Тадзи шулöмаöсь озыр йöз йылысь комияс. И вензьыны тайö шусьöгыскöд он вермы, öд збыльысь, кымын унджык зептад сьöмыд, сымын сійö быттьö оз тырмы.
Миян республикаса юр-карын олысь 32 арöса Михаиллы неважöнöдз, а стöчджыка кö, тавося октябрь 20 лунöдз, судзсьылöма аслас нажöткаыс. Шоперлöн удждон вылö мужичöй вермöма и сёйны-юны, и пасьтасьны-кöмасьны, и семьясö тыр-бура видзны. А нöшта тшöкыда ньöблыны лотерея билетъяс. Кык во сайын ышмöма тайöн да, комын шайт кö пö зептын эм, быть нин выль сикас лотереяысь ворса. Коркö мыйкö воас, коркö оз, но ыджыд куш вылö лачаыс пыр вöлöма. И сійö збыльмöма. Гослотолöн 200-öд тиражын Михаил воöма 20 миллион шайт.
Аслас висьталöм серти, билетысь лыдпасъяссö черкайтігöн сійö нинöм оз артав, кутшöмкö торъя рöштшöт оз вöч ни. А тайö шуда лотереяас лыдпасъяссö бöрйöма книгаысь, кодöс буретш лыддьöма сійö кадас. Колö пасйыны, Михаил зэв ёна радейтö лыддьысьны, öнія детектив-боевикъястö, военнöйяслöн да бандитъяслöн олöм йылысь роман-повесьтъястö веськыда "ньылалö", öтырышъя вит-ö-квайт небöгöн ньöбавлö.
—"Аврора" вузасян шöринлы паныда ичöтик лавкаö ме муні октябрь 21 лунö, — висьтасьö мужичöй. —Сэні уджалысьыс босьтіс билетöс, личкаліс компьютер кизьясас да друг вежсис чужöм вылас. Сэсся мыйлакö и сёрнитнысö кутіс вашкöдчöмöн, кöть эськö ме кындзи сэні некод эз вöв. Ме, дерт, чуйми, юалі, мый лоис, а сійö вочави-дзис, бур пö, мый тöрыт эн лок, эськö телевидение пыр петкöдлісны и газетъясын снимоктö йöзöдісны, а тэныд тайöс вöчнысö оз позь: вывті ыджыд сьöм вылад вермасны и бандитъяс ыштыны. Мися, уна-ö нö вои? Кызь миллион пö. Тайöс кылöм бöрын и аслым деливö лоис. Дзик пыр вирдыштіс мöвп дзебны дона билетсö, мед Москваö сьöмысла ветлытöдз йöз киö эз веськав.
Нимкодь юöрнас Михаил юксьöма сöмын медся матыссаясыскöд, а Россияса юркарö мöдöдчöма сöмын куим вежон мысти. Москваын сійöс виччысьöмаöсь нин. Лотереяöн вузасян компанияöн веськöдлысьыс чолöмалöма мужичöйöс да телекамераяс водзын весиг сетöма кутыштны сьöмсö киас (сорас пыддиыс сэтчö сюйыштöмаöсь и "Приколъяс банклысь" кабалаторъяс). "Пятый канал" телекомпанияысь журналистъяс эськö ёна корöмаöсь Михаилöс петкöдлыны чужöмсö, но сійö абу кöсйысьöма, снимайтчöма мышкöн.
Миян корреспондентлы Комиысь миллионер висьталіс, мый воöм сьöмсö сы-лы сетасны юкöнъясöн кык воöн, кöть эськö водзвыв пö артыштлі нин, кытчö ставсö видза. Матысса кадö Михаил кöсйö ньöбны машина, дерт, отсавны рöдвужыслы да ёртъясыслы... Öти кывйöн, эм, кытчö инавнысö.
—И мыйла меным эз усь 100 миллион шайт? — нюмъялöмöн кайтыштö мужичöй. — Сы мындаыд эськö эз жö лишав. Но да öд ставыс водзын на, унаысь на позьö ворсны. Гашкö, коркö и бара мойвиас.
