Со ми и воим Сьöд саридз дорö. Ас машинаöн. Ми эськö тöдім Россияын жар поводдя йылысь, мый гöгöр ыпъялö, но век жö шуим мöдöдчыны туйö. Радейтана мортыдкöд ме ог пов нинöмысь. Саридзлань мöдöдчöмысь медся ёна поліс менам мамукöй. Кымынысь туйö петтöдз öлöдіс, мед быд зептö сов босьта: сöмын пö сувтöдасны, тэ койышт синмас да пышйы. Тадзтö, мися, став Россия пасьталаын йöзыслысь синсö солалам. Менам кöть и серам петö, но мамлы паныд ог мун. Мортыс öд миян вöсна тöждысьö, кöнкö, дугдывтöг Енмыслы кевмысьö. И кевмысяс на гортö вотöдз.
Мед эськö менам пасйöдъясыс ковмасны туйö петысьяслы. Налы, коді миян моз жö медводдзаысь мöдöдчас ас машинаöн саридзлань.
Шуим петны войнас. Гортысь вöрзьöдчим öкмыс час рытын. Öти-кö, абуджык жар, мöд-кö, Кировöдз туйсö бура нин тöдам, оз ков ёна чиганасьны, коймöд-кö, öдйöджык воам лунвылад. Мыйсö аскöд сöмын эг босьтöй: примуссянь ветымын литр ваöдз. Ми öд шуим овны палаткаын да "дикаравны" матö кызь лун: овны саридз дорын, узьлыны ывлаын, пусьыны примус вылын.
Но медводз сёрниыс мунас кузь туй йылысь. Дзик пыр жö урчитім, коді мыйысь кывкутö: верöс нуö, а ме штурманала. Менам эськö и правоыд эм, но дыр нин рультö эг бергöдлы да, быттьö полышта. Да и верöсöй шуис, мый кузь туйын нывбабалöн уджыс – вердны да видзны унмовсьöмысь шоперöс, корсьны мунан туй, а вайöдны саридз дорöдз – сылöн делö.
Сыктывкарсянь Киров обласьтöдз воим бура, 02 час 35 минутын ву-джим республикакöд граница. Войнас адöй ёна зэрмис, туй боксьыс чеччалісны лягушаяс да енэжас дзоргöмöн, буракö, аттьöалісны кодöскö зэрысь. Зэв эськö жаль найöс талявнысö, да öд он кут ставнысö вештавны. Сы мында вöлі да. Луннас Кировті на мунім. А ёна жö нин гöль керкаясыс туй бокас! Журавли, Халтурино, Коромыслово сиктъясын матö став керкаыс овтöм. Бöрдöны. Котельничиöдз паныдасисны дачаяс – ичöтöсь, пон чомъяс кодьöсь. Ставыс кос: туруныс виж, дзоридзыс нярмунöма.
Водз асывнас, квайт час да джынйын, нуръясьыштім. Сёйыштöм бöрын Яранск туйвежын мöдім Йошкар-Ола карлань. Гужа сиктын вöтлöны мöсъясöс, асывсяньыс том морт кодалö-бовъялö нин туй кузя. Тані быдмö нин яблöк. Асъя шондіыс гöрд шар моз дуввидзö. Сизим бöрас верöслöн унмыс кутіс локны. А ме сюзь моз пукала, штурманала, шопер бöрся видзöда-дзорга. Унзілялöмсö казялі да босьтчи ылöдлыны: кутім сьывны. Сöмын вежöрö воöны школаын на велöдлöм челядьдырся сьыланкывъяс: "Щорс идёт под знаменем", "Взвейтесь кострами" да "Трус не играет в хоккей".
Кöкъямыс час дас минутын воим Яранскö. Туйыс дзик кар пырыс мунö. Гöгöр няйт, буса, пуясыс сьöдöдöмаöсь. Мыйла тані олöны йöзыс? Мыйла оз корны власьтсö вештыны туйсö бокö? Кар сайын, Юльям сикт дорын, зэв ыджыд сот-чöмин, вöрыс чишкасьöма жö. Вöрсьыс петіс руч да котöртіс туй боктіыс. Машинаясысь оз и пов. Буракö, пöжарыд велöдöма йöз дорысь отсöг корсьны. И мыйлакö ручыс сьöд гöна, чишкасьöма али мый?
Со и Йошкар-Ола. Тыдалöны нин карса джуджыд керкаясыс, сöмын тані миянлы колö веськöдчыны Казаньлань, М-29 трасса вылö. Тайра сикт бöрын бергöдчим Чебоксарылань. Бöрö колис военнöй аэродром, кöні матö 22 вертолёт. Водзын ыджыд кытшола туй. Мунім сэті 9 час 25 минутын. Сöмын верöсöй ылалыштіс, да ми бöр мöдім Комилань. Метр 100 мысти казялім сорсьöмнымöс. Мунам Чебоксарылань. Со и туй вылын пöрадок видзысьяслöн (ДПС) пост. Эз сувтöдны. А колö стöчмöдны, мый верöсöс ёна пов-зьöдлісны ДПС-салöн лёкалöм-выв-тіасьöмöн. Водзвыв пасъя, мый саридз дорö вотöдз миянöс сувтöд-лісны сöмын öтчыд да кабала видзöдлöм бöрын сиисны бур туй.
Марий Эл ставнас тшын пиын. Туй бокын уна салдат, буракö, би кусöдны вайöдöмаöсь. Мунан да синтö весиг курöдö-сёйö. Со и öзъяланіныс. Уна кусöдчысь, пöжарнöй машина, салдат. Меным ковмис ва марляа маска пысавны. Ве-рöсöй эз пасьтав, дзикöдз кö пö личкас, вöлисти. Туй бокас сотчöма кафе. Туй öтар-мöдар бокас вöрыс чишкасьöма верст квайт.
Гортын на ме мöвпалі мунігöн купайтчöм йылысь. Мися, кутам сувтлыны, пöттöдз уявны-бузöдчыны. Сöмын ёна ворсси. Тані став шорыс, юыс да тыыс дзоридзалö, а мукöдлаас и дзикöдз косьмöма. А радлі ме 50 литр ва босьтöмлы. Зэв жар. Туйыс омöль. Ыджыд фураяс да шипа гöгыль вöснаыд дзикöдз тшыкöма туйыс. Матö быд 300 метр мысти аварияын кувсьöмаясöс казьтылан пас.
Со и öзйис машинаын бензин бырöм йылысь юöртан лампа. Сöмын тай "ЛУКОЙЛ"-лöн заправитчаніныс некöн абу. Тані гöгöр "Татнефть" да мукöд. Верöс шуö, верст 70 вермам на пö мунны, либö ковмас кисьтны мöд сикас бензин. Дас час 10 минутын вуджим Чувашиялысь граница. Бöрö коли Волга. Сэсся менам ылавсис да Новочебоксарсклань туйö кежöм пыдди мунім Чебоксарыö. Абу на тай вöлöм кокни штурманавнытö. Вель дыр корсим бöр бергöдчанін. Тані öд туйясыс абу миян моз кык визяöсь, а нёляöсь. Сорсян кö, ковмас верст кык мунны мöд визяс вуджöм вöсна. Новочебоксарскö воим 10 час 20 минутын. Сэсся карас вошим. Но и уялыштім. Медбöрын верöсöй босьтчис йöзыслысь юасьны, кодарö мунны. Слабог, петім карсьыс. А миянлы вöлöм сэтчö оз и ков пыравнысö. Öтчыд сорсьö-мöн вöчим сы ыджда кытш! Бензинным кутіс бырны, а "ЛУКОЙЛ" некöн оз тыдав. Шуим кисьтны "Татнефть"-лысь ломтассö. Но босьтім сöмын 20 литр, кöнкö öд миянлы лöсялана бензиныс эм жö.
Водзвыв артыштöм серти миянлы колö вöлі воöдчыны Цивильск карö, а сэсянь бергöдчыны Ульяновсклань. Мунам Цивильсклань, а туй индалан гижöдъясас быдлаын пасйöма Казань да Москва. Ковмис бара юасьны локтысь-мунысьяслысь. Сыланьö пö мунанныд, шуисны. Километр вит мысти, Коншурай да Шигали сиктъяс костын, вöлисти аддзим "ЛУКОЙЛ"-лысь заправитчанінсö.
Ульяновск обласьтын нöшта на жар. Быттьö пывсянынöсь. Но туруныс вежджык Марий Элын серти. Туруново сикт прöйдитіг быттьö гортö волі. Гашкö, кыввужйыс коми ног юргö да. Чувашияса öти сиктын шуим пöсь шыдöн пажнайтыштны. Кыкöн сёйим 157 шайт дон. Босьтім кык шыд, кык чери, öти рис да кык тшай. Нöшта на пуан ва ньöбим. Сідзсö эз сетны, миян пö ваыс абу. Чувашия да Ульяновск обласьт костын другöн кыптіс ён тöв ныр. Быттьö енэжсьыс лыа воронка петіс, кыпöдіс став лöп-ёгсö да нуис вывлань. Миянöс эз вöрзьöд. Бокиті муніс.
14 час 20 минутын пырим Ульяновск обласьтö. Ывлаас 45, машинаын – 50 градус жар. Бара на ошка верöсöс – кык литраа термос ньöбöмысь. Термосад ваыд оз шонав, да ёна миянöс и мездіс. Ульяновск кар вуджим 15 час 05 минутын. 16 час 45 минутын воим Сызрань кар дорö. Кежим веськыдвыв да мöдім Хвалынсклань. А сэтчöдз ме бара на омöля штурманалі да, Саратовö пыдди нуöді Самараö. Сöмын сэки дум вылö уси, мый миян эм навигатор. Сетім сылы индöд нуöд-ны миянöс Саратовö. Со кöні шудыд вöлöма! Оз ков, майбыр, карта, сюсь техникаыд ставсö ачыс висьталö-индалö. Лöсьыд! Сызрань вуджим 17 час 17 минутын. Карсянь 68 километр ылнаын тыдовтчис ыджыдсьыс-ыджыд водохранилище. Менам радöй! Мися, тані купайтчам да узьны кольччам. Пöшти сутки нин сувтлытöг мунам. Верöсöс кори кежны вадорлань. Быдса километр лэччим юланьыс. Воим и… джöмдім! Ва видзаніныс ставнас дзоридзалö веж турунöн. А миянлань змей кывтö. А ме кöсйи тані вой-ковтны да водз асывнас купайтчыны. Вай, мися, öдйö бöр татысь мунам. Бöрсö сьöкыда кайим. Верöс шуö, быдса 50 литр бензин пö "сёйис" машинаыс. Бара на заправитчим. Туй бокас вузасьöны маöн. Жар. Коньöр мазіясыс кысь бара дзоридзьяссö аддзöны? Гöгöр öд сотчöма жарысла. Весиг пуясыс нюкыльтчöмаöсь. Туйясыс омöльöсь. Муннысö лои сьöкыдджык. Шуим сувтны кытчöкö войколöн. Аддзим лöнь да шыльыд места, кежим. Кадыс 20 час 05 минут. Верöсöй пузьöдіс тшай, нуръясьыштім да тэрыба водім. Узим машинаын, "Волгаыд" ыджыд да, майбыр, тöрам кöть витöн.
Асывнас навигатортö включитны сямным эз тырмы да, шуим мунны карта серти. Недыр мысти нин гöгöрвоим, мый техникаыд техника и эм. Сійöн колö вöдитчыны тэрмасьтöг, лабутнöя. Тшöктін кö мыйкö вöчны, виччысь вочакывсö, сэсся бара личкав кнопкаястö. А верöсöй ставсö öдйö кöсйö. Дöзмис, оз пö кывзысь менсьым навигаторыс, ачыд уджöд. Ме лабутнöя сеті индöд нуöдны Волгоградöдз. Навигатор босьтчис уджö. А туйыс тайö вожас кутшöм лёк! Буракö, жарысла сьöкыд фураяс улад асфальтыс сылöма да лоöма пластилин кодь, артмöма джуджыд кöлеяа туй. Мукöд иномаркаыс асфальтсö пыдöснас гирскö. Миян водзын мунысь "КАМАЗ"-öс виччысьтöг кöлеясьыс шыбитіс паныда полосаас да, муртса кык-ö-куим машина эз зурасьны. Ми эськö сэтчö жö веськалім. Но мамуклöн кевмысьöмыс миянлы отсаліс.
Мунам водзö. 10 час 35 минутын пырим Саратов обласьтö. Тані тшына да кос. Туй бокас быдмö семечки, но коньöрöй "горш косьмöмысла" дзикöдз юрсö мулань копыртöма. Омöль туйкöд орччöн нюжöдöны выльöс. А важ вöлöкыс омöль, векни, машинаясыс мунöны надзöн. Панйыны фураяссö сьöкыд. Найö мунöны кыкöн-куимöн да ичöт костöн. Гашкö, километр 70 мунім ичöт öдöн. 11 час 05 минутын воим Саратовö. Кар бокас веськалім пробкаö. Но верöсöй збоя ставнысö панйис да сувтіс медся водзас. Кузь туйö петавлöм шоперыд тöдö, кутшöм сьöкыд мунны ньöжмыдъясыдкöд.
Мöдöдчим Волгоградлань. Зэв жар да тшына. Лыддьысьысь, дерт, казяліс нин жар да тшын йылысь унаысь казьтылöмсö. Но татшöм и эм поводдяыс талунъя Россияын: косьмöм шоръяс, потласьöм му да сотчöм вöр. Шондіыс, кыдз и Марий Элын, гöрд мач кодь. Сызрань — Волгоград трассалöн 380-381 километръясын ДПС-лöн ыджыд пост. Тані видлалöны фураяслысь сьöктасö, документъяс. Миянöс бара на эз сувтöдны. Тані зэв уна нуръясянін, вузасьöны град выв пуктасöн да фруктыöн.
13 час 10 минутын вуджим Саратовсянь Волгоград обласьтö. Туйыс ёна бурджык. Абуджык тшына, но сотчöминыс уна. 14 часын туй бокас и нуръясьыштім, зэв тай донаöсь татчöс кафеясыс да. 14 час 35 минутын мунім Камышин ичöтик кар дорöд. Звöнитлі Алёша воклы, мöдöді чолöм, öд тані сійö кык во служитіс. Карсьыс петöм бöрын аддзим ДПС-ын уджалысьяслысь сюсялöмсö. Веськыд туй, öти гурантор весиг абу, сэсся сійö лэччö увлань да и тыдалö зэв ылö. Öддзöдчы сöмын, кöть 150 километрöдз. Но сэні сувтöдöмаöсь часнас 40 километрысь öдйöджык мунöмысь öлö- дан пас. Верöсöй заводитіс мунны надзöн, мукöдыс жö сöмын визьнитöны-панйöны. Мый нö, мися, он öддзöд? Тайö пö кутшöмкö зэв ылöдчана пас, кутасны. И збыльысь, миянöс панйысь шоперъястö вöлі сувтöдöмаöсь. Дерт, кöнкö, штрапуйтісны.
547-öд километрын бара на зэв уна кафе, тані юим кöдзыд ва да тыртім ассьыным термоснымöс. Зэв на и лöсяліс аскöд босьтöм машинаын новлöдлан холодильник. Ва юигöн миянлы воча воисны военнöй машинаяс. Öтиын руль сайын пукалысь зонка ёна видзöдіс миянлань. И сэтшöма муніс менам уджъёрт Галина Макаровалöн Яша вок вылас. Сэтшöм жö гöгрöс да беринöсь чужöма, а видзöдласыс висьталö, мый аддзис землякъясöс.
16 час 50 минутын воим Волго-градö, сöмын карас эг пыралöй. Навигаторлы сетім индöд нуöдны миянöс Краснодарöдз. Сійö тöлкöн-ладöн вöчис ассьыс уджсö. Волгоград сайын веськалім туйвывса медводдза пробкаö. Вöлöмкö, поезд мунö да шлагбаумсö лэдзöмаöсь. Быдса час воштім. Новые Рогачи кар дінын вöзйöны оланін да пывсян – кузь вöлöк вуджысьяслы медся коланатор! Тані абу нин тшына, пуясыс вежджыкöсь, шондіыс югыд. Калач-на-Дону кар дорын содтім ломтас да мöдім водзö. А местаясыс тані кутшöм мичаöсь! Дон вуджтöдз миянöс медводдзаысь сувтöдіс ДПС. Видлалісны документ да зэв лабутнöя вöзйисны бур туй. Шуим Калач-на-Дону кар сайын войколавны, местаыс адöй мича да.
