Коми кывъя газет-журналъяс уджалöны лёка. Татшöм кывкöртöд вöчисны сентябрь 28 лунö республикаса Государственнöй Сöвет бердысь национальнöй политика комиссиялöн чукöртчылігöн, кöні медшöр сёрниыс муніс, кыдзи газет-журналъясын пöртöны олöмö "Коми Республикаса государственнöй кывъясйылысь" оланпас.
Та дырйи колö вöлі тöдчöдны удж котыртöмын бурсö и лёксö, но чукöртчысьяс мыйлакö öтторъя бергöдісны висьтасьöмнысö тырмытöмторъяслань.
Комиссияöн веськöдлысь В.И. Скоробогатова индіс, мый коми газет-журналъяслöн тöдчанлуныс вочасöн бырö, тиражъяс воысь-во чинöны. "А сикт-грездын олысьыс кызвыннас коми", — содтіс республикаса печать да юöр сетан агентствоöн юрнуöдысь С.Я.Балас, сэсся подулаліс шуöмсö лыдпасъясöн. Коми наука шöринын зільысь Е.А.Цыпанов норасьыштіс: республикаын öнöдз абу том войтырлы коми петас, оз лэдзны социальнöй тöдчанлуна уна рöма журнал. Национальнöй политика министерствоысь С.Г.Козулиналы оз во сьöлöм вылас "Коми му" газетын роч информагентствояслöн вуджöдöм юöръясöн тшöкыда вöдитчöм. Асланыд журналистъяслы пö колö дасьтыны шензьöдана гижöдъяссö...
Унатор на вöзйисны-велöдісны чина войтыр. Кывйыд, кыдз шуласны, лытöм — мудз оз тöд. Сэсся öд бокöвöйыдлы тырмытöмторъясыд тыдаланаджыкöсь. Но! Мыйлакö редакторъяс кындзи некод эз гарав коми газет-журналъясын мытшöдъяслöн помкаяс йылысь.
Шуам, налöн тиражыс и збыльысь бöръя кадö тöдчымöн чиніс. Но öд этша лыдöн петöны и мукöд кывъя изданиеяс. Тані позьö вайöдны некымын помка. Öти-кö, чинö чужан кыв вылын сёрнитысьяслöн лыдыс. Мöд-кö, йöзыс мöдісны тшöкыдджыка "ньылавны" юöръяссö электроннöй СМИ-ысь: радиоысь, телевидениеысь, интернетысь... Юöрыд налöн уна сикас да пыр выль. Газетын быдторсö гижны лист бокыс оз тырмы, сэсся и юöрыд сэні, гöгöрвоана, сёрмыштö. Тайöс пасйис тшöтш Светлана Георгиевна, кодыр донъяліс "Коми мулысь" уджсö. Дерт, збыльыс тані эм, но бара жö — мыйла? Талун тайö газетсö печатайтöны Киров обласьтса Мурашиын. Сэні тöдчымöн донтöмджык да (а сьöмтö видзтыны öтарö тшöктöны быдтор вылас). Карыс абу матын. "Газет номерсö, медым мöдöдны ас кадö, вежонöн водз дасьтам, — ышлолыштіс "Коми муысь" главнöй редакторыс Е.В.Плетцер. — Кутшöм нин тан свеж юöр?.."
Гашкö, унджык колö йöзöдны аналитикаа гижöдсö, но та вылö колöны кужысь журналистъяс. Сэк жö быд редакцияын, торйöн нин коми газет-журналъясын, оз тырмы журналист диплома уджалысьыс. Кызвыныс сэні велöдысь диплома. Та-тшöмъяслы республикаса печать да юöр сетан агентство ас кадö котыртліс СГУ бердса содтöд тöдöмлун сетан шöринын торъя курсъяс. Öні велöдчöмсö нуöдны сьöмыс абу, а эмышт кö, видзöны мöдтор вылö. Шуам, чина удж вылö выльöн босьтöм "специалистъяслы" удждон мынтыны. Россияын тайö лёк висьöм кодь: сьöм видзтöм могысь тодмышкавны "ковтöм" уджалысьясöс да рöдмöдны веськöдлысьясöс. Кодлы нö либö гижны коми кыв вылын статья-очеркъястö? Коді кутас лэдзны том войтырлы, олöма йöзлы, мукöд социальнöй юкöнъяслы коми газет-журналъястö? Чинö оз сöмын тираж, но и ас кывъя петасын зільысьлöн лыдыс. Бöръя воöн "Коми му" газет редакция воштіс кык том журналистöс — налы быть лои эновтны чужанінсö да мунны корсьны судзсяна-шуда олöм республикаысь бокын. Ичöт удждон, оланін абу... Ставыс тайö öтдортіс найöс радейтана уджысь — коми кыв да культура видзöм-сöвмöдöмысь...
Мыйла коми газет лист бокъясын мöдісны тшöкыдджыка петавны рочысь вуджöдöм юöръяс? Кöні дзик нин ас гижöдъясыс? (Тані оз ков сорлавны статьяясöн, "Коми муад" найö тырмымöн. Сёрниыс мунö заметкаяс йылысь.) Вочавидза... Татшöмыс абу сöмын миян республикаын. Мир пасьталаын газет-журналъяс, радио-телевидение кад видзöм могысь йöзöдöны быд сикас информагентствояслысь юöръяссö. Дивитанаыс тані нинöм абу, агентствояслöн сыын и могыс, медым отсавны уджъёртъясыслы — вöчны налысь петасъяссö интереснöйджыкöн, быдтор юöртанаöн. Гашкö, збыльысь коми газет-журналын статьяясыд сюрöс боксяньыс гöльджыкöсь, гежöда чуймöданаöсь, но öд бур юöртö колö корсьны, тшöкыдджыка ветлыны сикт-каръясö... А та вылö бара жö колö сьöм, öнія кадö оз на и этша. Ми дасьöсь кöть быд лун корсьны шензьöданатö, да конйыштöны чинаяс — странаын пö кризис, колö, мед командировкаясысь этшаджык вöлі рöскодыс.
Сёрнитны кö сьöм йылысь, пасъя, мый бöръя воясö республикаса газет-журналъяслы пыр этшаджык вичмöдöны сьöмсö. Ми воклы пыр тшöктöны аслыным нажöвитны деньгатö. А мыйöн эськö вермасны нажöвитчыны челядьлы "Би кинь", шмонь-серам радейтысьяслы "Чушканзі" журналъяс, том войтырлы "Йöлöга" газет? "Коми муад" рекламатö сетны окотитысьыд абу жö тшем. Мыйöн тöдмаласны, кутшöм кыв вылын петö газетыс, пыр и шеныштчасны, кыдзкö пö тіянтöг нин...
Мыйла нö коми кыв дорас татшöм "кыдзкö тіянтöгыс"? Коми Республикаын олам, кывнымöс государственнöйöн ыдждöдлам, а пыдди пуктöмыс — войт мында. Видлы шеныштчыны Татарстанын, Чечняын, Эстонияын сэтчöс вужвойтырлöн кыв вылö, öдйö велöдасны дорын узьлынытö. Ставöн öтвылысь — порт-феля морт кöть джодж мыськалысь. А миян мöдарö: вылі тшупö-дын корсьöны "улын" пукалысьяс пöвстысь мыжаöс да ньöти оз кöсйыны гöгöрвоны, мый тырмытöмторъяслöн помкаыс кöнкö сэні, власьт бердын. Сьöд уджтö бертысьыд ставсö нырас, сöмын тшöк-ты. И тшöкыда артмö, мый тайö тшöктöм сертиыс кералöны ув, код вылын пукалöны. Шняпкысяс кö сэн пукалысьыс му вылö, чинаыд пыр и горöдас: ачыс мыжа! Сэк жö зумыдджыка кö кутчысяс, портфеляыд мöдас кучкавны морöсас: тайö пö ме ышöді, тайö менам заслугаыс! Тадзи и олам-уджалам — зілям нимöдны Коми му, чужан кыв да культура.
