Нина Степановна Руденко кызь сизимöд во велöдö Сыктыв районын Межадор сиктса школаын коми кыв да литература.
—Веськыда кö шуны, велöдчигöн окотиті лоны юристöн, — казьтылö сійö. — Дасöд класс помалігöн на майшаси, кутшöм туйвизь бöрйыны. Но тшöкыда тай олöмыс ачыс индалö. Сідз артмис и менам.
Визинса школаын коми кыв да литература сэки велöдысьлöн зільöмöн челядь радейтöмаöсь чужан кывсö, да Ниналöн классысь сыкöд тшöтш квайт ныв шуöмаöсь лоны педагогöн. Сэсся и батьыс тшöтш ышöдöма Нинаöс.
Сыктывкарса университет помалöм бöрын Нина Степановна во зільöма Палаззяын, сы бöрын вуджöма Межадорса школаö. Первойсö, дерт, абу кокньыд вöлöма. Классъясын велöдчысьыс комын гöгöр вöлöма. Ставныскöд колö ладмöдчыны. Вильышджыкъясыд том велöдысьлысь абу кывзысьлöмаöсь. Овлöма, мый Нина Степановна весиг урокъяс бöрас бöрдлöма. Кыдзи ачыс висьталіс, вывті пö матö ставсö сьöлöм бердö босьта вöлі да. А сэсся вочасöн челядь велалöмаöсь Нина Степановна дорö да налы сійö ыджыдджык ёртöн лоöма.
Öні классад челядьыс этша да, школаын семьяын моз и олöны. Тöждысьöны öта-мöд вöснаыс, зільöны отсасьны. Нина Степановналы зэв нимкодь, мый Межадорын комиöн сёрнитöны на. Кор сійö сёрнитö чужан кыв сöвмöдöм, челядьöс велöдöм йылысь, синъясыс ыпъялöны шудöн. Нина Степановна сьöлöмсяньыс радейтö ассьыс уджсö и зільö сетны Межадорса нывкаяслы да зонкаяслы бур тöдöмлун.
