Кузнеч, токарь, сварщик, слесарь... Нэм чöжыс Егор Васильевич Шомысов кöрта удж бергöдö-вöчö. Кулöмдін районса Помöсдін сиктын да матігöгöр грездъясын олысьяс сы дорö тшöкыда шыöдчылöны. Коса дорö, болт-гайка вöчö, кöрт сваритö-йитö, розялöм ыргöн самöвар паяйтö... Öти кывйöн, Егор Васильевич збыльысь зарни киа.

ПУ БÖЧКАЫН ВА ПУЗЬÖДÖМА

Егор Шомысов чужöма Скöрöдум грездын. Ёна эськö кöсйöма велöдчыны, но абу тай артмöма. Нёль класс помалöм бöрын мельничаын батьыслы отсасьöма. Тшöкыда öтнасöн няньсö изöма. Буретш мельничаын и мусмöма кöрта уджыд. Сэні эськö абу уна кöрта эмбурыс, но кадысь кадö мыйсюрö жугав-лöма жö. Öтчыд видзöдлöма, кыдзи кузнеч чегöм кöртсö йитöма-дорöма. Мöдысьсö ачыс нин босьтчöма да вöчöма. Бура ли, лёка ли артмöма, но ас киöн вöчöмнас гоз-мöд во няньсö изöма.

Егор ичöтсяньыс кусняв-лöма жöч. Мельничаын нин заводитöма жöчысь самöвар трубаяс вöчавны, ведра пыдöсавны... Тадзи армияö мунтöдзыс зільöма.

Öтчыд том морт мамсö прамöя повзьöдöма. Куим важ, шыбитöм нин ружье ствол öта-мöдыскöд йитöма. Аслыспöлöс труба артмöма. Сійöс шöрипельö кусыньтöма. Пывсянас лабич вылас сулалысь пу бöчкаö кык помсö сюйöма, а нюкыльтöминыс ыпъялысь изъя гор вылас доналöма. Недыр мысти бöчкаас ваыс пуöма нин. Мамыс кор воськовтöма порог вомöн да тайöс ас синнас аддзöма, шай-паймунöма: дивö пö дай сöмын. Весиг пернапасасьöма.

СЬÖКЫД ГИРАÖН МАЧАСЬÖМА

Комиысь зон армияын служитöма 4 во да 3 тöлысь. Егор Шомысовöс офицеръяс пыр ошкылöмаöсь. Сійö кадас налöн часьтын тшöкыда нуöдлöмаöсь быдсикас орд-йысьöмсö: салдатъяс котравлöмаöсь, гира лэпталöмаöсь, винтовкаысь лыйсьöмаöсь... Медым пö салдат збыльысь дась вöлі чужанінсö дорйыны.

Радöвöй Шомысов латшкöс тушаа, багатырнад сійöс он шу. Но сэк жö кабырас выныс уна. Гира лэпталöмын сійöс венны некод абу вер-мöма. Ичöтсяньыс öд сьöкыд уджтö бергöдöма-вöчöма. Сэсся 16 арöссянь нин гиратö заводитöма лэптавны.

—Кык пудъянас веськыда вöлі мачася. Джоджсяньыс качöда да вугсьыс лэдзигмоз вывлань йöткышта-шыбита. Гираыд бергалöмöн сынöдас лэбö, а усигас сійöс вöлі бокöдыс ки пыдöсöн кута, — вашъялö вöвлöм салдат. — Некод тадзисö эз вермы сэсся вöчны. Кык пудъятö кыкнан киöн öттшöтш вöлі кызь нёльысь лэпта...

КИНОМЕХАНИК? АС ВЫЛАД ТЕШИТЧАН!

Гортö воöм бöрас Егор Васильевич тöвтö абу дыр чужъялöма. Вöзйöмаöсь Ярашъюын киномеханикавны. Весиг и удж вылö пырöм кузя кабаласö нин кырымалöма. И буретш сэки вежöсас пырöма МТС-ысь инженер Унгефуг. Пыр и крапкöма, тэ пö мый, том морт, ас вылад тешитчан. Кутшöм нö тэысь киномеханик? Тэ жö армияöдзыд на кöрта уджсö вöлі зэв бура вöчан. Инженерыд сэсся корöма, лок пö ветлам МТС-ö да видзöдлан уджнымöс. А миянлы ёна колö токарь. И станокыс эм.

МТС-ас вöлöма кык токарнöй станок. Найöс Никита Хрущев дырйи на вай-лöмаöсь. Öтиыс – ДИП-200. Егор Васильевич бара на нюммуніс:

—Сöвет власьт воясö пыр кöсйим Америкаöс панйыны. ДИП-200 станоксö вöлі шуам "догоняй и перегоняй". Öдвакö нин артала, кымын болт да гайка вöчи. Киномеханик пыдди лои токарöн, сёрöнджык кузнечалі, велöдчи сварщикö... И ньöти ог жалит, мый веськöдчи тайö ордымöдыс.

КОСА КÖТЬ СКÖБА, КРЕСТ КÖТЬ ПЫЖ

Ас керка дорас олöма морт кыпöдöма кузнеча, мастерскöй, весиг и токарнöй станоклы стрöйба. Шоныд вежöсын уджавнытö ёна лöсьыдджык. А уджыс, майбыр, эм. Помöсдінын да матігöгöр грездъясын олысьяс тшöкыда шыöдчылöны кутшöмкö да корöмöн. То гайка-болт тöчитны, то машина кузов сваритны-дöмны, то кöрт крест вöчны, то коса дорны корöны.

Сиктсаяс торйöн ошкисны сылысь косасö. Шомысовлöн гöрбушыд пö ёна бурджык лавкаса серти. Ытшкигöн, майбыр, он мудз, бритва кодь лэчыд да...

Кокниджык, тыдалö, шуны, мый Егор Васильевич оз сяммы. Ас овмöсас ставсö ас кинас вöчöма и öні на оз öт-дортчы таысь. Кöть арлыдыс абу нин ичöт: 81 арöс вуджöма. Удж вылад, позьö шуны, яр на да и кыв вылас шмоньлив.

—А нинöм нин он вöч, татшöмöн чужи да, — вашъялö олöма морт.

Эжва ю дорсянь неылын Е.В.Шомысовлöн нöшта öти лэбув. Важöн ачыс пыжъястö вöчавлöма. Ёртъясыслöн корöм серти. А öні со Николай пиыс батьыс моз аслыс 8 метр кузьта пыж вöчö. Козйысь паськыд да кузь плакаяссö мужичöй буретш вöлі чинталö да стружитö.

—Локтан тулыс кежлö нин дасьта. Уна вонад важ пыжыс прамöя рыжмис. А выльыд — выль и эм. "Ветерок" мотор пысала да бара на батькöд чери кыйны ветлам, — висьталö Николай.

ВЕСЬ ОВНЫ ОЗ ВЕРМЫ

Егор Васильевичöс пöльöн шуны кывйыд оз бергöдчы. Мастерскöйын пыр мыйкö да вöчö. Ичöтсяньыс тöвтö, кыдз шуласны, чужъявны абу велалöма. А кöрта уджсö сійö збыльысь ёна радейтö. Öнöдз кувалдаöн, овлö, лунтыр дорччö. Либö токарнöй станок дорын зільö, суседъяслöн корöм серти мыйкö вöчö.