"Kirby" пылесос йылысь Россияса уна карын тöдöны нин йöзыс. Эскыны кö рекламалы, сійö зэв бура "нёнялö" бус-ёг да сы пытшкын олысь гагъясöс. Татшöм техникаыс быть колö быдöнлы, коді кöсйö овны сöстöм керкаын да тöждысьö аслас дзоньвидзалун вöсна. "Kirby" кö тэнад эм, сідзкö, сöстöм сынöдöн лолалан.
Но кыдзи тыдовтчö, тайö пылесосыс бура "нёнялö" оз сöмын буссö, но тшöтш и сьöм. Иналöны сійöс 150 сюрс шайтысь. Неважöн "Кирбиöн" босьтчисны вузасьны и Сыктывкарын. И эз бытöвöй техника лавкаын, а киысь. А збыль-ö колö сійöс ньöбны?
Ветеранлы донтöмджыкысь
Вежон сайын звöнитöмаöсь нывъёртлы.
—Аллё! Сыктывкарын неважöн воссис Америкаса компания, коді вузасьö "Kirby" пылесосöн. Ті кывлінныд сы йылысь? — шыасьöма тэрыб гöлöс.
Ань муртса удитöма шуны, мый абу на кывлöма татшöм пылесос йывсьыс. А телефонсянь водзö нин висьталöмаöсь-сяркöдöмаöсь: "Kирби" — зэв бур техника. Некутшöм пылесос сыкöд орччöн весиг оз сулав". Позяс пö и астмаöн нёрпалысь йöзлы вольсавны джо-джас ковёр-палас, сы вöсна мый тайö пылесосыс буссö зэв бура кыскö. Позьö весавны и юрлöс, и диван, и машина пытшкöс – ставыс лоö выль дорысь сöстöм.
Сэсся кöсйысьöмаöсь волыны да петкöдлыны пылесосыслысь уджаланногсö — дон босьттöг весавны буссьöм нин ковёр да диван. Кыдзи нö таысь öтдортчан! Локтасны да дон босьттöг гортад пелькöдчасны! Дерт жö, нывъёртöй корöма. Сёрнитчöмаöсь, кор да кымын часын... Локтöмаöсь.
—Пырис том морт. Сэтшöм мичаа пасьтасьöма. Костюма, галстука, — висьталö нывъёртöй. — Синнас гöгöрбок видзöдліс да юаліс, кутшöм пылесосöн вöдитча. Кыски ассьым пылесосöс, кодöс чайта вöлі зэв бурöн. Зонмыд тшöктіс весавны ковёрöс метр пасьта да метр кузьта.
Пылесос вöзйысьыд сэсся юалö-ма: "Ті думайтанныд, мый бусыс эз нин коль?" Нывъёртöй, дерт, чайтöма, мый ставыс нин сöстöм. Öд пылесосыс сылöн бур! Но аньöс чуймöдöмаöсь. Костюма зонмыд, буретш быттьö татшöм паськöмöн патераын и пелькöдчылам, босьтчöма пылесосавны весалöминсö нин.
Мый ті чайтанныд? Сэтшöм на уна бус сэтысь Америкаса техникаыд кыскöма! Весалöмаöсь и дивансö.
"Но мый, öні ті верманныд нин донъявны тайö пылесоссö?" — юалöма зонмыд. Нывъёртлöн, дерт, вочакывйыс чужöмас нин вöлöм гижöма – бур! Öд кызь минутöн сылысь керкасö сэтшöм бура пелькöдöма...
Сэсся пансьöма сёрни. Том морт заводитöма ышöдны нывъёртöс ньöбны тайö пылесоссö. Кык час чöж быд ногыс ошкöма техникасö. Ачыс пö дзик синмö пыран гут кодь, кывнас мавтö и мавтö. А ёнасö ошкынысö öд оз и ков нин, ань ачыс аддзыліс пылесосыслысь уджаланногсö. Шуис тай, озырджык кö пö вöлі, гашкö и, ньöби.
А öд пылесосыс абу донтöм, 150 сюрс шайта. Вöзйöмаöсь сылы и вочасöн вештысьны. Весиг донсö лэдзöмаöсь 117 сюрс шайтöдз. Вермам пö тэнö весиг ветеранöн гижны да кутан вочасöн быд тöлысь 6 сюрс шайтöн мынтыны. Сöмын пö ньöб!
Бур, нывъёртöй абу ылалöма. "Буса" патераын олö, но лэчкö абу шедöма.
Лавкаö оз ков ветлыны
Но быдöн öд оз вермы мынтöдчыны татшöм вузасьысьяссьыс. Быттьö ку пиад пыраласны, и ньöбан. А öд ылалöны шöркодь удждона йöз – кырымалöны сёрнитчöм во чöжöн либö регыдджык кадöн вештысьны. Тадзи вöчöма Сыктывкарса öти ань. Гоз-мöд вежон сайын сійö ньöбöма "Kirby" пылесостö. Оз на элясь америкаса техника вылад.
—Менсьым телефон номерöс сетöма налы бур тöдсаöй, коді тшöтш жö ньöбöма "Кирбисö", — висьталö Татьяна Мерц. — Некутшöма ог каитчы. Збыльысь бур пылесос. Кор весалісны диванöс да петкöдлісны сэтысь кыскöм клещьяссö, повзи. Мися, татшöм вольпасьын ог жö кут сэсся узь-лыны, кор позьö сійöс бура весавны. Пыр жö и ньöби "Кирбисö".
Татьяна ачыс уджалö Сыктывкарса öти вузасянінын, удждоныс, кыдзи ачыс висьталö, абу ыджыд. И компанияын зільысьяс чинтыш-тöмаöсь донсö. Ань ньöбöма пылесоссö 117 сюрс шайтысь. Сьöмсö абу на ставсö сетöма, кутас вештысьны 21 тöлысь 5.200 сюрс шайтöн.
—Ті асьныд вузасьысь. Эз падмöд, мый пылесоссö вузалöны киысь, а оз лавкаын? — юалі сылысь.
—Эз. Зэв на бур, лавкаö оз ков ветлыны да, — вочавидзис сійö.
Важиник "Самсунгсö" Татьяна Мерц шыбитöма, патераас пелькöдчö сöмын "Кирбиöн".
150 али 30 сюрс шайтысь?
Он кö дышöдчöй да эм кö позянлун, лыддьöй öтуввезйысь "Kirby" пылесос йывсьыс. Сійöс позьö ньöбны 30 сюрс шайтысь. А ылöдчысьяс иналöны 150 сюрсысь. Збыльвылас кö, сійö абу жö дзик дивö, кыдзи эскöдöны вузасьысьяс. Сьöктаыс дас кило, уджалö гораа, проводсö аслыд колö быдмавны.
Сэсся код тöдас, дыр-ö уджалас. Кöть эськö компанияын эскöдöны, мый пылесоснас нэм чöжыд кутан вöдитчыны. Но быд во колö вöчны техникаыслы сідз шусяна техосмотр. Ньöбöмсяньыс медводдза куим вонас таысь вештысьны оз ков.
Ставсö тайöс гижöма кабала-инструкцияас. Но позьö-ö эскыны? Олöмыс тай петкöдлö, мый весиг лавкаясын йöзсö бöбйöдлöны. Сідзкö, мöвпыштлöй, колö-ö татшöм донысь ньöбны.
Сиктсалы – "пластмассаысь" пила
"Кирби" пылесосöн сикт-грездöдз эз на воны. Кöть эськö и Кöрткерö-сöдз волöмаöсь жö нин, карсяньыд матын да. Видлöмаöсь жö öти семья-лы кöвъявны 150 сюрс шайта добратö. Но найö абу ыштöмаöсь Америкаысь пылесос вылад. Кутшöмкö кад мысти, чайта, и мукöд сиктъясöдз воасны наян вузасьысьясыд.
Öні жö сэні тшöкыда вузасьöны струж-дрельöн, "Husqvarna" пилаöн. Тшöкыдджыка ветлöдлöны татшöм тöварнас чиганъяс. И öд йöзыс ньö-бöны, а сэсся бöрыннас каитчöны. А кыдзи нö он ышты? Сэтшöм бур пила гортöдзыд вайöны да нöшта на лавкаын дорысь донтöмджыка вузалöны.
Но мыйлакö йöзыс оз мöвпыштлыны, мый асьсö пыдди пуктысь фирма вузасьö лавкаын, а оз киысь киö ассьыс тöварсö вöзйы. Донтöмджыкысь вермасны вöзйыны сöмын пöрйöга (поддельнöй) пила либö мукöд инструмент. Сэсся кор киысь ньöбан, тэныд некутшöм гарантия оз сетны. Гашкö, и та йылысь колö думыштлыны деньгатö зепсьыд кыскытöдз.
Во кык сайын Кöрткерöс районса Керöсысь öти мужичöй чиганъясыдлысь пöрйöга "Хускварна" пилатö аслыс и суседыслы ньöбöма. Но дыр вöдитчыны сійöн абу вермöма. Уджö босьтчигас и сотчöма выль пилаыд. Разьöмаöсь да пытшкöсас детальясыс пластмассаысь вöлöмаöсь.
Кöрткерöс районса Зулöб грездысь мужичöйлы чиганъясыд дрель вöзйöмаöсь. Ыштöма жö ньöбны, но колана мында сьöмыс абу вöлöма. Котöртöма сусед ордас удждысьны, а сійö абу могмöдöма. Сэсся пиыслы звöнитöма, висьталöма, мый чиганъяслысь дрель кöсйö ньöбны. Бур, пиыс батьсö öлöдöма.
* * *
Эз нин öтчыдысь милиция да роспотребнадзор öлöдны, мед видзчысясны йöзыс наян вузасьысьясысь. Но мыйлакö найöс оз кывзыны. А мыйöн ылаласны, заводитöны правда корсьны. Олöмыс петкöдлö, мый пöрйöга тöвар вузалысьыдлысь ньöбасьысь сьöмсö бöр бергöдны оз нин вермы. Весиг и ёрдö шыöдчылöмöн. Сідз шусяна öти лунся фирмаясыд тшöкыда вежлалöны ассьыныс нимсö. Вузаласны став пöрйöга инструмент-техникасö да вошöны кытчöкö. Корсь сэсся найöс...
