Тöдмасьöй: Дмитрий Александрович Шатохин, сиктысь петöм морт, уджавліс велöдысьöн И.А.Куратов нима педколледжын да республикаса управленческöй резерв лицейын, вöлі Коми Республикаса Госсöветысь социальнöй политика комитетын консультант-экспертöн, веськöдлö том войтырлöн парламентöн. Öні — Сыктывкарса администрацияöн весь-кöдлысьöс йöзкöд йитöд кутöм кузя вежысь. А öд сылы сöмын 30 арöс на.
—Дмитрий Александрович, кытысь Тіян вужъясныд?
—Чужлі ме Кулöмдін районса Діасёръяын. Йöзыс шуöны посёлоксö Вöльскöйöн, а збыль вылас нимыс Діасёръя. Талун сэні олö 500 гöгöр морт, а войдöр 900-öдз вöлі. Шог, мый посёлокас йöзыс чинö.
—Шöр школатö чужан посёлокад помавлінныд?
—Дыр кад менам чужанінын шöр школаыс эз вöв, но миян велöдчигöн сійöс восьтісны. Велöдчаніныс зэв бур: и педагогъяс ёнöсь, и став коланаыс эм. Сійö кадас нин материально-техническöй подулыс вöлі зумыд, ми вермим и сьывны-ворсны, и спортö пырöдчыны. Кык во ме ветлöдлі "Йöлöга" ансамбльö, коді öнöдз петкöдчывлö район пасьтала. Да и ачым куим во нин сьылі Помöсдінын июнь 20-öд лунъясö котыртлан эстрада музыкалöн фестивальын.
—Фестивальö кö пырöд-чанныд, сідзкö, музыка нырвизь серти велöдчинныд?
—Ёнджыкасö ме ачым асшöра велöдчи. Школаын аккорд-нотаяснад тöдмöдісны, а сэсся 1 номера педучилищеын ачым велöдчи ворсны гитараöн. Музыкаыс менам олöмын зэв тöдчана. Сійö отсаліс петкöдчывны КВН-ын да пырны землячествоö, а сэсся кыскис и общественнöй уджö.
—Школа бöрад кытчö веськöдчинныд?
—Кöсйи эськö Сыктывкарса университетысь история факультетö пырны, но тöдöмлунöй эз тырмы, миян школаын история велöдысьыс кык во эз вöв да. Кöть эськö и экзаменсö Помöсдінса школаын "5" вылö сдайті. Со и муні И.А.Куратов нима педучилищелöн социально-юридическöй юкöнö, кытчö первойысь на босьтісны ныв-зонмöс. Колö шуны, миян котырын зэв енбиа томулов вöліны. Да и тайö велöдчаніныс меным ёна матыс, öд сэні пöшти став рöд-вужöй велöдчис, и пиöй со сэт-чöс "Аскиа первоклассниклöн школаö" ветлöдлö. Педучилище бöрын миян курсысь куим мортöс вуджöдісны Сыктывкарса университетысь психология да социальнöй удж факультетлöн коймöд курсö. Университетын велöдчигöн ёна водзмöстчи: нуöді факультетлысь лун, дасьті сценарий. Сэки и казялісны менö да корисны кывкутанаджык удж вылö. Буретш 2000-öд вояс заводитчигöн котыртчис Россияса том йöзлöн союз, и 2001 воын менö бöрйисны союзыслöн Сыктывкарса юкöнöн веськöдлысьöн. А неуна бöрынджык, 4-5 курсъясын, корисны управленческöй резерв шöринö. Сэки ме кутчыси нин велöдан уджö, тшöтш и уна сикас проект дасьті.
—Бать-мамныд сиктын чужлöм йöз жö?
—Мамöй менам — Кулöмдін районса Вапöлкаын чужлöм ань. Діасёръяын дыр кад уджаліс сельсöветын да детсадйын пусьысь-пöжасьысьöн. Сылысь батьсö Пекар Ёгорöн шулісны, а мамöй — Пекар Ёгор Нина. Батьöй — Ылі Асыв-вылысь, локтöма Комиö нажöвитны ыджыд сьöм да и кольччöма. Кöть и 64 арöса нин, пыр на уджалö — веськöдлö пилорамаöн. Батьöй — роч, а мамöй — коми. Коми кывтö ме гöгöрвоа, но ог сёрнит — таысь вида ачымöс.
—Тіян серти, колö-ö сиктса том йöзлы ку-тшöмкö торъя отсöг?
—Сиктса томуловыд зэв вежавидзысьöсь да яндысьысьöсь. Асьныс ёна оз водзмöстчыны, пырджык виччысьöны кодсянькö тшöктöм-чуйдöм. Та вöсна тшöкыдджыкасö налы сöмын колö вöзйыны кутшöмкö мöвп да сетны позянлун эскыны ас вынас. И сэки ставыс артмас. Зэв ёна отсалö ныв-зонлы том йöзлöн парламент, унаöн нин сы отсöгöн сувтіс-ны кок йыланыс. Шуам, Антон Попов — торгово-промышленнöй палатаын медшöр юрисконсульт. А öд сылы сöмын на 26 ар. И Антон кодьыс зэв уна. Парламентыс — кадръяс дасьтан зэв бур школа. Эм нöшта управленческöй резерв школа, кöні велöдöны томджык ныв-зонмöс. Öіні ми Вячеслав Михайлович Гайзеркöд öтвылысь мöвпалам лöсьöдны Коми Республикаса Юралысьлысь управленческöй резерв. Ме лоа конкурсса экспертöн. Зэв эськö бур вöлі, татшöм тэчасыс кö вöлі и Кулöмдін районын, сэки позяс ыстыны енбиа ныв-зонмöс республика тшупöдö.
—Тіян уджныд зэв кывкутана. Сьöкыд?
—Сьöкыд сэк, кор могтö аслыд стöча он инды либö помöдз он гöгöрво, мыйла тэ ставсö тайöс вöчан да кодлы колö тэнад уджыд. Кор ме сöмын на кутчыси выль уджö, кабалаö пасъялі, мый колö вöчны медвойдöр. Öіні менам могöй — кутны йитöд общественнöй да политическöй котыръяскöд, национально-культурнöй автономияяскöд. Сентябрсянь тшöтш кывкута Сыктывкарса администрациялöн уджаланног да документъясöн вöдитчöм вöсна.
—А прöст кадад мый вöчанныд?
—Ме зэв ёна радейта вöр-ва. Бать-мам ордö воöм мысти дзик пыр мöдöдча парма-ягö. Гашкö, батьсянь тайö муслуныс вуджис. Гарыштлі тай, сійö нэмсö уджаліс вöрын, чукöртіс сир. Мамöй тшöтш парматö радейтö. Арнас пыр вотöс-тшакла ветлывлам. Сыктывкарса уна ёртöс нин ме вайöдлі чужанінö, сибöді вöр-ва дорö. А карын унджык кадсö вичмöда спортлы. Кольöм воö мини-футболысь карса рдйысьöмö пы-рöдчылі. Эм мöвп асланым командакöд волыны Кулöмдінö. Тшöтш радейта коллявны прöст кадöс аслам пикöд. Школаöдзыс öд унджык кад колö вичмöдны быдтасыдлы. Нуöдлывла футбол вылö, уявны бассейнын, мукöдлаö.
—Дмитрий Александрович, кутшöм йитöд Ті кутанныд чужанінныдкöд, Кулöмдін районыдкöд?
—Дыр кад ме уджалі том йöзкöд, и налы сиöм став выль уджтассö зіли вайöдны Эжва йылö. Да и öні отсала, мыйöн верма. Шуам, отсалім Діасёръяса спорт командалы паськöмöн. Помöсдінын гожся фестиваль кежлö козьналім ыджыд баннер. Нимкодь, мый öнöдз на сійöн вöдитчöны. Эм кö позянлун, ме быть отсала аслам районлы. А сэні кö, шуам, коркö мöда уджавны, пыдісяньджык тöдмала да бурджыка гöгöрвоа сэтчöс олöмсö да унджыкторйын верма отсавны.
—А мый весьтö позяс бурмöдны-сöвмöдны Кулöмдін районын олöмсö?
— Сэні эм уна позянлун сöвмыны да овны бура. Тöдса, мый Эжва йылын 70 гöгöр прöчент олысьыс — коми йöз. И олöмыс пуö. Сідзкö, Кулöмдін районö позьö вайöдлыны гöсьтъясöс тöдмöдны коми войтырлöн оласногöн, культураöн, традицияясöн да тадзи сöвмöдны туризм. Чайта, мича вöр-ваыс, Улляна манастыр кодь йöз киöн вöчöмторъясыс – ставыс тайö шензьöдас гöсьтъясöс да ышöдас и мукöдöс волыны. Мöд-кö, район вермас лоны выль технологияяс серти вöр пöрö-дöм-вöдитöм кузя республикаса шöринöн. Коймöд-кö, миян эмöсь асланым коми йöзкостса гажъяс, "Василей" фестиваль, быд сиктын – крам праздник. Позьö и та боксянь нимöдны районсö. И ме дась пöртны олöмö тайö мöвпъяссö.
