Ярославль. Медводдза роч актёр Фёдор Волков нима театрын мунö Александр Островскийлы сиöм фестиваль. А ЯГТИ-ын (сэтчöс театр институтын) дасьтöм спектакльяссö фестивальса конкурсас оз на босьтны, и найö петкöдчöны асланыс сцена вылын. Студентъяслöн "Снегурочкаын" кöртысь вöчöм декорацияясын коми йöзкост паськöма геройяс ворсöны сигудöкöн да пöлянöн, сьылöны комиöн.
Театрлы сиöм Москваса журналын фестиваль йывсьыс вöлі гижöмаöсь 5 лист бокын, на пиысь нёляс – вöвлытöм на "Снегурочка" йылысь. Конкурсас пö эськö сылы позис Гран-при сетны. 2000-öд вояс заводитчигöн Олег Нагорничных дасьтöма тайö спектакльсö Комиысь студентъяскöд – уджсьыс орöдчывтöг сэки Ярославльса вузын велöдчисны Виктор Савин нима да йöзкост шылада-драмаа театръясын ворсысьяс. Лельлысь рольсö сетöмаöсь Андрей Третьяковлы.
– Веськыда кö, Островскийыс быттьö Комиö волöма да тані гижöма "Снегурочкасö". Кöдзыд пöль да Тулыс – муыс да ваыс – öтлаасисны, и мыччысис-лоис Снегурочка. Лым ныв, коді збыльвылас öд и абу. А лоис да ставлы мусмис. Берендеевкаыс дзик коми грезд кодь. И "Парма" котырлöн коми сьыланкывъясыс зэв лöсялісны, – висьталö Андрей. – Видзöдысьяс пöся примитісны спектакльсö. Кöть сцена вылын, а казялан да кылан-аддзан, кыдзи йöзыс донъялöны петкöдчöмтö. Алёна Сметанина ворсіс Купаваöс, буретш дасьтім Лель да Купава костын сцена, а миян мыйкö оз артмы. Олег Нагорничных шуö, оз пö тадзи ков, а кыдзи колö, оз висьтав. Ми юалім, мый сэсся, миянлы тані мусукасьны на али мый. "Да!" – шуö сійö. И ми кутім окасьны. И сэки режиссёрнымлöн чужöмыс югдіс, со тайö пö бур, а öні тшöтш кывъястö висьталöй.
Кывза Адрейöс да мöвпала, мыйла ми тайö "Снегурочкасö" Сыктывкарын эг аддзылöй. Таво Комиысь студентъяс помалісны Санкт-Петербургын театр академия да петкöдлісны тані "Калевала" да Вампиловлысь "Прошлым летом в Чулимске" спектакльяс. Дзик выль тöвру быттьö öвтыштіс сэки республикаса театръясын. Дерт, и Ярославльын велöдчысьяслöн спектакльыс Островскийлöн пьеса вылö выль видзöдласнас шызьöдіс жö эськö Сыктывкарса видзöдысьясöс. Юалі Андрейлысь да, сійö вочавидзис, Олег Нагорничных пö эськö мöвпалö вöлі та йылысь, но эз артмы. Зэв жаль...
Андрей быдмылöма Кебанъёль посёлокын, мамöй пö Кужса, а батьöй Кулöмдінса, а ме шöракостас быдми. Ичöтдырйиыс на дядьыс, Иван Арнаутов, петкöдлöма сійöс сцена вылад. Воссьö пö занавес, и дядь юöртö: "Народный артист Коми АССР Андрей Третьяков". Ачыс пö балалайкаöн ворсö, а ме сьыла ставсö, мый тöда.
– Артистъястö сэки сöмын телевизор пыр аддзылі, артистöн лоны некор эг чайтлы. Школа бöрын пыри велöдчыны 20 номера профтехучилищеö, – водзö висьталö Андрей. – Но Кулöмдін районса культура керкаын гажъяс дырйи концертъястö нуöдлывлі. 1999 воын öти татшöм концерт вылö воліс режиссёр Виктор Напалков да корис менö велöдчыны драма театр бердын актёрлöн студияö. Студияыс во нин уджаліс, а ме локті сэтчö мöд курсö. Öтлаын жö сэсся и Ярославльын велöдчим. Виктор Напалковöн дасьтöм спектакльын жö медводдзаысь и театрса сцена вылö петі. Сэсся вöліны Олбилöн "Всё в саду", "Сказ про Ерёмину любовь", Островскийлöн "Гроза", Вампиловлöн "Старший сын". Уайльдлöн "Веер леди Уиндермирын" ме эг вöв ворсысьяс лыдын, но быд репетиция видзöдны волывлі. Сергей Сушенцев, режиссёрыс, друг вöзйис, видлы пö ворсны мистер Хопперöс, Америкаысь воöм зонмöс, код сайö нывкаöс кöсйöны сетны. И ворсі.
СГУ бердын Сергей Сушенцев котыртліс "Серсо" театр-студия, корис сэтчö и Андрейöс. Филатовлöн "Сказ про Федота-стрельцаын" генералöс да став посолсö сылы мойвилöма ворсны, а Сент-Экзюперилöн "Маленький принцын" – Лисöс.
– Коркö Сушенцев звöнитö, Дюша пö (тадзи менö шулывліс), ме тэныд пьеса сета, велöд роль да ворсан. Опера да балет театрын "Весёлая вдова" сувтöдö вöлі. Сетіс меным пьесатö, видеокассета, ме киссьытöдзыс сійöс видзöді, но велöді рольсö. Но эг сійöс, мый колöма, – висьталö Андрей. – А став рольсö бура тöді, и менö кык лунöн, нёль репетицияöн "пыртöдісны" куим акта ыджыд спектакльö, кöні оркестрлöн ворсöм улö сьывны коліс. Дерт, медводдзаысьтö "адреналин" отсöгöн ворсі. И тешкодьторъяс овлісны. Öтчыд вунöді, мый воддза актын Бриош да виконт де Каскад, кодöс ме ворсі, дуэль йылысь сёрнитчöны. Эг пет. Тöдінныд кö, кыдзи Журковлы öтнаслы ковмис бергöдчыны сцена вылас. И аслым на ковмис мыйкö думыштны-лöсьöдлыны, мед видзöдысьыс сюрöссьыс эз вош.
Тадзи Андрей веськалöма и опера да балет театрö, кöні мыйтакö кад уджалöма. Видзöдысьяс öні на казьтылöны, збыльысь пö тыдалö драма актёрыс, сьылігас быд мöвп тшöтш и ворсöмöн тöдчöдлывліс. "Принцесса из страны Роз" дасьтігöн режиссёрыслы, Сергей Сушенцевлы, мыйкö век жö абу кажитчöма. И шуöма пыртны спектакляс Шутлысь роль. Гоз-мöд лунöн кывъяс сылы гижöмаöсь да тшöктöмаöсь Андрейлы ворсны сійöс.
– Полі, мый кывъяссö вунöда, – казьтылö Андрей. – Гырысь шыпасъясöн гижи найöс кабала вылö, вель уна лист артмис, да сеті оркестрын пукалысь öти мортлы. Мед листалас да петкöдлас меным. А сійö друг мöвпыштчис мый йылысь кö да дугдіс листъяссö вежлавны. Ме сцена вылын сулала да Шут моз чеччыштала-йöктыштала да быд ног зіля петкöдлыны сылы, мед оз вунöд ассьыс могсö...
Опера да балет театрад менам и аслам видзöдысьяс нин вöліны. Куим олöма ань быд спектакль вылö волывлісны, дзоридзьяс да грейпфрут ли, кофе доз ли, шоколад ли козьнавлісны. Сцена вылас петны янды-сьöны да öта-мöдсö йöткалö-ны, кодкö сэсся зэв öдйö петалас, сетас да бöр лэччас. И улич вылын паныдасьласны да век бур кыв шуасны, а ме том на да меным яндзим жö таысь, кöть эськö и зэв любö ошкыштöмсьыд.
Öні Андрей бара ворсö Виктор Савин нима драма театрын. Рольяссö видзöдалан да казялан, мый сылы веськалöны ёнджыкасö сідз шусяна характернöй рольяс, сангвиниклöн да холериклöн сорасыс. Гашкö, ачыс сэтшöм да, сы вöсна. Унаысь сцена вылын и ышмылöны, торйöн нин пö мойдъяс ворсігöн. Найöс öд унаысь лоö петкöдлыны, да дышöдлö öтиторсö ворсны, со и мöвпыштлöны быдсямасö, медым ёртъяс вылас шмонитыштны. Став артистыс öд, том кöть пöрысь, нэмсö челядь руа.
Выль сезоныс драма театрын тöрыт воссис премьераöн, Чеховлöн "Юбилей", "Предложение" да "Свадьба" пьесаяс серти "Свадьба и прочее, и прочее, и прочее..." спектакльöн. Сувтöдö сійöс Юрий Попов, а Андрей Третьяков ворсö Андрей Андреевич Нюнинлысь рольсö, коді тай 25 шайтысь корö кöлысь вылö генералöс, но зепталö сьöмсö.
Андрейлöн кывъяс серти, сы мында ворсантор эм, и сійö дась быдтор ворсны, но век жö ёнджыка воöны сылöн сьöлöм вылö суйöрсайса классика, Александр Островский, кажитчö и сьывны на сцена вывсянь. Эскам, Андрей Третьяковлы ставыс на мойвиас, öд кутшöм на кузь театрын сылöн олöмыс.
