь лавка ним вöснаыд. Со мый сійö гижö: "Бара на ме, Кöрткерöс районса ань, пукси гижны Тіянлы, кор газет лист бокысь аддзи шыöдчöм вöзйыны выль вузасян лавкалы мича ним. Гоз-мöд рыт гортсаяскöд бура и вензим, кутшöм жö лоас медся лöсьыд да шогмана. Ме вöзъя "Коми лавка", верöсöй серамсорöн — "Шылльö-мылльö", Алёна нылöй — "Гöрд пельöс", Андрей зятьöй — "Залавка", Иван пиным — "Горнича", Кристина нывным — "Комикуд", Полина нылöй — "Лавкакуд", менам мам — "Сёшайт". Век жö сэсся öтвылысь сувтім "Зарни куд" ним вылö. А тіянлы — кокньыд бöрйысьöм!" А бöрйысьöмыс адöй сьöкыда муніс. Медводдзаысь чукöртчылігас öти кывйö эг и воöй. Шуим сёрöнджык бара мöвпалыштны. Мися, кор кутасны нуöдны пелькöдчан уджсö, сэки быть нин бöръям. А вöзйöмыс воис и воис. Елена Васильевна Козловалы любö "Парма ёль", Алексей Вячеславович Поповлы — "Зарава", Зоя Васильевна Шиликовалы — "Кыа"...
Медбöрти миянлы вичмöдісны сьöм. Медвойдöр, дерт, колö вöлі дзоньтасьны, да и лавка пытшкöссö мöвпыштны. Мед любö вöлі пырнысö да и коми руыс мед тыдаліс. А сэк кості бара на чукöртчим лавка ним бöрйöм могысь. Тайö пöрйö волісны Елена Козлова, Алексей Попов, Александр Ульянов, Николай Вахнин, Алексей Полугрудов, Анжелика Елфимова, Александр Суворов, Михаил Елькин. Кыті серамсорöн, кыті вензиг да пыдісянь мöвпаліг колим некымын ним: "Бива", "Зарни куд", "Зарава", "Бияр" да "Парма ёль". Кодкö нöш-та содтіс: "Нига", "Пас", "Небöг", "Пырав", "Козин" да "Анбур". Бöръяыс эськö зэв мича, но Валентина Трошева татшöм нима аслас издательствоын лэдзö нин небöгъяс. "Пас" кыв дінас окота содтыны кырым либö перна. Оз жö туй. Сэсся Алексей Полугрудов вöзйис "Ордым". Ставöн ланьтыштлім да кутім казьтывны кывйыслысь тöдчанлунсö. Öти-кö, история: 1926 воын медводдза литературнöй журнал ним; мöд-кö, кытчöкö индан, нуöдан пас. Дерт жö, бурлань, тöдöмлунлань. Тайö ним вылас и сувтім. Ставöн ошким "Ордымсö". Сідзкö, конкурсын вермысьöн лоис Алексей Владимирович Полугрудов, "Войвыв кодзув" журналын уджалысь, а миянсянь, конкурс нуöдысьяссянь, сылы вичмас козин.
А коми небöг вузасянінным, чайтам да, воссяс выль воын нин.
