Ыджыд Вермöмсянь 65 во пасйöмкöд йитöдын Комиын йöзöдлісны "Мы — наследники Великой Победы" благотворительнöй марафон. Чукöрмöм сьöм вылас медсясö отсалісны ветеранъяслы дзоньтавны оланін. А Койгортысь Лия Николаевна Клинцовалы кыпöдісны выль керка. Кольöм воторникö Коми Республикаса Госсöветöн веськöдлысьöс вежысь, республикаса ветеранъяслöн сöветöн веськöдлысь Станислав Хахалкин ветліс гöститны сы ордö.
Казьтыштам, май помын Госсöветöн веськöдлысьöс вежысь Станислав Хахалкин воліс Койгорт районö видзöдлыны, кыдзи меставывса власть видзö марафон дырйи чукöртöм сьöмсö. Сэки жö вице-спикерлы висьталісны, мый Койгортын олö öтка пöч, тылса ветеран Лия Николаевна. Сылöн керкаыс дзикöдз нин муö пырöма, джоджыс лайкъялö, подулыс сісьмöма да, пачыс киссьöма. Дзоньтавны оз нин шогмы. Мöдлаö вуджны овны баб оз кöсйы.
Торъя комиссия видлаліс Лия Николаевналысь оланінсö да шуис кыпöдны выльöс. Баблöн жö йöрас. Сьöмсö стрöитчöм вылас вичмöдісны 100 сюрс шайт благотворительнöй фондысь, нöшта ветымын сюрс — районса бюджетысь.
Керкасö кыпöдны заводитісны июльын, а октябрын ставыс нин вöлі дась.
—Дерт, керкаыс ичöтик, но важмöм да киссьöм дорысь тані Лия Николаевналы лоö бурджык, — шуö Койгорт сиктса администрацияöн веськöдлысь Юрий Перепаденко. — Сійö олö öтнас да, торъя ыджыдыс оз и ков. Мед сöмын сылы шоныд вöлі.
Но ачыс Лия Николаевна выль керкаас овмöдчыны оз тэрмась. Важас на олö. Пачсö сöмын куимысь выль оланінсьыс и ломтылöма, а сійö потласьöма нин.
—Меным дивö, мый та-тшöм öдйö керкасö кыпöдісны, — шуö олöма ань. —Важöн öд дыр стрöитчылісны, нэмъяс кежлö.
Со и Лия Николаевналöн керкаыс сё сайö во нин сулалöма. Пöльыс на стрö-итлöма. И та мында вонад сійö пöлыньтчöма. Да и ачыс тылса ветеран тöдö стрöитчан уджсö. Война бöрын сиктас керкаяс кыпöдлöма.
А олöмыс Лия Николаевналöн зэв сьöкыд вöлöма. Челядьдырсö талялöма война. Ичöтöн ковмöма мырсьыны сиктса колхозын. Батьсö нуöмаöсь фронт вылö да ловйöн абу и локтöма, усьöма Ленинград дорйигöн. Мамыс тшыгла кувсьöма 1944 воын. Дас вит арöса нывкалы ковмöма быдтыны дзоляджык чойсö да воксö аслыс.
—Ог тöд, кыдзи и асьным ловйöн колим. Сёйлім петшöр да пилипызь сора сöчöн, — казьтылö сійö.
Тшыг кöть абу удж вылад, тайöс эз юавлыны. Война кадад ставныс сьöкыда овлісны да некодлы и элясьнысö вöлі. Да некод эз и жалит. Мырсьылöма Лия Клинцова и вöрын. Кер кыскалöма-пöрöдлöма, сплавын уджавлöма и.
Лия Николаевналы таво ноябрын тырö 82 арöс. Но зэв на збодер. Горт гöгöрас став уджсö на ачыс бергöдö. Тулыснас пуктысьö, арнас идралö. Пес поткöдлыны петалö и. Сöмын пö дышöдча да скöт ог видз. Рыжик нима канькöд и олöны.
—Верöсöй кызь во нин абу, а челядь аслам эз вöвны, — ышловзис сійö.
Мунігöн нин юалі Лия Николаевналысь, мися, выль керкаад сэсся кор вуджан?
—Ог тöд, — шуис Лия Николаевна. Да тапиктіс пöльыслöн на кыпöдлöм важиник керкаас...
