Неважöн ветлі мам-бать ордö — Пöддельнöйö. Буретш ёна зэрис. Сöмын тай пöддельнöйсаясöс кöдзыд зэрыд эз падмöд: унаöн чукöртчöмаöсь вöлі сиктын выль стрöйба дінö да нускöны-мошкоритчöны.
А выль стрöйбаыс — часовня. Подулыс эм нин, вайöмаöсь лым еджыд сруб. Ректігас ёна няйтчöма. Со и локтöмаöсь олöма аньяс керъяссö мыськавны. Подулыс пö мед весиг сöстöм вöлі, шуöны. Мыськалан кöдзыд васö вежа ваöн резöмаöсь.
Юасьышті сиктсалысь, ёна-ö колö налы часовняыс. Эльза Семёновна Королёва зэв пöся сёрнитіс. Гашкö пö, Енмыс босьтіс 23 ловсö, медым восьтыны Пöддельнöйса войтырлысь синсö да бергöдны найöс асланьыс. Öд талунъя уна семьяын бать-мамыс юöны-кодалöны и челядьныс налы веськодь, унаöн уджтöмалöны. Буретш сьöкыдлуныс, пикö воöмыс тойлалö йöзсö вина гаглань, а вöлі кö вичкоыд, мунісны шогсö пальöдны сэтчö. Зоя Ивановна Моторина содтіс, мый нэмсö сиктса вичкоыд нималöма аслас мичлунöн, кыпöдлöмаöсь 1826 воын, став сиктсаыс отсасьлöмаöсь. Орчча сиктъ-ясысь пö вöлöм волöны пыртчыны, венчайтчыны, кулöмаöс бöръя туйö колльöдны. А öні пö весиг Ен праздник дырйи некытчö петавны. Михаил Николаевич Кощеев сэсся матыстчис да отсöг миянсянь корис. Ме пö тшöкыда сёрнита сиктса йöзкöд да найö висьталісны "Коми му" холдинглöн акцияяс йылысь. Гашкö пö, и миянлы отсаланныд да став мирöн кыпöдам Пöддельнöйын часовнясö. Унаöн öд "Коми мутö" лыддьöны, содтіс кер дорын уджалысь и таысь весиг любö лои сьöлöм вылын.
И збыльысь, вайö öтув отсалам кыпöдны Пöддельнöйын Ен стрöй-басö. Кодлöн сьöлöмыс висьö та понда, кодлы абу веськодь олöм дойыс, отсалöй сьöмöн.
