Кымын арлыдаджык лоа, сымын унджык кöсъя тöдмавны аслам рöдвуж йылысь. Но, вöлöмкö, этша на мый тöда. Миянöс, прöстöй йöзöс, эз велöдлыны, кыдзи колö туявны да пыдди пуктыны ассьыным вужъяснымöс. И со öні меным окота висьталыштны аслам мам йылысь.

Менам мамöй, Евдокия Михайловна Мишарина, öти тöлысь эз ов 92 арöсöдз, но сылöн вöлі югыд вежöр да бур паметь. Ставсö вöлі помнитö да меным висьтавлö. А менам кö мый йылысь кö вунöма, мам сöмын шуас: "Тэнад юрыд век мыйöнкö мöдöн тырöма, а ме ола дзик важ каднас". Мамлы ме висьтавлі, мый колö гижны казьтылöмъяс. Ме эськö босьтчылі гижны сылысь сёрнисö. Но век мыйкö да мыйкö торкис. Чайті, удита на, мам дыр на лоас ловъяöн. Кöть сійö унатор йылысь висьтавліс. Но ме, бара жö думайтлі ёнджыкасö аслам удж йылысь, да сылысь висьтасьöмъяссö пель сайö эг сюркнявлы.

2007 вося март тöлысьын мамлöн чужöмсяньыс тырис 100 во. Чужліс сійö Сюзяыб грездын, коді сулалö Висер юлöн веськыд берегас, Висер сиктсянь некымын километрöн улынджык. Гöль крестьянскöй семьяын сійö вöлі коймöдöн – Öльöксан вок да Анна чой бöрын. Батьыс вурсис, мамыс вöдитіс гортса овмöс.

Гöльлуныс вöтліс найöс Сибырö. Но недыр мысти бöр локтісны асланыс киссьöм нин керкаас. Медводдза мирöвöй война дырйи батьыс муніс фронт вылö, а мамыс ноксис квайт челядьöн. Менам мам казьтывліс, кыдзи найö тшыгъялöмаöсь, кыдз ковмöма няньтор ради суседъяслысь челядьсö видзны да ветлöдлыны мукöд сиктö корны. 1915-1920 воясö менам мам Анна чойыскöд олöмаöсь Усть-Сысольскса приютын, а сэсся велöдчöмаöсь нывъяслöн гимназияын. А батьыс налöн, менам пöльöй, революция бöрын кольччöма Петроградö, пырöма РСДРП(б)-ö, велöдчöма агитаторъяслöн да пропагандистъяслöн курсъяс вылын. 1920 воын мöдöдчöма гортлань. Но туй вылас висьмöма. Гортас воöм бöрын регыд кувсьöма тыяс висьöмысь. Кык чой буретш каникул дырйи вöлöм мунöны Усть-Сысольсксянь подöн гортас, и тöдмалöмаöсь тайö шог юöр йывсьыс. Кöть семьяыс ёна гöля олöма, но мамныс, Федосья Евсигниевна, зільöма бура велöдны челядьсö.

Менам мамлöн вокыс, Александр Михайлович Мишарин, помаліс Москваын педагогическöй институт, уджаліс школаын, а бöрын вöлі Коми АССР-са просвещение кузя наркомöн, культураса министрöн, Коми АССР-ын Министръяслöн сöветöн веськöдлысьöс вежысьöн, Коми АССР-ысь Верховнöй Сöветса депутатöн. Анна чойыс лоис велöдысьöн, Мария уджаліс библиотекаын, Николай вокыс вöлі военврачöн, Михаил — военнöйöн.

1928 вося август тöлысьын педтехникум помалöм бöрын мамöс ыстісны уджавны Вятка губернияса Порошинскöй школаö, а во мысти Коми обласьтса Сторожевск районысь Ыджыдвидзса школаö. 1930 вося январын бöрйисны Сторожевск райисполкомса секретарöн, а арнас, сійö жö воас, – райзоöн веськöдлысьöн. Сэк жö татчö Москваысь вöлі ыстöма "тридцатитысячникöс" – Иван Андреевич Лосевöс, коді кутіс уджавны ВКП(б) Сторожевск райкомса секретарöн. Найö гöтрасисны. Во мысти, 1931 воын, чужи ме. Гожöмнас семья муніс Сыктывкарö. Бать вöлі горкомса секретарöн, а мам лоис йöзлысь олöмсö бурмöдöм кузя комитетса секретарöн. 1932 воын мам пырис велöдчыны Коми пединститутö. Но ковмис велöдчöмсö эновтны. Батьöс индісны Нювчимса кöрт сывдан заводö директорöн. Мам сэні уджаліс ФЗУ школаын велöдысьöн. Сэні жö чужис менам вок. 1934 вося август тöлысьын миян семья вуджис Москваö, кöні бать бара кутіс уджавны Сталин нима автозаводын, кытысь и мунліс Комиö командировкаö. Мам зілис ВЛКСМ ЦК-ын, а сэсся велöдіс Москваса школаясын.

1941 вося июнь тöлысьын ми, чоя-вока да мам, мöдöдчим Сыктывкарö, кöні олісны сылöн мамыс, чойясыс да вокыс. Войнаыс миянöс суис Котласса пристань вылын. Эг бергöдчöй Москваö, а мунім водзö, Сыктывкарö. Москвасö бомбитісны нин, да бать корис миянöс кольччыны Сыктывкарö тöв кежлö. Ыстіс миянлы кутшöмсюрö кöм-паськöм, а ачыс заводыскöд эвакуируйтчис Ульяновск карö. Но 1942 вося тулысын кувсис. Сідзи артмис, мый мунім Комиö каникул вылö, а кольччим Сыктывкарö нэм кежлö. Олім зэв сьöкыда. Тшыгъялім. Нинöм миян эз вöв. Весиг мыйкö вежны сёян вылö.

Мам кутіс велöдны 16 номера школаса начальнöй классын. 1943 воын гожöмнас пырис квайт тöлысся курсъяс вылö, кöні дасьтісны партийнöй да сöветскöй уджалысьясöс. Сы бöрын 1944 вося январь тöлыссянь кутіс уджавны радиокомитетын. Сэні сійö зілис квайт воысь дырджык. Радиокомитетса архивлöн документъ-ясысь тöдмалі, мый мам вöлöма выпускающöй редакторöн.

1944 вося июньын лоис позянлун ветлыны Москваö асланым сьöм вылö. Мам босьтіс и менö. Сэки меным тырис нин 13 арöс. Вöлöмкö, миян жырйын, Симоновскöй Вал вылын, олöны нин мукöд. Кутшöмсюрö кöлуй да мукöд шылльö-мылльö миянлы сюрис орчча керкаса пöдвалысь. Мый вермим, босьтім аскöд. Мыйсюрö удайтчис вузавны.

1946 воын мамöс ыстісны уджысь орöдчывтöг сизим тöлысся курсъяс вылö, кöні велöдісны роч да коми кывъяс, радиотехника, Ленинлысь да Сталинлысь уджъяс. 1947 воын мам уджаліс "Бöръя юöръяс" редакцияын, сэсся вöлі радиокомитетса редакторöн. Сійöс ыстылісны котыртны радиопередачаяс Сторожевскö, Зеленечö, Сыктыв районö. Кутшöмкö быд ичöтик нелючкиысь грöзитлісны мыждыны. Кадыс вöлі сэтшöм.

1950 вося февраль тöлыссянь мам кутіс уджавны "За новый Север" газетын юöр отделса сотрудникöн, а бöрынджык зілис секретариатын. 1952 воын вуджис Коми АССР-са Главлитö уполномоченнöйöн. А 1957 вося апрельсянь вöлі ремонтно-механическöй заводын кадръяс отделса инспекторöн. Вит во мысти, 1962 воын, петіс пенсия вылö да сы бöрын оліс на 37 во.

Менам мам 35 арöсöн лоис дöваöн да став олöмсö сетіс миянлы, аслас челядьлы. Зілис, кыдзи вермис, мед помалім вузъяс. Ми воккöд велöдчим Ленинградын. И мам письмöясын ыстывліс миянлы вит шайтöн. Менам вок помаліс военно-механическöй институт. Нэмсö зілис Удмуртияын, Воткинскса механическöй заводын.

Мам вöлі медся ыджыд мыджöдöн миянлы. Некодöс эз вунöдлы, быдöн вöсна тöждысис. И мукöд сы дорö век шыöдчылісны. Сэтшöм жаль öні, мый эг ас кадö гижлы мамлысь казьтылöмъяссö.

* * *

Коркö миян дорö воліс Сюзяыбысь мамлöн воча вокыс, Григорий Михайлович Мишарин, да рисуйтіс миян рöдвужлысь ордпусö. Ме лыддьылі и И.М.Панюковлысь Висерса олысьяс йылысь небöгсö. Стöчджыка тöдмалі, мый сюрис государственнöй архивлöн документъясысь. Со мый удайтчис корсьны.

Мишаринъяслöн рöдыс Сюзяыбын заводитчис Öгапийсянь (Агафониксянь). Тайö вöлі менам прапрадед. Сійö чужлöма 1825 воын кымын. А кытысь Öгапийыс Сюзяыбас локтіс, эг вермы тöдмавны. Эг вермы тöдмавны сідзжö и прапрабаб йылысь. Налöн вöлöма нёль пи да öти ныв. На пöвстын вöлöма Федосей — менам прадед, коді чужлöма 1850 воын кымын.

Государственнöй крестьянин Федосей Агафоновичлöн да сылöн гöтыр, Елена Козминичналöн, быдмöма некымын пи, сідзжö и менам Михаил пöльöй. 1876 воын сылöн гöтырыс, менам Федосья бабöй, волöма Джиян грездысь. Чужлöма 1875 воын Агафья Дмитриевна да Евсигний Васильевич Ивановъяслöн семьяын. А Евсигнийлöн батьыс, Василий Андреевич Иванов, 1876 воын кувсьылöма кынöм висьöмысь.

Менам дед Михаил Федосеевичлöн да баб Федосья Евсигниевналöн вöлöма сизим челядь, на лыдын менам мам. Ассьым бабöс помнита бура. Война дырйи и война бöрас сійö овлöма карын, аслас челядь ордын. Ми нёльöн олім важ пу керкаын, коммунальнöй патералöн ичöтик жырйын. Сэні бабöй и кувсис 1952 воын, кор ми воккöд велöдчим нин Ленинградын.

* * *

А мый вöлі ёна водзджыксö? Кöнöсь вужъясыс Öгапий Мишаринлöн, Василий Андреевич Ивановлöн, Агафья Дмитриевна Поповалöн да Елена Козминичналöн?

Этнографъяс лыддьöны, мый Эжваса медводдза комияслöн пöчинокъясыс чужöмаöсь буретш Висер ю бердын, менам пöль-пöчлöн чужанінын. А сэтчö найö локтöмаöсь Емва вывсянь, пышйöмаöсь Кристослысь эскöм паськöдысьясысь.

Кыдзи гижö Игорь Жеребцов, Висерса олысьяс йылысь медводдза документсö йöзöдöма 1380 вося Вычегодско-Вымскöй летописьын. Сюзяыблы, кыдзи и мукöд пöчиноклы, подувсö вöлі пуктöмаöсь 1608-1646 воясö Висерысь, Ыджыдвиддзысь да мукöдлаысь петысь войтыр.

Артмö, менам вужъясöй кыссьöны Мишаринъяссянь, öтлаасьöмаöсь Поповъяскöд да Ивановъяскöд. Но öні та дорö нинöм на ог вермы содтыны. Эска, коркö удайтчас на меным пыдісяньджык тöдмавны ассьым ордпуöс.