Дышöдіс нин карын,

туйö петім бара.

Мунам Кулöмдінö,

лыддьысьысьяс дінö.

Помöсдінö, Вочö,

сэсся бара водзö...

Вылыс Вочö кежам,

Мед кö йöзыс гежöд...

Татшöм кывъяс воисны миянлы юрö Эжва йылö лыддьысьысьяскöд аддзысьлы-ны мöдöдчигöн. Миянлы — тайö журналист котырлы: "Коми му" газет редакция" автономнöй учреждениеöн веськöдлысьöс вежысь Ганна Холоповалы, "Коми му" да "Йöлöга" газетъясса главнöй редакторъяс Елена Плетцерлы да Галина Макаровалы, республикаса гижысь котырысь консультант Анжелика Елфимовалы, "Юрган" телеканалысь корреспондент Алёна Терентьевалы да оператор Олег Костроминлы, Коми йöзкостса радиоысь корреспондент Мария Мингалёвалы. Миянкöд тшöтш туйö петаліс Пöддельнöй сиктса культура керкаöн веськöдлысь, зарни гöлöса колипкай Галина Вокуева, а автобус руль куим лун зэв кывкутöмöн да видзчысьöмöн бергöдліс Комиын МЧС управлениеын зільысь Алексей Лодыгин.

Октябрь 26—28 лунъясö миян неыджыд да зэв ёрта котырным кытшовтіс Эжва йывса 7 сикт, вылынджык казьтыштöм Вылыс Вочö ми сідзи и эг воöй, туйыс сэтчöдз Улыс Вочсянь зэв нин шогмытöм да, полім сибдöмысь. Таысь вылыс вочсаяслысь корам прöща да кöсйысям волыны мöдысь, гожöмнас кос поводдя дырйи либö тöвнас кынталöм бöрын.

Пансис миян кузь вöлöкным Вöльдінын, кöні медводз пöтöса да чöскыда вердісны школаын, а сэсся корисны сиктса клублöн сцена вылö. Кыдзи и пыр, ми висьтасим сиктсаяслы асланым петасъяс йылысь, тöдмöдім газет-журналъясын уджалысьяскöд, казьтыштім, кутшöм выльпыртöмъяс лоöны да, дерт, чуксалім гижöдчыны-лыддьысьны, радейтны да пыдди пуктыны чужан кыв. Гаж пыдди вöльдінсаяслы Анжелика Елфимова лыддис кывбуръяс, а Галина Вокуева нимкодьöдіс мича коми сьыланкывъясöн. Тані жö сиктса войтыр вермисны ньöбны выль коми небöгъяс да дискъяс.

Вöльдінсаяслöн шоныда вочаалöмысь кыпыд лолаöсь ми мöдім Помöсдінö, Тима Веньлöн чужан сиктö. Мися, тані йöзыс чукйыв лоö, но... Журналистъяскöд аддзысьлыны воліс... сöмын öти морт. Культура керкаын зільысьяс ыстысисны, бöръя кадас пö Тима Веньлы сиöм вель уна гаж да рыт вöлі да, йöзыс мудзисны. А, гашкö, умисны нин быд сикас гöсьтсьыс? Огö тöдöй стöч помкасö, но вöлі зэв забеднö: эта кузьта туй вуджим и со тэныд козин! Шуим, мый мöдысь Эжва йылö мöдöдчигöн пыдісянь мöвпыштлам, колö-ö помöсдінсаяслы миянкöд аддзысьлöмыс.

Туйыс тюрис водзö, и со ми Скöрöдумынöсь нин. Тшай юöм бöрын бара на сёрнитім сиктсаяскöд (тані вель жö унаöн чукöрмылісны), видзöдім скöрö-думсаясöн дасьтöм йöктöмъяс, сёрнитчим водзö ёртасьны-волысьны (сэтчöс войтыр некымынысь нин петкöдчылісны Коми КВН-ын) да веськöдчим Вылыс Ярашъюö. Сэні миянöс виччысисны нин Маша Мингалёвалöн Светлана мамыс да сылöн суседкаыс Валентина Пашнина, коді дасьтöма нин вöлі гöсьтъяслы пöсь пывсян да небыд корöсь. Сё пасибö авъя коми аньяслы бур сьöлöмсьыныс да бокöвöй йöзöс бура примитöмысь. Юркарö воліганыд кежалöй жö миян дорö кöть нин тшай юыштны-варовитыштны!

Октябрь 27 лунö асывсяньыс ми нуöдім урок Пожöгса школаын. Юксьылім да, öтияс аддзысьлісны гырысь классаяскöд, мöдъяс посникöд, сэсся вежсьылім. Сы ылнаöдз локтім да, дерт, кежалім "Коми мулöн" да "Йöлöгалöн" зэв бур ёрт, Пожöгса школаын велöдысь Владимир Игоревич Шомысов ордö. А сэсся автобусным вöрзис мöд вожö — Немдінлань да Мыслань.

Немдінын бара чукöртчылім школаас. Ок и сюся кывзісны да видзöдісны миян редакцияясын олöм-уджысь серпасъяссö ныв-зон, зэв регыдöн разалісны и козинъясным — коми петасъяс. Аддзысьлöм бöрас на унаöн матыстчылісны, нöшта корисны газетъяс, эз пö тырмы миянлы. А ми, дерт, сетім да водзö вылö корим гижöдчыны.

Мыс сикт шензьöдіс миянöс кузьтанас — Эжва пöлöн сійö нюжалöма 7 километр. А мичыс гöгöр! Эз öд весьшöрö кыпыда да сьöлöмсяньыс висьтасьлы сы йылысь тані чужлöм-быдмылöм "Коми му" газетса корреспондент Надежда Трубачёва, коді öні олö Смоленск обласьтса Гагаринын. Мысса культура керкаö волысьыс вöлі жö, ёна и клопайтісны гöсьтъяслы, торйöн нин Галина Вокуевалы, некыдзи эз кöсйыны сійöс лэдзны. Но миянöс аскинас виччысисны Улыс Вочын, быть ковмис янсöдчыны.

И со октябрь 28 лун туйын бöръя и медся сьöкыд лун. Коді ветлывліс кык Вочлань, бура гöгöрвоö миянöс. Öд весиг асьныс улыс вочсаяс шензисны миян смеллун вылö, этатшöм туйö пö арнас лысьтінныд петны! Вöлöмкö, гуранöсь да няйт вöлöкöдыд карса гöсьтъясыд татчö оз волывлыны, виччысьöны кос либö кöдзыд поводдя. А ми локтім! Медводз сёрнитім школаын велöдчысь-велöдысьяскöд, а сэсся котöрöн петім детсадйö. Сэні эськö челядьыс водöмаöсь нин вöлі узьыштны, но гöсьтъястö аддзöм бöрын синныс öдйö и воссис, сьöрсьöн-бöрсьöн висьтавлісны миянлы радейтана кывбуръяссö. Ичöтик ныла-зонма нöшта и сьылісны-йöктісны на миянлы. А татчöс пусьысьяс чöсмöдлісны садиклöн град йöрын быдтöм кöчанöн, кушманöн, кабачокöн, пöсь пирöг-шаньгаöн.

Пöт кынöмнад эськö и венім на Вылыс Вочöдз некымын километртö, но кизьöр няйтсö аддзöм бöрын шоперным öлöдіс мунöмысь, йöрмам кö пö татчö, мездысьыд öдвакö сюрас. Вылыс вочсаяслысь ас кежысь прöща корöм бöрын шуим кöть нин мöдöдны налы кольöм газет-журналъяс. Мед тöдмасясны, лыддясны да судзöдасны.

Медбöрын висьталам аттьö ставныслы, коді отсаліс котыртны Эжва йылын олысьяскöд аддзысьлöмъяссö, коді чöскыда вердіс-номсöдліс (торйöн нин Светлана Мингалёвалы да школа-садъясын пусьысьяслы), коді аддзис кад волыны чукöртчылöмъяс вылö, коді шонтіс миянлысь лов-сьöлöмъяснымöс да козьналіс водзö уджавны ыджыд кöсйöм!