Октябрь 8 лунö Коми Республикаса вужвойтырлöн шылада-драмаа театр восьтö ассьыс выль IX сезонсö Александр Ларевлöн "Прöщай, любовь?!" лирическöй тешöн.

—Выль спектакльсö петкöдлам кык лун помся, мед став окотитысьыс вермис видзöдны, — висьталіс вужвойтырлöн шылада-драмаа театрöн веськöдлысь Светлана Горчакова. — Спектакльыс радейтчöм йылысь. Юргö сэні дас вит сьыланкыв, шыладсö налы гижис республикаын паськыда тöдса композитор Марк Новосёлов.

Кыдзи пасйис Светлана Гениевна, таво найö мöвпалöны петкöдлыны некымын выль спектакль. Ноябрын нин искусство радейтысьяслы петкöдласны Алексей Поповлысь "Кимöститчысьяс" теш. Спектакльыс зэв серамбана. Вужвойтырлöн шылада-драмаа театрöн веськöдлысь чайтö, мый сійö быдöнлы воас сьöлöм вылас кыдзи и кольöм сезонö пуктöм "Гöтрась, пиö, гöтрась!" шылада теш.

Шуöма дасьтыны нöшта öти серамбана спектакль — роч гижысь Александр Суворовлысь "Эжвавывса анекдотъяс". Автор став серамбана лоöмторсö босьтöма збыль олöмысь. Дасьтöны театрын и Испанияса драматург Лопе де Вегалысь "Учитель танцев". Артистъяс кутасны йöктыны Испанияын моз, а сёрнитны комиöн.

Видзöдысьяс донъяласны и "Парма" ансамбльлысь ыджыд концерт. Ар- тистъяс кутасны ворсны коми йöзкостса кызь öти музыкальнöй инструментöн. Концертсö дасьтöны Михаил Бурдинкöд öтув. Пасъям, буретш Михаил Николаевич вöлі "Парма" ансамбль котыртысьöн.

—Зэв нимкодь, мый комияслöн та мында национальнöй инструментыс, — шуис Светлана Гениевна. — Финн-йöгра войтыр пöвстысь некодлöн сы мындаыс абу. И ыджыд аттьö таысь композитор Прометей Чисталёвлы.

Дерт, видзöдысьясöс виччысьöны и воддза воясö дасьтöм спектакльяс вылö.