Сентябрь 22-25 лунъясö Мордовияса юркарын — Саранскын — вöлі финн-йöгра прессалöн витöд фестиваль.

Россияса финн-йöгра регионъясысь матö 50 журналист сёрнитісны уджын мытшöд-падмöгъяс йылысь, тöдмасисны мордва войтырлöн олöмöн (та могысь нуöдлісны Старая Теризморга сиктö), аддзысьлісны республикаса юралысь Николай Меркушкинкöд. Тайö жö лунъясö Саранскса печать керкаын воссис финн-йöгра фотожурналистъяслöн "Волга — река мира. Диалог культур волжских народов" выставка.

А сентябрь 24 лунö Мордовияса государственнöй национальнöй театрын нимöдісны финн-йöгра газет-журналъяс пöвстын конкурсын вермысьясöс. И зэв нимкодь, мый быд номинацияын пасйисны Комиысь журналистъясöс. Сідз, "Коми му" газет шедöдіс медводдза места финн-йöгра регионъяс костын ёрта йитöдъяс йылысь бур гижöдъясысь, "Йöлöга" газет лои мöдöн "Финн-йöгра войтырлöн традицияяс йылысь фоторепортажъяс" нимпасын. "Би кинь" журналöс ошкисны йöзкостса традицияяс видзöмын водзмöстчöмысь, "Чушканзілы" диплом вичмис финн-йöгра шмоньысь.

Козинъяс вичмисны сідзжö öтуввезйын Финн-йöгра порталлы, Кöрткерöс да Удора районъясса "Звезда" да "Выль туйöд" газетъяслы, "Коми му" да "Йöлöга" газетъяслöн важся бур ёрт Мария Алексеевна Плосковалы.

Фестиваль йылысь паськыдджыка гижам газетлöн локтан номеръясын.