Во кык-куим нин кар-районъясын коми войтырлысь конференцияяс сиöны кутшöмкö öти юалöмлы, сэтчöс йöзсö медся майшöдланалы да тöдчаналы. И бöръя кадас öтмунöмса нырщикъяс зільöны нуöдны чукöртчылöмъяссö оз районса шöринын, а ыліджык сиктъясын. Кöрткерöс районын тавося конференция дырйи вöлі урчитöма сёрнитны ичöт бизнес сöвмöдöм йылысь, а чукöртчывнысö — Одыб сиктын.
Ноябрь 25 лунö водз асывсяньыс Одыбса школаö воалісны чина гöсьтъяс да конференцияса делегатъяс – районса сикт-посёлокъясысь водзмöстчысь войтыр. 10 час бöрын актöвöй жырйыс вöлі тыр, ылöсас чукöрмис морт сё. Сиктса библиотекаын зільысь Татьяна Михайлова медводз тöдмöдіс воысьясöс Одыблы сиöм дискöн, кытчö пыртöма историяысь юöръяс, татчöс пыдди пуктана войтыр йылысь пасйöдъяс, легенда-преданиеяс да с.в. Диск дасьтан уджсö кöсйöны помавны таво декабрын. Та бöрын гöсьтъяс водзын петкöдчисны школаын велöдчысьяс — мичаа сьылісны да ворсісны.
Конференциялöн уджыс пансис "Коми войтыр" öтмунöмлöн Кöрткерöс районын представительствоöн юрнуöдысь Любовь Кирушевалöн сёрнисянь. Зэв ёна воис сьöлöм вылö, мый Любовь Васильевна эз дöзмöд кузь докладöн, а сöстöм да мича коми кывйöн юксис районын олöм-вылöм кузя мöвпъяснас. Казьтыштіс и омöль туйяс (шуам, Одыбöдз 20 гöгöр километр чорыд веркöстöм), и жилищно-коммунальнöй овмöсын тырмытöмторъяс (сикт-посёлокъясын йöзыс кынмöны патераясас сентябрь помöдз), и юысь-кодалысь лыд содöм (татшöмъяссö пö колö мырдöн бурдöдны, сэки и предприятиеясын зільысьыс лоö, а то Маджаын со некыдзи мöс лысьтысьясöс оз аддзыны). Ыджыдвиддзын войтыр майшасьöны ва понда: трубасö нюжöдöм вылö видзöмаöсь некымын миллион шайт, а ваыс öнöдз абу.
Любовь Кирушева кыпöдліс и районса газетлöн редактор йылысь юалöм. Кыдз тöдса, "Звездаын" сійö неважöн вежсис, Эдуард Пименов пыдди локтіс Любовь Мирошниченко.
—Кöрткерöс районын 73 прöчент олысьыс коми. Ми кутім лача, мый асланым петасын чужан кывным сöвмас, выль редакторöн лоö коми кыв тöдысь бур журналист. Но миянлысь, "Коми войтырын" водзмöстчысьяслысь, ни йöзыслысь юасьтöг "Звездаö" вайöдісны бокысь роч мортöс, — элясис Любовь Васильевна.
Но районын медшöр дойыс — уджтöмалöм. Йöзöс уджöн могмöдан шöринын талун пасйöма 600 мортöс, на пиысь 42-ыс — Одыбысь. Збыльвылассö весь олöны некымын пöв унджыкöн. И войтырлы некытчö инасьнысö. Шуам, Одыбса лесопунктын войдöр уджаліс 400 гöгöр морт, сійöс бырöдöм бöрын йöзыс колисны уджтöг. Кодсюрö талун мырсьöны ас вылö уджалысьяслы, кодкö ветлöдлö вахтаöн, а мукöдыс тöв чужъялöны да юöны-олöны. Конференция дырйи шуисны, мый налы колö отсавны котыртны ассьыныс делö. Мед пö босьтчасны вöчны пызан-улöс, переработайтны йöв-яй да град выв пуктас, сöвмöдны туризм, рöдмöдны чери да сідз водзö.
Но эмöсь-ö зіль да смел войтырыс? Веськöдлысьяслöн висьталöм серти, районын вынсьöдöма 2009-2011 воясö ичöт да шöр бизнес сöвмöдан уджтас. 2010 во кежлö сійöс збыльмöдöм могысь урчитöма 100 сюрс шайт, нöшта 25 сюрс вичмöдö республикаса экономика сöвмöдан министерство. Ноябрь 15 лунöдз ас вылö уджавны окотитысьяслы позис шыöдчыны сьöма отсöгла администрацияö. Та йылысь вöлі юöртöма и районса газетын, и сикт-посёлокъясса веськöдлысьяслы. Но... Отсöгсö корöм могысь шыöдчис сöмын 3 предприниматель...
Экономика сöвмöдöм кузя министрöс вежысь Мария Пономарёвалöн видзöдлас серти, тадзи артмö сы вöсна, мый сиктсаясöдз оз во государствосянь отсöг сетöм йылысь юöрыс. Кöть сійöс йöзöдöма министерстволöн öтуввезйын лист бокын, быд во дасьтöны да разöдöны торъя справочникъяс, тöдмöдöны став выль юöрнас меставывса власьтъясöс — ставыс весьшöрö: сиктса войтыр век ыстысьöны, мый оз тöдны татшöм отсöг йывсьыс. Одыбын Мария Ивановна тшöтш козьналіс став чукöрт-чысьыслы министерствоöн лэдзöм справочниксö, и колö шуны, унаöн дзик пыр босьтчисны сійöн тöдмасьны.
Сёрнитісны делегатъяс и туризм да культура йылысь. Туризм сöвмöдöм могысь тайö лунъясö районын вынсьöдісны торъя уджтас, локтан воö сы вылö ковмас 875 сюрс шайт. И тайö сьöмыслысь пай пö позяс корны "Монди СЛПК"-лысь социальнöя ёртасьöм йылысь сёрнитчöм серти. Сы кузя компания öні быд во вештö районлы 3,5 миллион шайт. Делегатъяс серти, тайö вывті этша, öд предприятие петкöдö вöр, жуглö татчöс вöр-васö да туй-яс. Сідзкö пö, мед унджык и мынтас.
Культура йылысь сёрнитігöн делегатъяс казьтыштісны, мый йöзыслы некöн чукöртчывны-гажöдчыны да коллявны прöст кад Висерын, Типöсиктын, Адзорöмын, вуж выйöныс колö дзоньтавны Одыбын, Пöдтыбокын да Позтыкерöсын клубъяс. Культура учреждениеясын оз тырмы оборудованиеыс, ворсан инструментыс, петкöдчан паськöмыс, библиотекаясын — небöгыс да газет-журналыс.
Ставсö тайöс Одыбын чукöртчысьяс пасйисны "Коми войтыр" конференциялöн помшуöмö. Таысь кындзи тшöктісны разьны пес заптöм кузя гöрöд, öд талун йöзöс пескöн могмöдöм кузя районса уджтасыс оз уджав: сиктъяс гöгöр бур вöрсö пöрöдісны да, войтырлы вöзйöны вöчны пессö 20 километр ылнаын. Ломтасыс артмö "зарни".
Делегатъяс юксисны сідзжö видз-му овмöс сöвмöдöм кузя видзöдласнас. Торйöн кö, вöзйисны лöсьöдны видз-му предприятиеяслы биысь кокньöда тарифъяс, кыпöдны выль скöт картаяс Нёбдінын да Висерын (400 юр вылö) да Важкуръяын (100 юр вылö), таысь кындзи выльмöдны и мукöдлаын фермаяс.
