Эм зэв стöч роч шусьöг: "Олöм овны — абу видз вывті вуджны". Збыль öд тадзи и эм. Кажитчö, мый тэнад ставыс бур, олан-вылан, шог ни печаль. И друг, мый он виччысь, сійö и суас. Суис и миянлысь семьяöс шог, а сыкöд содöны и могъяс. Быть ковмис ветлыны Ухта карö. Туйыс абу дженьыд, куимсё сайö километр. Мöдöдчим автобусöн. Матö квайт час ковмас мунны. Велавтöгыд да нöшта олöма йöзыдлы тайö туйсö абу кокни вуджны. Но нинöм он вöч, быть колö ветлыны. Он öд кут норасьны, мый туйыс кузь да сьöкыд.
Сёрниöй менам дзик мöдтор йылысь. Матö джын туйсö мунöм бöрын воим Емва карö. Автобус минут дас кежлö кежаліс кöрт туйвывса вокзал дорö. Водзті татшöм вокзалъясас вöліны асмогасянінъяс, а öні, видзöдам да, öти сюръяö тувъялöмаöсь гырысь шыпасъяса гижöд: "Туалет". Эм нöшта и индан пас, кодарö мунны. И, дерт жö, миян автобусын мунысьяс ставöн веськöдчисны неыджыд еджыд стрöйбалань. Веськöдчи и ме сэтчö. Водзын öд туйыс зэв на кузь. Видзö-дам гижöд: "Стоимость услуги 15 рублей". Со тэныд и на. Миян юркарын мыйлакö 10 шайт, а тані? Но нинöм он вöч, он öд кут артасьны. Быть мынтысь. Менам куртка зептын вöлі ыджыдкодь блокнот, кытчö унатор гижöма да пасъялöма. Зептöй ляпкыд, и блокнотыд усьöма да, эг и тöдлы. Кватитчи сöмын автобусын. Шогö весиг уси, сэн жö зэв уна телефон номер, колана пасйöдъяс. И кыдз нö ме натöг кута уджавны? Жаль, но нинöм öні он вöч.
Воим Ухта карö лун шöр бöрын нин. Кык час гöгöр. Аддзим колана керкасö – нотариальнöй кантора. Кöсйим нин пырны, а сэні висьталісны, мый буретш пажын кад. Ковмис виччысьны час джын. Йöзыс чукöрмис зэв уна. Бур, веськалім медводдзаяс лыдö. Сэні ковмис пукавны куим час сайö. Колана документъяссö лöсьö-дöмысь меным да гöтырлы ковмис мынтыны кык сюрс шайт. Мынтысьнысö колö Сбербанкын. А кöні пö сійö? Ветлöдлам, юасям, кыдзкö-мыйкö аддзим жö колана банксö. Оз на öд быдын и босьтны сьöмсö.
Нёль час рытын эм автобус, коді бöр мунö Сыктывкарö, но ми сійöс эг нин суöй. Ковмас виччысьны квайт час рытöдз. Воим автовокзалö, юасям, эм-ö сэні асмогасяніныс? Абу пö, сійö вокзалыскöд орчча керкаын. Аддзим эськö, но кыкнан жыръяс томанъяс öшалöны. Сэсся кöть мый вöч. Тайöс кö тöдім, эськö сьöраным босьтім памперсъяс, но а öні нö кытчö? Водзын бара на зэв кузь туй. Ветлöдла, кыйкъяла, кытчö эськö позьö пыравны. Видзöда, еджыд керка стенын гижöд: "Стоматология". Но, сэні быть эм асмогасяніныд. Пыри, ветлöдла öтарö-мöдарö, но некутшöм колана гижöд ог аддзы.
Гусьöникöн юася öтилысь да мöдлысь. Висьталісны, коймöд судтаас пö. Кайи, аддзи дзик öти öдзöс. Абу ни "М", ни "Ж" гижöд. Пыралі. А кыдзи нö гöтырлы? Петі да висьталі, мися, сэнтö и сэнтö, кыпöдчыв. Со тадзи и мездысим. Бур, кöть сьöм эз ковмы мынтыны. Дерт, абу сьöмын ставыс. Колö жö думыштлыны туйвыв морт йылысь. Мед кöть нин тайöн кодсюрö бизнессö вöчö. Пöгибö воан да, он нин кут артасьны.
Öтиторйöн ошка Ухта карсö. Тані йöзыс вежавидзысьöсь, некысь уличаяс вылысь он аддзы ёг тыра пакетъяс, тыртöм сулеяяс. Сідзкö, ухтасаяс радейтöны ассьыныс карны-сö. Дзик мöд серпас миян Сыктывкарын. Кöть эськö уналаын сулалöны ёг чукöртан ящикъяс, но йöзыс, буракö, оз кöсйыны маты-стчывны на дорö. Кыйкнитласны öтарö-мöдарö да бруткöбтасны ёг тыра мешöкъяссö веськыда улич вылö. Сэк жö Эжваö волан да, пыр и синмад шыбитчö, мый сэні йöзыс абу Сыктывкарын кодьöсь. Гöгöр сöстöм, весиг ковтöм кабала оз туплясь. Мыйла нö юркарса олысьяс татшöмöсь? Важöнкодь нин ме гижлі та йылысь кывбур. Шусьö сійö "Сыктывкарö воліс пöчö".
Ылі сиктысь аслас могöн
Воліс карö варов пöчö.
Öти вежон оліс нач,
Сэсся сёрни паніс тадз:
Сыктывкар – столича мича,
Сöмын асьсö дурка видзö,
Сёрöн водö, чеччö водз,
Унджык комиыс сэн роч.
Загреки да загреки,
Унджык комиыс сэн роч.
Öтчыд пикö волі дзикöдз,
Колö пыравны нужникö,
Ветла-жöдза, шурк да шарк,
Бур, мый мездіс вадор парк.
Загреки да загреки,
Бур, мый мездіс вадор парк.
Дерт, Сыктывкарын Ухтаын серти бурджык серпасыс, кöнсюрö эмöсь асмогасянінъясыд и дон-тöмджыкöсь Емваын серти. Ог тöд, кыдзи-мый та кузя мукöд странаын, а миян Россияын сы выйöдз воим, мый кодсюрö весиг асмогасянінъясöн вöчöны ассьыныс бизнессö. Тайö öмöй абу дивитантор?
...Но выльысь бергöдчылам Ухтаö. Петім сэтысь квайт час рытын да Сыктывкарö воим вой-шöрын.
Та бöрын нöшта на кыкысь ковмис ветлыны Ухта карö, и быд пöрйö майшасим асмогасьöм вöсна. Дерт, сэсся неуна тöлксяммышті, мöдысьсö да коймöдысьсö ветлім нин ас машинаöн нажöвитчысьяскöд. Найö кöть и унджык босьтöны ветлöм-мунöмсьыд, но, кор "колö", чеччöдлöны йöзсö сэтшöм местаясö, кöні оз ков мынтысьны.
Казьтышта, мöдысь Ухтаö бара ветлім автобусöн. Кежалі Емваса асмогасянінö. И сэтчöс кöзяйкаыс мыччис меным дона блокнотöс. Бур кöть, абу шыбитöма. Гашкö, кодкö ошкö öнія олöмсö, но ме шуа: "Тадзи овны оз позь".
