"...Йöз жö коркö важöн овлöмаöсь. Збой сьöлöма да асныра войтыр. Абу сетчöмаöсь, абу примитöмаöсь выль ентö. И асьнысö гуалöмаöсь ловйöннас. Висьталöны, мый тайöн и мыльксö шуöны Чудьöн. Татчö пö буретш асьнысö гуалöмаöсь... Миян воши налöн кодь збойлуныс. Ыззьылам жö эськö, но пыр жö лöням мыйлакö. Кытчö нуöдасны, сэтчö и мунам. Мый тшöктасны, сійöс и вöчам. Найö, чудьясыд, со ловсö сетöмаöсь, а абу кежöмаöсь асланыс туйсьыс", – татшöм мöвпъяс ми аддзам Алексей Попов-лöн "Чудь мыльк" пьесаысь.
– Ме чудьяссö пыдди пукта, найö миян моз эз воштыны асьнысö. Тырмис налöн выныс и кöсйöмыс паныд сувтны, кор мырдöн ли эз мырдöн енъяссö вежны пондісны, – висьталö драматург. Тöдöмысь, тшöтш и та вöсна Нёбдінса Виттор нима театрсаяс юалöмаöсь да, кутшöм пьеса пö кöсъянныд, мед дасьтім юбилейтö пасъян воö, вочавидзöма: "Чудь мыльк" пö.
Кутшöмöн мортыс чужлöма, мый сылы олöмас вичмылöма, вермöма-ö аслас туйвизьöд мунны, а абу кö – мыйла? – та йылысь Алексей Поповлöн "Чудь мыльк-йыс". Васька Ёгор – бать-мамнас лэптылöм на да наöн жö нажöвитöм-чукöртöм эмбура керкаын öткöн олысь нелямын арöса мужичöй, удж вывсьыс вöтлытöдз нинöм выльсö абу и лöсьöд-лöма – кага ни баля овмö- сад нö кодлы чукöртнысö, код йылысь тöждысьнысö? Мый сюрыштас – сійöс и кокыштас. Тадзи и коллялö лунсö да войсö. Асьсö дор-йöм могысь кыв шуны оз куж. Йöзсьыс пö абу лöсьыд воча пинясьны кодкöдкö, зыксьыны. Удж вывсьыс вöтлывлöма сійöс Демид Миш, и со киöн вермасигöн Васька Ёгор венö сійöс да повзьö, та бöрти пö öд уджавнытö оз и босьт сэсся.
Дзикöдз нин йöрмöм Васька Ёгор дорö локтö Нимтöм Морт – гашкö, чудьлöн ортыс. Отсала пö нальксьыд петны, петкöдла олан сямтö, а сэсся ачыд нин аслыд туйсö писькöд. Да туйдіс Чудь мыльк вылын ним- кыв висьтавны... И, вöлöмкö, Васька Ёгорыд кужö и асьсö дорйыны, и водзсасьны, и нажöвитчан сямыс эм. Мöвпалö, мыйла нö эськö татшöмнас лоис, мый весиг овнысö абу окота. Гашкö, сы вöсна, мый öтка пиöн вöлі да бать-мамыс вывтіджык радейтісны сійöс, гашкö, ас кодь арлыдаясыс эз сибöдлыны да, серамвыв лэптылісны, весиг школаас велöдысьыс челядь водзын янöдіс ичöт Ёгорöс да сійö рам кукань моз ставсö терпитіс.
Васька Ёгорлöн суседкалы, Полом Агнилы, му бердын уджалан сям вичмылöма. А велöдчынысö абу мойвиöма, сизим ныв-пиян бать-мамыслöн быдмöмаöсь да, кöть аслыс и окота вöлöма велöдчынысö. Нина Петровна ыджыдалö Владимир верöс вылас, бокö воськов кежыштны оз лэдз, а збыльвылас чужлöма радейтысьöн, меліöн да шаньöн...
Мыйла нö эськö сиктсаяс эз лоны сэтшöмнас, кутшöмöн чужлöмаöсь югыд свет вылас? "Мортыд пö эськö кутшöмöн оз чуж да, кыдзи нö ас ногыд верман овны, кор йöз пöвстын гартчан? Абу на тай ставыс ас саяд. Кыдз эськö абу окота овны да. Он на тай вермы", – мöвпалö öнія коми морт.
Драма театрысь режиссёр Евгений Малафеев некымын во сайын пуктыліс нин Алексей Поповлысь "Чудь мыльксö". Но унаысь петкöдлыны сэки эз артмы, да режиссёр выльысь дасьтіс спектакльсö мукöд ворсысьяскöд нин. Васька Ёгорöс да Демид Мишöс ворсöны Вадим Козлов да Константин Кушманов, кодъяс таво на Санкт-Петербургын по-малісны театр академия. Вера Габова ворсö Полом Агниöс, Мария Чукарева – Нина Петровнаöс, Леонид Попов – Владимирöс, а Нимтöм Мортöс – Юлия Экрот.
Театрын Алексей Поповлöн пьеса серти пуктöм спектакльсö нимтöмаöсь мистерияöн. И авторыс сöглас режиссёрыскöд, сійö пö ачыс аддзö, кыдзи пьесасö бергöдны, кутшöм туйöд сійöс нуöдны, мед видзöдысьлöн сьöлöмöдз да вежöрöдз мöрччис. Премьераыс лоас локтан пекничаö нин, декабрь 17 лунö.
