Меным торйöн нин воöны сьöлöм вылö начальнöй класса велöдысьяс. Гашкö, сы вöсна, мый аслам челядьдырйи тайö авъя аньясыс уна бурторйö велöдісны менö. И öні ас кежысь тшöкыда аттьöавла найöс таысь.
Збыльысь öд торйöн нин ыджыд кывкутöмыс велöдысьяслöн, кодъяс босьтчисны туйдны грамотаö ичöт нывкаясöс да зонкаясöс. И велöдöны найöс оз сöмын лыддьысьны да гижны, но и ышöдöны тöлкöн-ладöн овны öта-мöдкöд, лоны бур сьöлöмаöн да вежавидзысьöн, отсавны пикö воöмалы. Сійöн и матыссаöсь найö челядьлы да кольöны ас йывсьыныс сöмын бур казьтылöмъяс.
Та йылысь и пансис сёрни Ыбса шöр школаысь начальнöй классъясса велöдысь Зинаида Егорьевна Смирновакöд (снимок вылын), коді комын сизим во нин велöдö ичöт арлыдаясöс.
—Ачым чужлі-быдмылі Ыбын, — висьталö Зинаида Егорьевна. — Помалі Сыктывкарын Куратов нима первой номера педучилище. Сы бöрын дас куим во уджалі Кöмъярса школаын. А сэсся локті чужанінö да сэксянь пыр Ыбын.
Кыдзи шуö ачыс, сійö öткодя пыдди пуктö да радейтö ичöтъяс пиысь дзик быдöнöс. Ставныс сылы донаöсь. И велöдысь зільö, медым сылöн быдтасъясыс лоисны бур войтырöн. Сэк жö майшöдлö сійöс, мый школаын бöръя воясö велöдчысьыс ёна чиніс. Кор Зинаида Егорьевна локтöма Ыбö, первой классас вöлöма 31 нывка да зонка, а талун сöмын кöкъямыс. Да и ставнас Ыбса школаын öні велöдчöны 80 мортысь неуна унджыкöн. Мый лоас водзö, сьöкыд шуны. Век жö велöдысь эскö, мый Ыбын олöмыс оз кус. И челядьыс лоасны на.
—Майшöдлö менö и, мый коми кыв талун оз воддза моз юргы школаын, — шуö З.Е.Смирнова. — Гортаныс мам-бать ёнджыкасö сёрнитöны ас костаныс да челядькöд рочöн. Найö оз аддзыны олöмас коми кывлысь коланлунсö. Со и зонпосни вочасöн рочмöны.
Öнія челядь, Зинаида Егорьевналöн кывъяс серти, воддзаясысь торъялöны и сійöн, мый талун найöс ёнджыкасö кыскöны компьютерын ворсöмъяс, а оз небöгъяс. Öтар боксянь бур, мый ныв-зон ичöтдырсяньыс велöдчöны ёртасьны компьютеркöд. Öд талун уналöн нин гортас эм тайö сюсь машинаыс. А школаын сійöн заводитöны тöдмасьны коймöд классянь нин. Но велöдысьлы оз во сьöлöм вылас сійö, мый öнія нывкаяс да зонкаяс кутісны öтдортчыны небöгысь. Сэк жö телевизор пыр налы колана передачаыс гежöда овлö. Весиг бур мультфильмъяс абуöсь. А тайö, дерт жö, омöль боксянь тöдчö челядьлöн видзöдлас вы-лö. Найö оз нин сідзи донъявны олöмсö, кыдзи эськö колö. Вермасны и кежны веськыд туй вывсьыс.
Ыбса школаö волігöн Зинаида Егорьевна буретш вöлі сёрнитö нёльöд класса велöдчысьяс Ксения Перевозчиковакöд да Инна Худоевакöд налöн гортса уджъяс йылысь, велöдö, кыдзи мый бурджыка вöчны. Бöрынджык юалі нывкаяслысь, кыдзиджык найö донъялöны ассьыныс велöдысьнысö. Кыкнанныс пыр жö вочавидзисны, зэв пö бур сьöлöма да шань.
Зинаида Егорьевналöн и аслас нывъясыс мунісны сылöн туйöд. Ирина велöдö Паджгаса шöр школаын. А Валентина уджалö Ыбса "Гренада" приютын, кöні олöны-вылöны сьöкыд оласнога семьяясысь челядь. Зинаида Егорьевналöн быдмöны нин нёль внук-внучка.
Бöръявывсö Зинаида Егорьевналöн сёрниыс бара бергöдчис чужан кывлань. Майшöдлö сійöс, мый вывті уна выль кыв пырис бöръя кадö коми сёрниö. Та вöсна пö и оз кöсйыны челядь велöдны мам кывнысö. Этша пö овлö телевизор пыр бур коми передачаыс. Да и миян драмтеатр зэв гежöда волывлö коми спектакльясöн коми сиктъясö, кыдзи вöлі водзті. А сэсся сиис и "Коми му" газетлы йöзöдны унджык лыддяна гижöд.
