Буретш тайö кывъясыс усисны дум вылö, кор миян редакцияö кутісны звöнитчыны да гижöдчыны лыддьысьысьяс, мыйла пö сэтшöм ёна вежсис "Коми му" газетлöн чужöмбаныс.

Медводдзаöн шыöдчис юркарын олысь Анатолий Васильевич Макавкин, коді судзöдö петаснымöс "Вöрлэдзыссянь" на. Олöма морт веськыда весьöпöртіс миянöс, кор дöзмöмпырысь шуис, тешитчанныд пö йöз вылас. Гижöдъяссö лыддьыны он вермы, шыпасъясыс посниöсь да. Сэсся и чужöмбаныс газетыдлöн блед да кельыд.

Тадз кымын жö элясис газетö тшöкыда гижысь Мария Алексеевна Плоскова. Сійö нимтö "Коми муöс" гöлиник да омöлик сьöда-руда петасöн. Посни шыпасъясысь кындзи Мария Алексеевналы оз во сьöлöм вылас газетлöн сьöд рöма юргижöд-шапкаыс, сы дорысь канпассö да "Знак Почёта" орденсö местанас вежöмыс, гижöдъяс чинталöмыс, газетын шöр материалъяс йылысь медводдза лист бокын ичöтик юöръясыс да мукöдтор.

Гöгöрвоана, тайöс кылöм бöрын миянлы окота лои тöд-мавны и мукöдлысь видзöдлассö. Юасим тöдсаяснымлысь, газеткöд дыр ёртасьысьяслысь, сиктса войтырлысь, да тыдовтчис, мый сійö торъялö. Öткодь майшöдланаторйыс сöмын — посни шыпасъяс. Та вöсна налысь ыдждасö матысса кадö вежам. А гижöдъяс чинталöмтö унаöн ошкисны, унджык выльторсö пö тадзи тöдмалам да и лыддьынысö кокниджык. Но гырысь гижöдъясыд газетысь дзикöдз, дерт, оз бырны. Öд кыдзи нö серпасалан енбиа мортöс либö тöдмöдан ветеранлöн олан- уджалан туйвизьнас некымын дас стрöкаöн? А лоö кö чина морткöд зэв колана сёрни либö кар-районын кутшöмкö тöдчана чукöртчылöм?..

Öти кывйöн, ми чуксалам "Коми му" лыддьысьясöс и водзö ёртасьны газеткöд да гижöдчыны сы вылö. Виччысям тіянсянь юöръяс, вöзйöмъ-яс, пасйöдъяс, гижöдъяс. Юксьöй миянкöд видзöдлас-мöвпъяснад, тöжд-майшасьöмъяснад. Эн кöдзöдчöй коми кывъя петасъясысь. Сöмын öтув ми вермам найöс сöвмöд-ны, вöчны лыддянаджыкöн да йöз дорö матынджыкöн.