Коркö тулыснас ме веськавлi Максаковкаса "Лира" прöст кад коллялан шöринö. Нывъёртъяс мырдöн кыскисны.
Кöсйыси, веськыда шуа, эг ёна окотапырысь. Сиктса да посёлокса клубъясад бурпöт "гöститöма" нин. Кытчöкö волi уджъёртъяс дорö (ачым коркö Маджаса клубын уджавлi), кытчöкö журналисталiгöн кежавлi, а кöнкö и кывбуръясöс лыддьывлi.
Коркöясяньыд, дерт, клубъясыд вежлалiсны нимъяссö — öнi найö кодi культура либö творчество керкаöн шусьö, кодi кутшöмкö шöринöн, кодi нöшта мыйöнкö. Но сюрöсыс коли — сибöдны йöзсö культура дорö. И воысь воö тайöс вöчны сьöкыдджык. И помкаыс абу сыын, мый йöзыс оз окотитны сибöдчыны культураад. Быд мортлöн пö, кыдзи эскöдöны миянöс учёнöйяс, вирас мичлун дорö кыскöмыд. Помкаыс сыын, мый öнi татшöм культурнöй мортыд оз ков некодлы. Колöны кын сьöлöма, сувтса бугыля, сыла чужöм-рожаа, небыд мавтаса, мыла гöлöса, кузь киа, Енмысь ни Омöльысь повтöмаяс. А культур-нöйыд оз ков. Сiдзкö, и культурасьыд дзик нинöм. Со и ноксьöны клубсаясыд сьöдас. Ыджыдсьыс-ыджыд удж вöчöны, а збыльвылас некодлы ковтöмöс.
Та вöсна ни важ, ни выль нима клубъясад ветлынытö меным абу окота, мед не аддзыны сэні зільысьяслысь шог синъяссö. Но, шуа тай, мырдöн нуöдiсны. И тöданныд мый? Кымынкö "сё пасибö" ме нывъяслы таысь шуи жö. И шуа на.
Ывласяньыс "Лиралöн" торъя мич оз тыдав — кык ыджыд öшиня эжöм керка. Танi мукöдпöлöсыс гежöд. Вöрса посёлокъясыд, видзöдан да, ставныс öти чужöмаöсь. Водзтi танi вöлöма сёянiн, вердлöмаöсь лесопунктсаясöс. Вöр пö-рöдысь-кылöдысьясыдлöн эськö и асланыс клуб вöлöма. Но перестройка дырйи ставыс пасьмунiс да, клубтö игналiсны. Бöртиджык кöзяинтöм стрöйбасö зонпосни биöн дуригöн сотöмаöсь.
Сёяннад верднытö некодöс жö лоис, да и некодлы. Со и думыштöмаöсь 1995 воын восьтыны сэтчö "Лира" шöрин. Максаковкасаяс, кöнкö, шöриныслысь оз нин и став кöзяинсö, кодъяс сьöрсьöн-бöрсьöн вежласисны, бура помнитны.
Кöкъямыс во сайын Максаковкаса сиктсöветöн сэкся юрнуöдысь Нина Еруслановна Петрова кужис эскöдны Жанна Мирводаöс, мый сöмын сiйö вермас кыпöдны "Лираöс", босьтчас кö сыöн веськöдлыны. Жанна Григорьевна сяммис эз сöмын кыпöдны, но и нимöдны шöринсö.
"Лиралöн" дас вит вося юбилей вылын вöлi татчöссаяслы мыйöн нимко-дьöдны, мыйöн ошйысьны.
Казьтылi тай, мися, татчö вайöдöмысь нывъёртъяслы "аттьöтö" шула на. Шöринö медводдза воськовсяньыс öвтыштö шоныдöн. Батареясяньыс, дерт, тшöтш, но медводз ставсö лöсьыдика да пелькиника, муслунöн вöчöмысь. Со ичöтик басöк посводз, со водзö мойдын кодь пöрччысянiн, сэсся ачыс залыс да сценаыс, кытчö и тöран, и он вош. Сэсся кузь коридор бокö меститчöм кабинет сямаяс. И кöнкö помланьыс нин, кытчö ныртö пыр и окота сюйлыны, — асьнысö баситан кадсö виччысьысь жыръяс.
Жанна Григорьевналöн кывъяс серти, дзоньтасян уджыс юр выв тырыс на. Но тайö пö оз падмöд лов кыпöдан уджнымöс.
Максаковкаын талун олö нёль сюрс мортысь неуна этшаджык. Артмö, мый öтар джынйыс гажöдö сцена вывсянь мöдарсö — залас пукалысьсö.
Быдторнас танi ловтö окотапырысь тешитасны. Кужан он, оз юавны, сöмын мед окотитöмыд вöлi-а. Арлыдыд веськодь жö — кöть школаö на эн мун, кöть кык пöвста баб ли ыджыд мам.
Том аньяслы со эм "Мастерица" котыр, кöнi найö öта-мöдныскöд став кужанлуннас юксьöны. Арлыдаджык нывбабаяс "Ветеран" клубын олöны-вылöны. Вермытöмъяс "Неунывающие сердцанас" наысь оз жö кольччыны. Сьылöны, дерт, ставныс. И öткöн, и кыкöн, и хорöн "Максаковочкаын" да "Карагодын".
Зонпосни йылысь и сёрниыс абу. Налы и "Карамелька" йöктан да "Свирелька" сьылан котыръяс. Налы и баситчыны велöдчан "Подиум", ворсан "Затейник" да концерт нуöдысьö дасьтан "Эхо" клубъяс.
Танi весиг эм шахматасьысьяслöн асланыс инасянiн — "Ферзь".
Шöринад кö олöмыс пуö, сiдзкö, сiйö варкйö и посёлокас. И дас вит вонад кö танi сы мындаöн аддзисны аслыныс лов кыпöдöм, сiдзкö, и водзö олысьяслы уна дас вит во на лоас татшöмыд.
