1992 воö Европаса Сöвет лöсьöдіс регионъясса кывъяс йылысь хартия. Збыльмöдны сійöс кутісны сöмын квайт во мысти – Европаысь кызь странаса парламентöн вынсьöдöм бöрын. Регионсаöн документас шуöма государстволöн кутшöмкö юкöнын вöдитчана кыв, код вылын сёрнитö странаын этшаджык олысьыс. Татшöм ногöн, Россияын регионсанас лоö рочысь кындзи став кывйыс.
Кыдзи збыльмöдöны хартиялысь шуöмъяссö Великобританияын – таöн тöдмасьöм могысь ноябрын Лондонö, Кардиффö да Эдинбургö ветлісны Россияса регионъяс сöвмöдан министерствоын уджалысьяс, Госдумаса депутатъяс, Марий Элысь, Удмуртияысь, Мордовияысь, Татарстанысь войтыр. Тайö котырас вöлі и Коми Республикаса Госсöветысь национальнöй тöжд-мог кузя комиссияöн веськöдлысь Вера Скоробогатова.
– Россия пырис Европаса Сöветас 2001 воö да сэки жö кырымаліс хартиясö, но миян странаын сійöс абу на вынсьöдöма, – висьталіс Вера Игоревна. – Та могысь колö, медым документыслöн 69 статьяысь вöлі збыльмöдöма 35-сö. Россияын, кöні олöны 142 национальносьта войтыр да 40 этническöй котыр, кöні 32 кыв лоö государственнöйöн (сöмын Дагестанын татшöмыс дас нёль), вöчны тайöс сьöкыд. Кывъяслы сöвмыны отсалöны регионса власьтъяс, а федеральнöй тшупöдын абу на стöчмöдöма, кутшöм кывъяслы колö отсöгыс да уна-ö сьöм вичмöдны та могысь.
– Вера Игоревна, мый вöчöны Великобританияас регионса кывъяс сöвмöдöм могысь?
– Сэні нёль ыджыд регион – Англия, Шотландия, Уэльс да Войвыв Ирландия. Тöдчана, мый Уэльсын асланыс парламентыс лоöма 1997-öд, а Шотландияын – 1998 воын. Уэльсас олö куим миллион гöгöр морт, на пиысь квайтсё сюрсыс – валлиечьяс. Во ветымын сайын налöн кывйыс дзикöдз кутöма кусны, кызвын войтырыс англия кывйöн вöдитчöмаöсь. Но асьныс валлиечьяс водз-мöстчöмаöсь чужан кывсö видзöм могысь, бать-мамыс заводитöмаöсь ышöдны челядьсö велöдны сійöс. И водзöсыс таысь эм нин. 1993 воö Великобританияын вынсьöдöмаöсь валлийскöй кыв йылысь оланпас. И öні Уэльсса быд школаын велöдöны ас кывсö, мукöдас став предметсö сетöны сы вылын. И оз сöмын школаын, но и детсадйын, вузын, сідзкö, и вылыс тшупöда тöдöмлунтö ас кыв вылын позьö босьтны. Тайöс ставсö индöма хартияас. Сэні жö шуöма, мед регионса кыв вылын йöзöдісны газет-журнал, уджаліс телевидение. Би-Би-Силöн валлиеч кывъя телеканаллы быд во вичмöдöны 103 миллион, а Уэльсас ас кывнас паськыдджыка вöдитчöм могысь торйöдöны 11 миллион фунт стерлинг. Быд муниципалитетын збыльмöдöны валлийскöй кыв сöвмöдöм кузя уджтасъяс.
Меным зэв окота вöлі тöдмавны, мыйöн да кыдзи ышöдöны валлиечьясöс сёрнитны, вöдитчыны чужан кывнас. Дерт, медводз тайö асланыс войтырыслöн ыджыд кöсйöм. Мöд-кö, удж вылö медасигöн окотапырысь-джык босьтöны мортöс, коді англия кыв кындзи бура тöдö и валлиечьяслысь кывсö. Кыкнан кывнас öтмоза вöдитчöны и Уэльсса парламентын. Буретш валлийскöй кывъя телеканал пыр видзöді сэтчöс депутатъяслöн удж бöрся, и быдöн ачыс бöрйис, кутшöм кывйöн сёрнитны. Шыöдчöны кö Уэльсса премьер-министр дорö англия ног, сійö вочавидзö английскöйöн, валлийскöйöн кö – валлийскöйöн. Ставöн кокниа вуджлісны öти кывйысь мöдö. Öні сувтöдöмаöсь ас водзаныс мог, медым и йöзыс социальнöй отсöгла вермисны шыöдчыны чужан кывнас. Та-дзикöн бöръя дас вонас Уэльсын валлийскöйнас сёрнитысьыс содöма 70 сюрс морт.
– А Россияса регионъясын эм мыйöн ошйысьны?
– Марий Элса вит начальнöй школаын став предметсö велöдöны вужвойтырлöн кыв вылын. И Комиын быд районын колö кöть нин öти татшöм школа лöсьöдны, и мед эськö сэні вöліны зэв бур велöдысьяс, зэв бур материально-техническöй подув. И сэки бать-мам окотапырысь вайöдасны челядьнысö сэтчö.
– Позьö-ö виччысьны, мый Россия вынсьöдас хартиясö да лоас-ö сыысь водзöсыс миянлы, регионъясса кывъясöн вöдитчысьяслы?
– Неважöн Госсöветö воис Госдумасянь письмö, кöні юасьöмаöсь, кыдзи миян республикаын донъялöны хартиясö да мый вöчöма нин Комиын сылöн корöм-тшöктöмъяс серти. Сідзкö, документсö вынсьöдöм йылысь Москваын мöвпалöны. Колö пасйыны, мый Европаса Сöветлысь социальнöй хартиясö Россия ратифицируйтіс нин.
Хартияыс зэв колана, öд вынсьöдöм бöрас тшöтш и суйöрсайса кутасны видзöдны, кыдзи миян странаын государствоыс отсалö сöвмöдны вужвойтырлысь кывъяссö. Сэки жö кывъяс сöвмöдöм вöсна тöждысьны ковмас оз сöмын регионъясса, но и федеральнöй власьтлы.
* * *
Ачыд кö он аддзыв, сьöкыд весиг эскыны, мый Великобританияын этша лыда войтырлöн ассьыныс кывсö видзöм-сöвмöдöм кузя тöжд-могыс дзик жö миян кодь, и падмöгъяссö венан туйясыс öткодьöсь жö. Медвойдöр аслыныс йöзыслы колö паськыдджыка вöдитчыны чужан кывнас, сэсся мед власьт вичмöдіс та вылö Британияын мында сьöм, а чина йöз Уэльсса премьер-министр да сэтчöс депутатъяс моз жö бура тöдісны и вужвойтырлысь кывсö.
