Быд во республикаса кар-районъясын мунöны "Коми войтырлöн" конференция-чукöртчылöмъяс. Но ыджыд-ö наысь тöлкыс? Аддзам öд: вочасöн коми йöз кöдзалöны татшöм сикас чукöртчылöмъяс дорас. Дöзмöмпырысь нин явö и гусьöн шуасьöны, конференцияяс вылас пö сöмын сёрнитöны, а бурланьö вежсьöмыс оз тыдав.

Збыльысь, "Коми войтыр" öтмунöм котыртчöмсянь регыд 20 во тырас, а коми йöзлöн олöмыс бурмöм пыдди öтарö жебмö.

Со кольöм лунъясö кайлім Эжва йылö, Помöсдінö, кöні вöлі Кулöмдінса "Коми войтырлöн" чукöртчылöм. Сиктса культура керкаын делегатъяс матö нёль час чöж сёрнитісны видз-му овмöс кыпöдöм-сöвмöдöм йылысь. Кыв шутöг, конферен-ция вылö волысьяс вöрзьöдісны "доймана" юалöм. Öд дзикöдз кö эновтчасны сиктса войтыр скöт видзöмысь да град выв пуктас вöдитöмысь, пом воас ставнымлы.

Бöръя кызь вонас Кулöмдін районын видз-му овмöсыс ёна укшальмис-жебмис. Киссисны Кулöмдінса, Ручса, Керчомъяса совхозъяс. На пыдди лöсьöдлöм СПК-яс сідзжö регыдöн сылісны-бырисны. Öні видз-му овмöс кооперативъяс öдва пошиктöны-лолалöны сöмын Помöсдінын да Пожöгын.

Ыджыд надея рынокö пыригöн власьт кутіс и фермеръяс вылö. Но кор государствосяньыд отсöгыс войт мында, крестьянин-фермеръясыдлы сьöкыд сувтны кок йылас. И кöть Кулöмдін районса видз-му овмöс да сёян-юан управлениеöн веськöдлысь И.С.Попов нимкодьпырысь пасйис, мый бöръя кадас лöсьöдöмаöсь дас выль крестьянскöй овмöс, пыр жö чужö юалöм: кор на лоö водзöсыс тайö фермеръяссяньыс? Со тай ас кадö бурпöт ошйысьлісны Аныб дорса Öльöкысь Михаил Вологжанинлöн крестьянскöй овмöсöн. Но кор сöмын бырисны сійö "шань" йöзыс, кодъяс вöліны фермерлы пыкöдöн, овмöсыс заводитіс "чотыштны". Уджалысьясыс мöдісны разöдчыны и. Öні Михаил Вологжанин веськöдлö нин Руч сиктса администрацияöн, а Öльöкса овмöсын бергöдчö сылöн гöтырыс. Юавсьö: бур олöмысь али мый "пышйис" Ручса администрацияö Михаил Вологжанин?

Сюся кывзі Помöсдінысь да Пожöгысь видз-му овмöс котыръясöн веськöдлысь В.А.Рогожниковлысь да В.Б.Шаховалысь висьтасьöмсö. Владимир Анатольевич шуис, мый быд веськöдлысьлы колö кужны юрнуöдны уджалан котырöн, вир-яйöн кывны овмöслысь тіпкöмсö. Но пример пыдди мыйлакö вайöдіс... Москваса вöвлöм мэр Юрий Лужковöс да сылысь гöтырсö Елена Батуринаöс. Со пö кодъяслысь колö велöдчыны уджавнытö... Сё дивö дай сöмын!

Унджык вичччыси и Пожöг СПК-са веськöдлыссянь. Сідзсö Валентина Борисовна Шахова эз дзеб уджын нелючкияссö. Висьталіс, мый скöт картаяс киссян выйынöсь, мöс лысьтöны арлыда йöз, томъясöс фермаад гезйöн он кыскы. Шуны кö веськыда, и Сöвет кадö на скöт дорад тайö жö "гöрöдъясыс" вöліны. Öні жö найö "джаггöрöдъясöн" лоисны.

Валентина Борисовна элясис би вылö дон содöм, техника важмöм вылö. Дöжналыштіс сиктсаöс, тшöкыда пö гусявлöны видз-му овмöс кооперативлысь заптöм турунсö, да и видзьяс вылö некодлысь юасьтöг-висьтасьтöг лэдзлöны йирсьöдны ассьыныс мöсъяссö. Быттьö и став тöжд-дой йывсьыс гараліс Пожöгса СПК-öн веськöдлысь. Но нелючки бырöдан туйяссö эз жö инды. Да и кыдзи тайöс вермас вöчны, кор ыджыдджык чина йöз оз тöдны петан туйсö...

Кулöмдін районса видз-му овмöс висьö сійö жö висьöмнас, мыйöн нёрпалöны республикаын СПК-яс, крестьянскöй овмöсъяс. Öтторъя тай быдлаысь кылан: важмöны скöт картаяс, киссьö техника, оз вермыны ньöбны выль тракторъяс да машинаяс. Власьт ку-тысьяс öтарö сёрнитöны йöв лысьтан да переработайтан комплексъяс, модульяс лö-сьöдöм йылысь. Сёрнитöны, а этша мый вöчсьö.

Кулöмдін районöн веськöд-лысь С.П.Каплин шыöдчис конференция вылö воысьяс дорö, вайöй пö öтвылысь кыдзкö-мыйкö лöсьöдам скöт видзöмын пöрадок. Оз жö позь водзö бырöдны сійöс. Дерт, Сергей Петрович прав, но тайöс колö вöлі вöчны кызь во сайын нин. Кулöмдін районса веськöдлысь видіс Аныбса, Ручса, Дереваннöйса войтырöс, сэні пö медводз бырöдісны лысьтан мöсъяссö. Но öд Сергей Петрович оз жö нин первой во уджав веськöдлысьнад. Тайö пуклöсас оз медводдзаысь пукав и. Тöдöмöн, аддзыліс и войдöр, мый вöчсьö сикт-грездъясын. Сэки нин колö вöлі тöждысьны видз-му овмöс вöсна.

Кулöмдін районса "Коми войтырлöн" чукöртчылігöн кыпöдлісны и мукöд "ёсь" юалöм. Шуам, мый сикт-грездъясын колö ёнджыка стрöитчыны. Колö шуны, мый Ручö, Кулöмдінö, Помöсдінö, мукöд ыджыдджык сиктъясö волігöн казялан: сэтчöс йöз лэптöны аслыныс керкаяс. Тайö зэв бур. Том йöз кö кольччöны чужанінас – сідзкö, абу на дзикöдз кусöма тані олöмыс, эм на сьöлöманыс бур вылö лача.

А мый эз во сьöлöм вылö Помöсдінын? Культура керкаын кызвыныс вöлі коми йöз, а сёрнитісны рочöн. Гöгöрвоа, мый вöліны залас и юркарысь гöсьтъяс – роч войтыр. Но шусян кö комиöн, ас кывсьыд оз жö ков яндысьны. Дасысь унджык морт петаліс сцена вылö, а чужан кывйöн сёрнитіс сöмын "Коми войтыр" öтмунöмлöн исполкомö пырысь А.С.Безносиков. Мукöдыс жö мыкталöмöн, но рочасисны. Со тэныд и Помöсдін, нэмöвöйся коми сикт!

Парскис нöшта, мый Кулöмдінса "Коми войтырлöн" чукöртчылöм вылö эз волы республикаса ни öти тöдчанаджык чина морт. Кывсьыліс, республикаса видз-му овмöс да сёян-юан кузя министр Сергей Чечёткин пö волас. Но и сійö эз мыччысьлы.

Со и висьтав сэсся, мый республикаса власьт сикт-грездса войтырöс пыдди пуктö. Со и виччысь бурланьö вежсьöмъястö...