Венгрияын Айка кардорса лемень сывдан заводын лоис ыджыд неминуча: производство бöрын колясъяс видзаніныслöн помöдыс пезьдіс да ылькнитіс ортсö 700 сюрс кубометр омöль сорас: кöртлöн оксид, сідз шусяна сьöкыд металлъяс, щёлочь. Гöрд рöма сідз шусяна шламыс ю моз письтіс-визувтіс...

Сизим морт кувсис, матö 150-öн доймалісны. Тайö омöль сораса юыс ньылыштіс-пöдтіс страналöн рытыввылысь Калатар да нöшта кык посёлок. Пöгибö воöм сэтчöс олысьяссö вертолётöн лэбöдісны-мездісны.

Венгриялöн рытыввылын визувтö Марцаль ю. Национальнöй службаöн веськöдлысь Тибора Добшон юöртіс, мый сэтчö веськалöм щёлочыс виöма и черисö, и ваын быдмöгъяссö. Омöль сорассö эськö зільöмаöсь "нильзьöдны" гипс да кислота отсöгöн, но нинöм абу артмöма.

Öткымынöн лыддьöны, мый омöль сорасъясыс веськаласны Дунай юö да Сьöд саридзö. Найö пуксясны пыдöсö, веськаласны ва быдмöгъясö да чериö...

Водзö сэсся, чайта да, оз ков висьтавны. Серпасыс сідз нин ясыд. Сöмын и Комиын вермас лоны татшöм ускöттьöыс. Сосногорск районын Изьва юö Айюва усянінын шуöма стрöитны сёя му вöчан завод. 2004 вося июль 1 лунö республикаса сэкся Юралысь Владимир Торлопов кырымаліс индöд, код серти вöлі сетöма сы улö му. "РУСАЛ" компания мöвпалö могмöдны Комиын вöчöм сёя мунас Россияса лемень сывдан дзик став производствосö. Та могысь перйыны 6,5 миллион тонна боксит, а сыысь вöчны 1,4 миллион тонна глинозём.

И, дерт, тайö заводыслöн тшöтш чукöрмас сідз шусяна гöрд шламыс: кöртлöн оксид, сьöкыд металлъяс, щёлочь, кодъясöс быть ковмас видзны торъя урчитöминын. А лоö кö Венгрияын кодь ускöттьö?

Печораöс доръян комитетö пырысьяс дзик первойсяньыс сувтісны тайö стрöитчöмыслы паныд. Быд чукöртчылігöн найö долисны, мый Печора ю дорö татшöм заводсö вöчны оз ков. Кыв шутöг, вöр-ва видзöмыс медся ыджыд тöжд да мог. Но гырысь компанияясыдлы тайö, буракö, веськодь. И чинаяс ёнджыкасö сувтöны на дор, а йöзлысь да общественнöй котыръяслысь вöзйöмъяссö быттьö оз казявны. Экология йылысь сёрниыс медсясö сёрниöн и кольö. Пыр жö окота казьтыштны Усинск районын неминуча, кор письтöм трубаысь ылькнитіс мусирыд... Али ми нинöмö ог велöдчöй? Али прöстö ог кöсйöй?..

Öні, гашкö, колö выльысь ставсö бура артыштны да мöвпыштны? Венгрияын лоöм неминучаыс со син водзын. Дерт, медся кокни öвтыштчыны. А-а-а, öти сёрни-басни пö...

Таво гожöм Россия пасьта ыпъяліс-сотчис вöр. Вöр кодекс вынсьöдтöдз на нималана учёнöйяс, академикъяс, общественнöй котыръясö пырысьяс шыöдчылісны странаса Президент дорö, öлöдісны, мый кодекссö колö на бура дасьтыны. Но, кыдзи и овлö, эз кывзыны. Биыд ньылыштіс сикт-посёлокъяс, доймалісны-сотчисны да кувсисны йöз...